ރައްޔިތުންގެ މަޖިލީހުން މިހާރު ކުރާނެ މަސައްކަތެއް ނެތްކަމަށް ރިޔާސަތުން ވިދާޅުވި ނަމަވެސް މިހާރުވެސް 2 ބިލެއް އެމްޑީޕީގެ ޕީޖީއަށް ފޮނުވާފައިވާނެ ކަމަށް ރައީސް އޮފީހުގެ ތަރުޖަމާނު މަބްރޫކް ޢަޒީޒު ވިދާޅުވެއްޖެއެވެ.
މަބްރޫކް ވިދާޅުވީ ފުޑް ސެކިއުރީޓީއާ ގުޅުން ހުރި ބިލަކާއި، އިލެކްޓްރޯނިކް މުޢާމަލާތްތަކާ ބެހޭ ބިލު، މިހާރުވެސް އެމްޑީޕީގެ ޕީޖީއަށް ފޮނުވާފައިވާނެ ކަމަށެވެ. ރައްޔިތުންގެ މަޖިލީހުގެ މި އަހަރު ތިންވަނަ ދައުރުގެ ދެވަނަ ޖަލްސާގައި ރިޔާތުގައި އިންނެވި މަޖިލީހުގެ ނައިބު ރައީސް އީވާ ޢަބްދުﷲ ވިދާޅުވީ، މަޖިލީހުގެ ބަހުސް މަރުހަލާގައި މިހާރު އޮތީ، ދެ ބިލެއްގެ މަސައްކަތް އެކަނި ކަމަށެވެ. ބަހުސް މަސައްކަތް ފެށޭނީ ސަރުކާރުގެ ލެޖިސްލޭޓިވް އެޖެންޑާގެ ދަށުން ފޮނުވަން ޖެހޭ ބިލުތައް މަޖިލީހަށް ހުށަހެޅުއްވުމުން ކަމަށެވެ. ދެވަނަ ދައުރު ނިމުނުއިރު ބަހުސް މަރުހަލާގައި ހުރި ބިލުތައް ނިންމާފައިވާ ކަމަށާއި، ދެން ކުރަން އޮތީ ކޮމިޓީ މަރުހަލާގެ މަސައްކަތް ކަމަށް ވިދާޅުވިއެވެ.
ސަރުކާރުން މި ދައުރަށް ހުށަހަޅުއްވަން ނިންމަވާފައިވާ 32 ބިލެއްގެ ލިސްޓް މަޖިލީހަށް ލިބިފައިވީ ނަމަވެސް އެ ބިލުތައް ތަޅުމަށް ނާންނަ ކަމަށް އީވާ ވިދާޅުވިއެވެ. ރާއްޖެއެމްވީއަށް މަބްރޫކް ވިދާޅުވީ މަޖިލީހުގެ މިދައުރަށް ސަރުކާރުން ހުށަހަޅަން ބޭނުންވާ ބިލްތަކުގެ ތެރެއިން ކާބޯތަކެތީގެ ރައްކާތެރިކަމުގެ ބިލާއި އިލެކްޓްރޯނިކް މުޢާމަލާތްތަކާ ބެހޭ ބިލު މަޖިލީހުގެ ތަޅުމަށް ހުށަހެޅުމަށް އެމްޑީޕީގެ ޕީޖީ ގްރޫޕަށް ފޮނުވާފައިވާނެ ކަަމަށެވެ.
