ވެރިކަމަށް ވަޑައިގެން ގައުމުން ބޭރަށް ކުރައްވާ ފުރަތަަމަ ދަތުރުފުޅުގައި ރައީސް ޓްރަމްޕް ހޮނިހިރު ދުވަހު ސައުދީ އަރަބިއްޔާ އަށް ވަޑައިގެންފިއެވެ.

ސައުދީން، ރައީސް ޓްރަމްޕްގެ މިދަތުރުފުޅާ ބެހޭ ގޮތުން ބުނެފައި ވަނީ، މިދަތުރުފުޅުގައި ސިޔާސީ އަދި އިގްތިސާދީ އެއްބަސްވުންތަކެއް ސައުދީ އާއި އެމެރިކާއާ ދެމެދު ވާނެ ކަމަށެވެ. އަދި މި އެއްބަސްވުންތަކުގެ ސަބަބުން ޓެރަރިޒަމާ ދެކޮޅަށް ދެގައުމުން ކުރާ މަސައްކަަތަށް ފަހިކަން ލިބިގެން ދާނެ ކަމަށެވެ.

ސައުދީ ވެރިރަށް ރިއާދް އިން ރައީސް ޓްރަމްޕް އަށް މަރުހަބާ ވިދާޅުވީ ސައުދީގެ ރަސްެގެފާނު ސަލްމާން ބިން އަބްދުލްއަޒީޒް އަލް ސައުދު އެވެ.

ރައީސް ޓްރަމްޕް ގައުމުން ބޭރަށް ކުރައްވާ ނުވަ ދުވަހުގެ މިދަތުރުފުޅުގައި އިޒްރޭލް، އިޓަލީ އަދި ބެލްޖިއަމް އަށް ވެސް ވަޑައިގަންނަވާނެއެވެ.

ގައުމުން ބޭރަށް ކުރައްވާ މިދަތުރުފުޅުގައި ރައީސް ޓްރަމްޕާ އެކު ބައިވެރިވެވަޑައިގަންނަވާ ބޭފުޅުންގެ ތެރޭގައި  ރައީސް ޓްރަމްޕް ގެ އަނބިކަނަބަލުން މެލަނިއާ ޓްރަމްޕާއި، ނެޝެނަލް ސެކިޔުރިޓީ އެޑްވައިޒާ އެޗް.އާރް. މެކްމާސްޓާ އާއި، ސެކްރެޓަރީ އޮފް ސްޓޭޭޓް ރެކްސް ޓިލާސަން އާއި، ސެކްރެޓަރީ އޮފް ޑިފެންސް ޖޭމްސް މެޓިސް އާއި، ދަރިކަނަބަލުން އިވަންކާ ޓްރަމްޕާއި އެކަމަނާގެ ފިރިކަލުން ޖެރެޑް ކުޝްނާ ހިމެނިވަޑައިގަންނަވައެވެ.

ރިޕޯޓުަތައް ބުނާ ގޮތުން ސައުދީ އަށް ރައީސް ޓްރަމްޕް ކުރައްވާ ދަތުރުފުޅުގެ ސަބަބުން، އަރަބި ދުނިޔޭގައިވާ އެމެރިކާގެ އެންމެ ގާތް ބައިވެރިޔާ ކަމަށްވާ ސައުދީ އާ ދެމެދު، ކުޑަކޮށްނަމަވެސް ގޯސްވެފައިވާ ގުޅުން ބަދަހި ކުރެވޭނެއެވެ.