ޠާލިބާނުގެ ހަނގުރާމަވެރިން އަފްޣާނިސްތާނުގެ ވެރިރަށް ކާބުލްއަށް އަރައި، ކާބުލްގައި ހުންނަ އެ ޤައުމުގެ ރިޔާސީ ގަނޑުވަރުވެސް އެޖަމާޢަތުގެ ބާރުގެ ދަށަށް ގެންގޮސްފިއެވެ.
ބީބީސީގައި ރިޕޯޓު ކޮށްފައިވާ ގޮތުން އާދީއްތަ ދުވަހުގެ ވަގުތެއްގައި ޠާލިބާނުން ވަނީ އަފްޣާނިސްތާނުގެ މައި ރިޔާސީ ގަނޑުވަރަށް ވަދެ، އެތަން އެމީހުންގެ ބާރުގެ ދަށަށް ގެންގޮސްފައެވެ. އެޤައުމުގެ ރައީސް އަޝްރަފް ޣަނީ ވަނީ އޭގެ ކުރިން އެ ޤައުމު ދޫކުރައްވައި ތަޖިކިސްތާނަށް ވަޑައިގެންފައެވެ.
ރިޕޯޓުތައް ބުނާގޮތުން ޠާލިބާނުން ވަނީ ބާރުތައް ބަދަލު ކުރުމުގެ މަރުޙަލާގައި ޣަނީވެސް ބައިވެރިވެވަޑައިގެން އެކަމަށް އެއްބާރުލުން ދެއްވުމަށް ޑިމާންޑް ކޮށްފައެވެ. ނަމަވެސް ބަދަލުގައި ޣަނީގެ އިތުރުން އޭނާގެ އެންމެ އަރިސް ބޭފުޅުންވެސް ވަނީ ޤައުމު ދޫކުރައްވައި ވަޑައިގެންފައެވެ.
އަފްޣާނިސްތާނުގެ ރިޔާސީ ގަނޑުވަރު ޠާލިބާނުންގެ ބާރުގެ ދަށަށް ގެންގޮސްފައިވާކަން އެޖަމާޢަތުގެ އޮފިޝަލުން ވަނީ ރޮއިޓަރސްއަށް ކަށަވަރު ކޮށްދީފައެވެ. ނަމަވެސް އަފްޣާން ސަރުކާރުގެ ރަސްމީ ބަހެއް އެކަމުގައި ލިބިފައިނުވާކަމަށް ރިޕޯޓުތައް ބުނެއެވެ.
ކާބުލްގެ ބައެއް ސަރަޙައްދުތަކުގައި ހަމަނުޖެހުންތަކެއްވެސް ހިންގާފައިވާއިރު، އެ ހަމަނުޖެހުންތަކުގައި 40ށް ވުރެ ގިނަ މީހުން މިހާތަނަށް ހޮސްޕިޓަލަށް ގެންދެވިފައިވާކަމަށް ބީބީސީގައި ރިޕޯޓު ކޮށްފައިވެއެވެ. އަދި ކުރިއަށް އޮތް ތަނުގައި މި އަދަދު އިތުރުވާނެކަމަށް މަސްރަޙު ދިރާސާކުރާ ފަރާތްތަކުން ވަނީ އަންދާޒާ ކޮށްފައެވެ.
