އަފްގާނިސްތާނުގައި ޙަރަކާތްތެރިވަމުންދާ ތާލިބާނުގެ ހަނގުރާމަވެރިން ވަށާލާފައިވާ ކާބުލް ސިޓީގެ މައި އެއަރޕޯޓުގައިވެސް ބަޑީގެ ޙަމަލާތަކެއް ދީފިއެވެ.
އެމެރިކާގެ އެމްބަސީން ނެރުނު އެލަރޓަކާއި ޙަވާލާދީ ބީބީސީގައި ރިޕޯޓުކޮށްފައިވާ ގޮތުން ކާބުލް އެއަރޕޯޓުގައި ބަޑީގެ ޙަމަލާތަކެއް ދީފައިވާއިރު، އެކަމާ ގުޅިގެން މިވަގުތު ވަނީ ސެކިއުރިޓީ އެލަރޓެއް ނެރިފައެވެ. އޮފިޝަލުން ވަނީ އެ ޤައުމުގައި ދިރިއުޅޭ އެމެރިކާގެ ރައްޔިތުން ވީހާވެސް އަވަހަށް ރައްކާތެރިކަން ހޯދުމަށް އެދިފައެވެ. އަދި ކާބުލްގެ ސެކިއުރިޓީ ޙާލަތު ކޮންމެ ވަގުތެއްގައިވެސް ބަދަލުވެދާނެ ކަމުގެ އިންޒާރު އެމެރިކާއިން ވަނީ ދީފައެވެ.
އޭގެ އިތުރުން، ކާބުލްއިން ނުކުންނަން ބޭނުންވާ އެއްވެސް އެމެރިކާ ރައްޔިތެއް ހުރިނަމަ ވީހާވެސް އަވަހަށް އޮންލައިންކޮށް ރަޖިސްޓަރ ކުރުމަށް ވަނީ އެދިފައެވެ.
އަފްގާނިސްތާނުގެ ޙާލަތު ގޯސްވެފައިވާއިރު، އެ ޤައުމުގެ ރައީސް އަޝްރަފް ޢަނީވެސް ވަނީ ޤައުމު ދޫކުރައްވައި ވަޑައިގެންފައެވެ. އެކަމާ ގުޅިގެން ގިނަ ބައެއްގެ ފާޑުކިއުންވެސް ވަނީ ޢަނީއަށް އަމާޒުވެފައެވެ. ރިޕޯޓުތައް ބުނާގޮތުން ޢަނީ ވަޑައިގެންނެވީ ތަޖިކިސްތާނަށެވެ.
ބީބީސީގެ ނޫސްވެރިއެއް ކަމަށްވާ ޔަލްދާ ޙަކީމްއާ ޙަވާލާދީ އެ ނޫހުގެ ލައިވް ބްލޮގްގައި ރިޕޯޓު ކޮށްފައިވާ ގޮތުން ތާލިބާނުންގެ އޮފިޝަލަކު ވަނީ އަފްގާނިސްތާނުގެ ރައްޔިތުންނާއި އެމީހުންގެ މުދަލަށް ގެއްލުމެއް ނުދޭނެކަމަށް ބުނެފައެވެ. އަދި ތާލިބާނުންނަކީ ރައްޔިތުންނަށް ޚިދުމަތް ކޮށްދޭނެ ބައެއްކަމަށް އޭނާ ވަނީ ބުނެފައެވެ.
