މިނިސްޓްރީން މިހާރު މަސައްކަތްކުރަމުންދަނީ ހާލަތު ބަދަލުކޮށް، އަނިޔާވެރިކަމަށް ހުށަހެޅޭ ކުދިންގެ އަދަދު މަދުކުރުމަށް ކަމަށް މިނިސްޓަރ އޮފް ސްޓޭޓް ފޮރ ޖެންޑަރ ފެމިލީ އެންޑް ސޯޝަލް ޕްރޮޓެކްޝަން، މުހައްމަދު ޝިހާބު ވިދާޅުވެއްޖެއެވެ.

ރާއްޖެ ޓީވީގެ ފަލަސުރުޚީ ޕްރޮގްރާމްގައި ޖެންޑަރ މިނިސްޓްރީން ކުރަމުންދާ މަސައްކަތްތަކާ ގުޅޭގޮތުން ވާހަކަދައްކަވަމުން ސްޓޭޓް މިނިސްޓަރ ޝިހާބު ވަނީ ރާއްޖޭގެ އިޖުތިމާއީ ރައްކާތެރިކަން ކަށަވަރުކުރުމަށާއި ކުޑަކުދިންނާއި މުޖުތަމައުގެ އެހެން މީހުންގެ ރައްކާތެރިކަން ކަށަވަރުކުރުމަށް ކުރާނެ އަދި ކުރަމުންދާ މަސައްކަތްތަކަށް އަލިއަޅުއްވާލައްވާފައެވެ. އެގޮތުން ޕްރޮގްރާމްގައި ވާހަކަދައްކަވަމުން ޝިހާބު ވަނީ ކުރިއަށް މިއޮތް ދެ އަހަރުގެ ތެރޭގައި މިނިސްޓްރީން ކުރަމުންދާ މަސައްކަތްތަކުގެ ނަތީޖާ ވަރަށް ރަނގަޅަށް ފެންނާނެ ކަމަށް ވިދާޅުވެފައެވެ. އަދި މި މަސައްކަތްތަކާ އެކު އެތައް ބައެއްގެ ދިރިއުޅުމަށް ރަނގަޅު ބަދަލުތަކެއް އަންނާނެ ކަމަށް ވިދާޅުވިއެވެ.

ޝިހާބު ވަނީ މާލޭގައި މިވަގުތު ވެސް އާއިލާ އާއި މައިންބަފައިންނާ ދުރުގައި ދިރިއުޅެމުންދާ 18 އަހަރުން ދަށުގެ ކުޑަކުދިންގެ އަދަދު ވަރަށް ބޮޑު ކަމަށާއި، 15 އަހަރާ 24 އަހަރުގެ އުމުރުފުރާގެ ގިނަ އަދަދެއްގެ ބަޔަކު މަގުމަތީގައި ގިނަ ވަގުތުތައް ހޭދަކުރަމުންދާއިރު، ކުޑަކުދިންނަށް އަނިޔާވެރިކަމާއި ކުރިމަތިލާން ޖެހޭ ކަމަށާއި އެތައް ކުދިންނެއް މިފަދަ ނޭދެވޭ ކަންކަމަށް ހުށަހެޅިގެންދާނަކަމަށް ވިދާޅުވެފައެވެ. މިއީ ގައުމުގެ މިހާރުގެ ހާލަތު ކަމަށާއި މިހާލަތު ބަދަލު ނުކުރެވުނު ނަމަވެސް ކުދިންނަށް ލިބެންޖެހޭ އިޖުތިމާއީ ރައްކާތެރިކަން ކަށަވަރުކުރުމަށް ކުރަންޖެހޭ މަސައްކަތްތައް މިނިސްޓްރީން ދަނީ ކެނޑިނޭޅި ކުރަމުން ކަމަށް ޝިހާބު ވިދާޅުވިއެވެ.

މީގެ އިތުރުން ޕްރޮގްރާމްގައި ވާހަކަދައްކަވަމުން ޝިހާބު ވަނީ ކުޑަކުދިންނާއި އުމުރުން ދުވަސްވީ މީހުންނާ ގުޅޭ ކޭސްތައް މީޑިއާތަކުން ރިޕޯޓު ކުރާއިރު އެމީހުންގެ ކަރާމާތަށް އަސަރު ނުކުރާނެހެން ރިޕޯޓުކުރުމަށް އެދިފައެވެ.