މި އަހަރު ނިމޭ އިރު އިރާގުގައި ހަރަކާތްތެރިވާ އެމެރިކާ ސިފައިން އެގައުމުން ފައިބާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ.
އެމެރިކާގެ ރައީސް ޖޯ ބައިޑެން މިހެން ވިދާޅުވެފައި ވަނީ އިރާގުގެ ބޮޑުވަޒީރު މުސްތަފާ އަލް ކަދީމީ އެމެރިކާއަށް ކުރެއްވި ދަތުރުފުޅުގައި ދެ ބޭފުޅުން ބައްދަލުކުރައްވައި ދެއްކެވި ވާހަކަތަކުގެ ތެރޭގައެވެ. އެ ބައްދަލުވުމުގައި ދެގައުމުގެ ގުޅުމާ ގުޅޭ ގިނަ ކަންތައްތަކަކާ ގުޅޭ ގޮތުން ރައީސް ބައިޑަން އާއި ބޮޑުވަޒީރު މުސްތަފާ ވަނީ މަޝްވަރާކުރައްވާފައެވެ.
މި މަޝްވަރާތަކުގެ ތެރޭގައި އިރާގުގައި މިހާރު ހަރަކާތްތެރިވާ 2500 އެއްހާ ސިފައިން މި އަހަރު ނިމޭ އިރު އެ ގައުމުން ފޭބުމާ ގުޅޭގޮތުން ވަނީ މަޝްވަރާކުރައްވާފައެވެ. އެގޮތުން ބޮޑުވަޒީރު މުސްތަފާ ވަނީ މިހާރު އިރާގުގައި އެމެރިކާ ސިފައިން ހަރަކާތްތެރިވުން މުހިންމު ނޫން ކަމަށް ވިދާޅުވެފައެވެ.
ރައީސް ބައިޑެން ވަނީ އެމެރިކާގެ ސިފައިން އިރާގުން ފޭބި ނަމަވެސް އިރާގުގެ ސިފައިންނަށް ހާއްސަ ޓްރެއިނިން ޕްރޮގުރާމްތައް ކުރިއަށް ގެންދާނެ ކަމަށާއި އައިއެސްއާ ދެކޮޅަށް އިރާގުގެ ސަރުކާރުން ކުރަމުންދާ ހަނގުރާމާގައި އެހީތެރިކަން ފޯރުކޮށްދޭނެ ކަމަށް ވިދާޅުވެފައެވެ.
2016 ވަނަ އަހަރު އެމެރިކާގެ ކުރީގެ ރައީސް ޑޮނަލްޑް ޓްރަމްޕް ރައީސް ކަމަށް އައުމަށް ކެމްޕެއިން ކުރެއްވިއިރު ވިދާޅުވެފައިވަނީ އެމެރިކާ ސިފައިން އެކި ގައުމުތަކުގައި ތިބެގެން ކުރިޔަށްގެންދާ ހަނގުރާމަތައް ނިމުމަކަށް ގެންނަވާނެ ކަމަށެވެ. އެހެންނަމަވެސް އަފްޣާނިސްތާން، އިރާގު، ސީރިޔާ ފަދަ ގައުމުތަކުގައި އަދިވެސް މަދުން ނަމަވެސް އެމެރިކާ ސިފައިން އެބަ ތިއްބެވެ.
މިދިޔަ މަހު އިރާގުގެ ބޮޑުވަޒީރާއެކު ބޭއްވި ބައްދަލު ކުރެއްވުމެއްގައި ޓްރަމްޕް ވަނީ އިރާގުގައި ތިބި އެމެރިކާ ސިފައިން އެ ގައުމުން ބާލާނެ ކަމަށް ޓްރަމްޕް މީގެކުރިން ވެވަޑައިގެންނެވި ވައުދު ތަކުރާރު ކުރައްވާފައެވެ.
އަނެއްކޮޅުން ބަލާއިރު އިރާގުގެ ގާނޫނު ހަދާ މަޖިލީހުން މި އަހަރުގެ ކުރީކޮޅު ވަނީ އެ ގައުމުގައި ތިބި ބޭރު ގައުމުތަކުގެ ސިފައިން އެ ގައުމުން ފޭބުމަށް ފާސްކޮށްފައެވެ. ޤާނޫނު ހަދާ މަޖިލީހުގެ މި ނިންމުމާއެކު އިރާގުގައި ތިބި އެމެރިކާ އާއި އެމެރިކާ އާ ގުޅިފައިވާ ފައުޖުތައް ވަނީ އެ ގައުމުން ފައިބަން ފަށާފައެވެ.