- ހެއްކާ ބެހޭ ބިލު،
- ކާބޯތަކެތީގެ ރައްކާތެރިކަމުގެ ބިލު،
- އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނިމުގެ ބިލު،
- ގިންތި ކަނޑައެޅުމާއި ދަރަޖަ ކުރުމުގެ ބިލު،
- ޓެރަރިޒަމް މަނާ ކުރުމުގެ ގާނޫނަށް އިތުރު އިސްލާހެއް ގެނައުމުގެ ބިލު،
- ގާނޫނުލް އުގޫބާތަށް އިސްލާހު ގެނައުމުގެ ބިލު،
- މޯލްޑިވްސް މީޑިއާ އެންޑް މީޑިއާ އޮތޯރިޓީގެ ބިލު،
- މޯލްޑިވްސް ހެލް ސަރވިސަސްގެ ބިލު،
- ސިއްޙީ ޚިދުމަތް ދިނުމުގެ ގާނޫނަށް އިސްލާހު ގެނައުމުގެ ބިލު،
- މަސްތުވާ ތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލު،
- ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތްކުރުމުގެ ގާނޫނަށް އިސްލާހު ގެނައުމުގެ ބިލު،
- ޙައްޖާއި ޢުމްރާގެ ކަންކަން އިންތިޒާމުކުރުމާ ބެހޭ ބިލު،
- ފަނޑިޔާރުންގެ ގާނޫނަށް އިސްލާހު ގެނައުމުގެ ބިލު،
- ކޯޓުތަކުގެ ގާނޫނަށް އިސްލާހު ގެނައުމުގެ ބިލު،
- ގާނޫނީ އެހީތެރިކަން ފޯރުކޮށްދިނުމުގެ ބިލު،
- ޑިޕްލޮމެޓިކް އިމްތިޔާޒުގެ ބިލް،
- ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި،
- މާލީ އެހީތެރިކަން ފޯރުކޮށްދިނުމުގެ ގާނޫނަށް އިސްލާހު ގެނައުމުގެ ބިލު،
- އިޖުތިމާޢީ މަސައްކަތްތެރިންގެ ބިލު، ދައުލަތުގެ މުސާރައާއި ޢިނާޔަތަށް އިސްލާހު ގެނައުމުގެ ބިލު،
- ފޮއިން އިންވެސްޓްމެންޓްގެ ބިލު،
- އިލެކްޓްރޯނިކް މުޢާމަލާތްތަކާ ބެހޭ ބިލު،
- ކުންފުނީގެ ބިލު،
- ޓްރޭޑް މާރކްގެ ބިލު،
- އަމިއްލަ ފަރުދުންގެ ގާނޫނަށް އިސްލާހު ގެނައުމުގެ ބިލު،
- މަސައްކަތު މާހައުލުގެ ސަލާމަތާއި ރައްކާތެރިކަމުގެ ބިލު،
- އިންޑަސްޓްރިއަލް ރިލޭޝަންގެ ބިލު،
- މަދަނީ ވައިގެ ދަތުރުފަތުރުގެ ބިލު،
- ނެތި ދިއުމުގެ ބިރު ހީވެފައިވާ ދިރޭ ތަކެތީގެ ވިޔަފާރި ކުރުމުގެ ބިލު،
- ކުނި މެނޭޖް ކުރުމާ ބެހޭ ބިލު،
- ފެނާއި ނަރުދަމާގެ ގާނޫނަށް އިސްލާހު ގެނައުމުގެ ބިލު،
- ކްލައިމްޓް އިމަރޖެންސީ ގާނޫނަށް އިސްލާހު ގެނައުމުގެ ބިލު،
- ދިވެހި ރާއްޖޭގެ ގައުމީ ބަހަށް އިސްލާހު ގެނައުމުގެ ބިލު
ރައްޔިތުންގެ މަޖިލީހުގެ ގަވާއިދުގެ 82 ވަނަ މާއްދާގެ (ރ)ގައި ބުނެފައިވަނީ މަޖިލީހުގެ ކޮންމެ ދައުރެއް ފެށުމާއެކު ސަރުކާރުގެ ފަރާތުން އެދައުރަކަށް ހުށަހަޅަން ހުރި ބިލުތަކުގެ ލިސްޓެއް ސަރުކާރުން މަޖިލީހުގެ ރައީސަށް ފޮނުވަންވާނެއެވެ. އަދި އެ ލިސްޓު ލިބުމުން މަޖިލީހުގެ ރައީސް ހުރިހާ މެންބަރުންނަށް އެލިސްޓު ފޮނުވަންވާނެ ކަަމަށެވެ. ނަމަވެސްް، މަޖިލީހުގެ މެޖޯރިޓީ ލީޑަރާއި މައިނޯރިޓީ ލީޑަރާ މަޝްވަރާކުރުމަށްފަހު ސަރުކާރުގެ ފަރާތުންް މަޖިލީހަށް ހުށަހެޅުމަށްް ފޮނުވާ އެނޫން ބިލުތައް މަޖިލީހުގެ އެދައުރަށް އެޖެންޑާކުރުމަކަށް މިމާއްދާ ހުރަހެއް ނާޅާކަމަށްވެސް ބުނެފައިވެއެވެ.
