ރިޒް ކާލްޓަން ރިސޯޓްގެ ވޯޓާ ވިލާއެއްގައި ހިނގި އަލިފާނުގެ ހާދިސާގައި އަލިފާން ރޯވެފައިވަނީ ވޯޓަރ ވިލާއެއްގެ ފަންގިފިލާއެއްގައި ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ބުނެފިއެވެ.

ކ.އަތޮޅު ގަމަރުގިރި ކައިރީގައި އޮންނަ ރިޒް ކާލްޓަން ރިސޯޓް އެންޑް ސްޕާގައި އަލިފާނުގެ ހާދިސާއެއް ހިނގައިގެން އުޅޭ ކަމުގެ މައުލޫމާތު އެމްއެންޑީއެފްގެ ފަޔަރ އެންޑް ރެސްކިއު ސަރވިސްއަށް ލިބިފައިވަނީ މެންދުރު 12:29 އެހާ އިރުކަމަށް އެމްއެންޑީއެފުން ބުނެއެވެ. އެމްއެންޑީއެފް ފަޔަރ އެންޑް ރެސްކިއު ސަރވިސްއަށް މި މައުލޫމާތު ލިބުމާއެކު ޓީމް އެލާޓަށް ގެނެސްފައިވެއެވެ.

އެކަމުގެ މައުލޫމާތު ހިއްސާކޮށް އެމްއެންޑީއެފުން ބުނީ، އަލިފާން ހިފާފައިވަނީ ވޯޓަރ ވިލާއެއްގެ ފަންގިފިލާއަކާއި ފާޚާނާއެއްގައި ކަމަށެވެ. އަލިފާނުގެ ސަބަބުން އެކިވަރުގެ ގެއްލުންތައް ލިބިފައިވާކަމަށް އެމްއެންޑީއެފުން މައުލޫމާތު ދެއެވެ. މި އަލިފާން ނިވާލާފައިވަނީ ރިސޯޓުގެ މުވައްޒަފުން ގުޅިގެން ކުރި މަސައްކަތުންނެވެ.

މި ހާދިސާގައި މީހަކަށް އަނިޔާވިކަމުގެ ރިޕޯޓެއް އަދި ލިބިފައި ނުވާކަމަށް އެމްއެންޑީއެފުން މައުލޫމާތު ދެއެވެ.