ކޮވިޑް-19ގެ ކުރިން ރާއްޖޭގައި ހުރި ޓޫރިސްޓު އެނދުތަކުގެ 90 އިންސައްތަ އެނދު މިވަގުތު އޮޕަރޭޓްކުރަމުންދާކަމަށް ޓޫރިޒަމް މިނިސްޓްރީން ބުނެފިއެވެ.

ޓޫރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތައް ދައްކާގޮތުން މި ހިނގާ އޮގަސްޓު މަހުގެ 1 ވަނަ ދުވަހުގެ ނިޔަލަށް 747 ޓޫރިސްޓު އެކޮމޮޑޭޝަން ފެސިލިޓީއެއްގައި 48،794 އެނދު ގެންދަނީ އޮޕަރޭޓްކުރަމުންނެވެ. ކޮވިޑް-19ގެ ހާލަތުގެ ކުރިން 1،036 ޓޫރިސްޓު އެކޮމޮޑޭޝަން ފެސިލިޓީއެއްގައި 54،284 އެނދު ގެންދިޔައީ އޮޕަރޭޓްކުރަމުންނެވެ.

މިވަގުތު އެންމެ ގިނަ އެނދު އޮޕަރޭޓްކުރަމުންގެންދަނީ ރިސޯޓުތަކުގައެވެ. 155 ރިސޯޓެއް މިވަގުތު ޚިދުމަތަށް ހުޅުވާލާފައިވާއިރު، 36،672 އެނދު އޮޕަރޭޓްކުރަމުންދާކަމަށް ޓޫރިޒަމް މިނިސްޓްރީން ބުނެފައިވެއެވެ. ކޮވިޑް-19ގެ ހާލަތުގެ ކުރިން 163 ރިސޯޓެއްގައި 38،394 އެނދު އޮޕަރޭޓްކުރަމުން ގެންގޮސްފައިވެއެވެ.

މިވަގުތު 442 ގެސްޓްހައުސްއެއް ހިންގަމުންދާއިރު، ގެސްޓްހައުސްތަކުގައި 8،014 އެނދު އޮޕަރޭޓްކުރަމުންދާކަމަށް ޓޫރިޒަމް މިނިސްޓްރީން ބުނެފައިވެއެވެ. އެގޮތުން 18 އަތޮޅެއްގެ 58 ރަށެއްގައި މިވަގުތު ގެސްޓްހައުސް ހިންގަމުންދާކަމަށް ޓޫރިޒަމް މިނިސްޓްރީން ބުނެފައިވެއެވެ. ކޮވިޑުގެ ހާލަތުގެ ކުރިން 702 ގެސްޓްހައުސްއެއްގައި 11،376 އެނދު ގެންދިޔައީ އޮޕަރޭޓްކުރަމުންނެވެ.

މީގެ އިތުރުން 140 ސަފާރީއެއްގައި 2،748 އެނދު އޮޕަރޭޓްކުރަމުންދާއިރު، ކޮވިޑް-19 ގެ ހާލަތުގެ ކުރިން 160 ސަފާރީއެއް ރާއްޖޭގައި އޮޕަރޭޓްކޮށްފައިވެއެވެ. އަދި 2،986 އެނދު އޮޕަރޭޓްކޮށްފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ. 10 ހޮޓެލެއްގައި 1،360 އެނދު އޮޮޕަރޭޓްކުރަމުންދާއިރު، ކޮވިޑްގެ ހާލަތުގެ ކުރިން 11 ހޮޓެލެއްގައި 1،528 އެނދު އޮޕަރޭޓްކުރަމުން ގެންދިޔައެވެ.

މިދިޔަ އަހަރުގެ ޖުލައި 15ގައި ރާއްޖޭގެ ބޯޑަރު ބަންދުކުރުމަށްފަހު އަލުން ހުޅުވާލިފަހުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދުވަހަކަށްވުރެ ދުވަހެއް އަންނަނީ އިތުރުވަމުންނެވެ. މިދިޔަ އަހަރު ނިމުނުއިރު 555،494 ފަތުރުވެރިން ރާއްޖެ ޒިޔާރަތްކޮށްފައިވާއިރު، މި އަހަރުގެ މިހާތަނަށް 617،791 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.

މިއާއެކު ސަރުކާރުން އަމާޒުހިފާފައިވާގޮތަށް މި އަހަރު ނިމުމުގެ ކުރިން ރާއްޖޭގެ ފަތުރުވެރިކަން ރަނގަޅުވެގެންދާނެ ކަމުގެ އުންމީދު އައު ވެފައިވާކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް މީގެ ކުރިން ވަނީ ވިދާޅުވެފައެވެ.