އޯގަސްޓް 9ން ފެށިގެން މާލެ ސަހައްދުގައި އެޕޮއިންޓްމަންޓާއި ނުލައި އެސްޓްރަޒެނެކާ ވެކްސިން ޖެހޭނެކަމަށް ހެލްތް ޕްރޮޓެކްޝަން އޭޖެންސީ، އެޗްޕީއޭއިން ހާމަކޮށްފިއެވެ.

އެޗްޕީއޭއިން ވަނީ މީގެ ކުރިން އެޕޮއިންޓްމަންޓް އުސޫލުން އެސްޓްރަޒެނެކާގެ ވެކްސިންޖެހުމަށް ޚާއްސަކޮށްފައިވާ މަރުކަޒުތަކުން ހޯމަ ދުވަހުން ފެށިގެން އެޕޮއިންޓްމަންޓާއި ނުލައި ވެކްސިންޖެހޭނެކަމަށް ބުނެފައެވެ. މި ސެންޓަރުތަކުގެ ތެރޭގައި ހިމެނެނީ ސޯޝަލް ސެންޓަރ، އިސްލާމީ މަރުކަޒު، ގައުމީ ކުތުބުޚާނާ އަދި ވިލިމާލެ ހޮސްޕިޓަލެވެ. މިގޮތަށް ބަދަލު ގެނައިކަމުގައިވީނަމަވެސް، ވެކްސިން ޖެހުމަށް މިހާތަނަށް އެޕޮއިންޓްމަންޓް ހަދާފައިވާ މީހުންނަށް އިސްކަންދޭނެކަމަށް އެޗްޕީއޭއިން ބުނެއެވެ.

މާލެ ސަރަހައްދުގައި އެސްޓްރަޒެނެކާ ވެކްސިން ޖެހުމަށް އެޕޮއިންޓްމަންޓް ދޫކުރަން ފަށައިފައިވަނީ ޖުލައި މަހުގެ 31 ވަނަ ދުވަހު ފެށި ވެކްސިން ކެމްޕޭންގެ ފަހުބުރު ފެށުމަށް ޖުލައި 29ވަނަ ދުވަހުއެވެ. ޖުލައި 31ގައި މި ކެމްޕޭނުގެ ފަހު ބުރުގައި މާލެ ސަރަހައްދުގައި އެސްޓްރަޒެނެކާ ވެކްސިން ޖަހަން ފަށާފައިވާއިރު، ވެކްސިންގެ ފުރަތަމަ ޑޯޒް އަދި ދެވަނަ ޑޯޒް ޖެހުމަށްވެސް އެޕޮއިންޓްމަންޓް ވަނީ ދޫކޮށްފައެވެ.

ވެކްސިން ޖެހުމަށް އެޕޮއިންޓްމަންޓް ހައްދަމުންދިޔަ އެޗްޕީއޭގެ ޕޯޓަލް މިއާއެކު ބަންދުވާނެކަމަށް އެޗްޕީއޭއިން ބުނެއެވެ. ވެކްސިން ނުޖަހާ މީހުންނަށް ބައެއް ޚިދުމަތްތައް ލިބިގަތުމުގައި ހުރަސްތަކެއް މިހާރު ވަނީ ކުރިމަތިކޮށްފައެވެ. އެގޮތުން ސެޕްޓެމްބަރު 1 ވަނަ ދުވަހުގެ ފަހުން, ވެކްސިން ނުޖަހައި ދަތުރުކުރާ ފަރާތްތަކުގެ ރިލީޒް ސާމްޕަލް ދެން ހިލޭ ހަދައި ނުދޭނެ ކަމަށް އެޗްއީއޯސީން ވަނީ ބުނެފައެވެ. އަދި ވެކްސިން ނުޖަހާ މީހުންނަށް އެތެރޭގެ އުދުހުންތަކުން ވެސް ދަތުރުނުކުރެވޭ ގޮތަށް ނިންމުމަށް ސަރުކާރުން މަޝްވަރާތައް ފަށާފައިވާއިރު، ވެކްސިންގެ އެއްވެސް ޑޯޒެއް ނުޖަހާ ތިބި މީހުންނަށް ކެފޭ ރެސްޓޯރެންޓުތަކުން ޚިދުމަތް ނުދިނުމަށްވެސް ސަރުކާރުން ވަނީ ނިންމާފައެވެ.