މާލޭ މެދުޒިޔާރާތަށް ގެއްލުން ލިބެމުންދާތީ، އެތަނުގައި ހުރި ބޮޑު ގަސް ނަގަން ނިންމައިފިއެވެ.
މެދުޒިޔާރާތުގެ އާބާތުރަފިލުވުމުގެ މަސައްކަތް ކުރަމުންދާތީ ބުރާސްފަތި ދުވަހު އެމަސައްކަތްތައް ކުރިއަށްދާ ގޮތް ނޫސްވެރިންނަށް ވަނީ ދައްކާލާފައެވެ. މަސައްކަތްތަކާއި ބެހޭ ގޮތުން ނޫސްވެރިންނަށް މައުލޫމާތު ދެއްވަމުން ހެރިޓޭޖް މިނިސްޓްރީގެ ސީނިއާ އެގްޒެކަޓިވް ޑިރެކްޓަރު، މުހައްމަދު ނާޒިމް ވިދާޅުވީ މެދުޒިޔާރާތުގެ އާބާތުރަ ފިލުވުމުގެ މަސައްކަތް އަބަދުވެސް ކުރާ ކަމަށެވެ. ނަމަވެސް ކޮވިޑް-19އާ ގުޅިގެން މަސައްކަތްތައް މެދުކެނޑުނުކަން އޭނާ ފާހަގަކުރެއްވިއެވެ.
އާބާތުރަފިލުވުމުގެ މަސައްކަތަށް ގާތްގަނޑަކަށް 13 ދުވަސްވެފައިވާކަން ފާހަގަކުރައްވައި ނާޒިމް ވިދާޅުވީ ފާރު ވަށައި އުވަހާކާފައިވާ ކަމަށާއި، އިތުރަށް ރީތިކުރުމުގެ މަސައްކަތް ކުރިއަށްދާ ކަމަށެވެ.
މީގެ އިތުރުން ނާޒިމް ވިދާޅުވީ މެދުޒިޔާރާތުގައި ހުރި ބޮޑު ގަހުގެ ސަބަބުން ބޮޑެތި ގެއްލުންތަކެއް ލިބެމުންދާ ކަމަށާއި، އެތަނުގައި ހުރި ބޮޑު ދިދަ ދަނޑީގެ ބުޑުގަނޑަށް ގަހުގެ މޫތައް ވަދެފައިވާ ކަމަށެވެ. ގަސް ކަނޑާލަން ނިންމީ ކަމާބެހޭ ފަރާތްތަކާއެކު މަޝްވަރާ ކުރުމަށްފަހު ކަމަށާއި ގަހުގެ މޫތައް މުޅި މެދުޒިޔާރާތަށް ފެތުރިފައިވާތީ އެ ގަސް ނަގަން ޖެހޭނީ ބުރިބުރި ކޮށްލައިގެން ކަމަށް ވެސް ނާޒިމް ވިދާޅުވިއެވެ.
އެގޮތުން އަޅުގަނޑުމެން އީޕީއޭއާއެކު ވެސް މަޝްވަރާ ކުރިން. އެބޭފުޅުންގެ ލަފާ ވެސް ހޯދައިފިން. މިގަސް ރީލޮކޭޓް ކުރެވޭތޯ އެޗްޑީސީއާއެކު ވެސް މަޝްވަރާ ކޮށްފިން. އެބޭފުޅުންނަށް ވެސް މިކަން ކުރެވޭކަށެއް ނެތް. އަޅުގަނޑުމެން މިނިންމީ ގަސް މިތަނުން ނަގަން. އަޅުގަނޑުމެންނަށް ގަސް ނެގޭ ކަށެއް ނެތް ގަސް މިހުރި ގޮތަށް ބަހައްޓައިގެން. އަޅުގަނޑުމެން މިޖެހެނީ ބުރި ބުރިކޮށްގެން ނަގަން. އަސްލު އަޅުގަނޑުމެން ބޭނުމެއް ނުވޭ ގަސް ނަގާކަށް. ނަމަވެސް 110 އަހަރުވެފައިވާ މިފާރާއި މިމުހިންމު ބިނާ މިދަނީ މިގަހުގެ ސަބަބުން ހަލާކުވަމުން. އެހެންވީމަ އަޅުގަނޑުމެންނަށް މަޖުބޫރުވަނީ ގަސް މިތަނުން ނަގަން.ހެރިޓޭޖް މިނިސްޓްރީގެ ސީނިއާ އެގްޒެކަޓިވް ޑިރެކްޓަރު މުހައްމަދު ނާޒިމް
މެދުޒިޔާރާތުގައި ހުރި ހަކާލުވެފައިވާ ބައިތައް ބަދަލުކޮށް އާބާތުރަފިލުވުމުގެ މަސައްކަތްތައް ކުރަމުންދަނީ ސްޓެލްކޯއާއި ގުޅިގެންނެވެ. އެ މަސައްކަތް މިމަހުގެ ނިޔަލަށް ނިންމާލެވޭނެ ކަމަށް ލަފާ ކުރެވޭ ކަމަށް ނާޒިމް ވިދާޅުވިއެވެ.
މާލޭ މެދުޒިޔާރަތަކީ ރާއްޖެއަށް އިސްލާމްދީނުގެ އަލިކަން ގެނެސްދެއްވި ފާރިސްކަރައިގެ ތަބްރޭޒަށް ނިސްބަތްވެވަޑައިގަންނަވާ ޔޫސުފް ތަބްރޭޒީގެފާނު ފަސްދާނުލެވިފައިވާ ޒިޔާރަތެވެ. ތަންކޮޅެއްފަހުން އެބޭކަލަކީ މަޣުރިބުކަރައިގެ އަބުލްބަރަކާތު ޔޫސުފުލް ބަރުބަރީ ކަމަށްވެސް ބައެއް މީހުން ކިޔައެވެ. ރާއްޖެއަށް އިސްލާމްދީން ތައާރަފްވީ މީލާދީން 1153 ވަނަ އަހަރުއެވެ.
