ޕޯޗުގަލްގެ ކެޕްޓަން އަދި ރެއާލް މެޑްރިޑްގެ ތަރި ކްރިސްޓިއާނޯ ރޮނާލްޑޯއަކީ ފުޓުބޯޅައިގެ ތާރީހުގައިވެސް ދެކުނު އެންމެ މޮޅު އެއް ކުޅުންތެރިޔާ ކަމަށާއި، ނަމަވެސް އޭނާގެ ނަޒަރުގައި ލިއޮނަލް މެސީ އެއަށްވުރެވެސް މޮޅުކަމަށް، ސްޕެއިން ގައުމީ ޓީމު އަދި ބާސެލޯނާގެ ކުރީގެ ކެޕްޓަން ޕުޔޯލް ބުނެފިއެވެ.

އިންޑިއާގައި ބޭއްވުމަށް ހަމަޖެހިފައިވާ 17 އަހަރުން ދާށުގެ ފީފާ ވޯލްޑް ކަޕްގެ ރިޕޯޓަރުންނާއި ވާހަކަ ދައްކަމުން ޕުޔޯލް ބުނީ، ފެށުނީއްސުރެވެސް ރޮނާލްޑޯ އާއި މެސީގެ ކުޅުމާއި މެދު ގިނަ ފަރާތްތަކެއްގެ މެދުގައި ވާދަވެރި، ބޮޑު ބަހުސެއް ކުރެވެމުން އަންނަ ކަމަށާއި، އޭނާ ދެކޭގޮތުގައި އެއީ އެ ދެކުޅުންތެރިން ކުރި އަރައިގެން ދާން ލިބުނު ބޮޑު ހިތްވަރެއް ކަމުގައި ދެކޭކަމަށެވެ.

ޕުޔޯލް ބުނީ، އޭނާ ދެކޭ ގޮތުގައި މެސީ އަކީ އެންމެ މޮޅު ކުޅުންތެރިޔާ ކަމަށާއި، މެސީ ވަނީ އޭނާއަށް ފުޓުބޯޅައިން އެތައް ގިނަ އުފާތަކެއް ހޯދައިދީފައި ކަމަށެވެ. އަދި މެސީ އާއި އެކު ކުޅުނު އިރާއި ފާއިތުވި 10 އަހަރުގައިވެސް މެސީ އަންނަނީ އަހަރަކަށްވުރެ އަހަރެއް ކުރިއަރަމުން ކަމަށް ޕުޔޯލް ވަނީ ބުނެފައެވެ.

ޕުޔޯލް ބުނީ، އޭނާ އެންމެ ދެކެން ބޭނުންވަނީ މެސީ ގައުމީ ޓީމާއިއެކު ރަން ކާމިޔާބީއެއް ހާސިލްކުރާ ދުވަސް ކަމަށާއި، ކުލަބު ލެވެލް އާއި އިންޑިވިޖުއަލް ކާމިޔާބީތަކަށް ބަލާއިރު މެސީއަށް ދެވެން އޮތް އެންމެ ފުރިހަމަ ލެވެލްއަށް އޭނާ ގޮސްފި ކަމަށެވެ.

2008 ވަނަ އަހަރުން ފެށިގެން މިހާތަނަށް މެސީ އަދި ރޮނާލްޑޯ ފިޔަވާ އެހެން ކުޅުންތެރިއަކަށް ދުނިޔޭގެ އެންމެ މޮޅު ކުޅުންތެރިޔާގެ މަގާމް ލިބިފައި ނުވާއިރު، މިހާތަނަށް މި ދެ ކުޅުންތެރިން އެކުގައި 9 ބެލެންޑިއޯ ވަނީ ހޯދާފައެވެ. އޭގެ ތެރެއިން 4 ފަހަރު ރޮނަލްޑޯ، ބެލެންޑިއޯ ހޯދާފައި ވާއިރު އަނެއް 5 ފަހަރު މި މަގާމް ހޯދާފައިވަނީ މެސީއެވެ.