އަންހެނުންގެ ކޮމިޓީގެ އިތުރު 3 ދާއިރާއެއްގެ އިންތިޚާބު ސެޕްޓެމްބަރުގައި ބޭއްވުމަށް ނިންމައިފިއެވެ.

އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި، އިންތިޚާބު ނުކުރެވޭ އެއް ދާއިރާއާއި އިންތިޚާބުވި ފަހުން މަގާމުން އިސްތިއުފާދިން 2 ދާއިރާއެއްގެ ބައި އިލެކްޝަން ސެޕްޓެމްބަރު މަހުގެ 11 ވަނަ ދުވަހު އޮންނާނެ ކަމަށް އިލެކްޝަނުން ބުނެއެވެ.

އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި އިންތިޚާބުނުކުރެވޭ ދާއިރާތަކުގެ ތެރެއިން 5 ދާއިރާއެއްގެ އިންތިޚާބު އޮގަސްޓް މަހުގެ 7 ވަނަ ދުވަހު ބޭއްވުމަށް ވެސް ވަނީ ނިންމާފައެވެ.

އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ތެރެއިން ސެޕްޓެމްބަރު މަހުގެ 11 ވަނަ ދުވަހު އިންތިޚާބު ބޭއްވުމަށް ނިންމާފައިވަނީ ހދ. ނޭކުރެންދޫ، ނ. ކެނދިކުޅުދޫ އަދި ރ. މަޑުއްވަރީގައެވެ. މި 3 ދާއިރާގެ ތެރެއިން ހދ. ނޭކުރެންދޫގައި އަންނަ މަހުގެ 7 ވަނަ ދުވަހު ވެސް އިންތިޚާބު އޮންނާނެއެވެ. ނޭކުރެންދޫގައި އިތުރު ގޮނޑިއެއް ހުސްވެފައިވަނީ، ކޮމެޓީއަށް އިންތިޚާބުވި މެމްބަރަކު މަގާމުން އިސްތިއުފާ ދިނުމާ ގުޅިގެންނެވެ. ކެނދިކުޅުދޫގައާއި، މަޑުއްވަރީގައި ވެސް އިންތިޚާބު ބޭއްވުމަށް ނިންމާފައިވަނީ، އެ ދެ ރަށުގެ ކޮމެޓީތަކަށް އިންތިޚާބުވި އެއް މެމްބަރަކު އިސްތިއުފާ ދިނުމާ ގުޅިގެންނެވެ.

އަންނަ މަހުގެ 7 ވަނަ ދުވަހު އިންތިޚާބު ބޭއްވުމަށް ހަމަޖެހިފައިވާ 5 ދާއިރާއެއްގެ ފައިނަލް ވޯޓާސް ލިސްޓު މިހާރު އެކުލަވާލަމުން އަންނައިރު، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގައި، އިންތިޚާބު ނުކުރެވޭ 10 ދާއިރާގެ ތެރެއިން 5 ދާއިރާއެއްގައި ކަނޑައެޅިފައިވާ އަދަދަށް މެމްބަރުން ކުރިމަތިލުމުން އެ މެމްބަރުން ވަނީ އިންތިޚާބަކާ ނުލައި، ހޮވިފައެވެ.