މޭމަހުގެ 19 ވަނަ ދުވަހު ސިނަމާތަކަށް އަންނަ "ހާފް ގާލްފްރެންޑް" އަކީ އެމެރިކާގެ އެތެރޭގައި ހުރިހާ މަންޒަރެއް ޝޫޓްކުރި އިންޑިއާގެ ފުރަތަމަ ފިލްމު ކަމަށް އެ ފިލްމުގެ ޑައިރެކްޓަރ މޯހިތު ޝެޓީ ބުނެފިއެވެ.
މޯހިތު ބުނީ އެމެރިކާގައި އެ ފިލްމުގެ ބޮޑުބައި ޝޫޓް ކުރީ ހިލޭ ކަމަށެވެ.
އޭނާ ބުނީ އޭނާ ނިއުޔޯކަށް ގޮސް ފިލްމު ޝޫޓް ކުރަން ރަނގަޅު ލޮކޭޝަނެއް ބެލި ބެލުމުގައި ލިބުނީ އާންމުކޮށް މީހުން ނޫޅޭ ސެކިއުރިޓީ ނެތް ހިސާބެއް ކަމަށެވެ.
އަރުޖުން ކަޕޫރާއި ޝްރައްދާ ކަޕޫރު އެއްކޮށް ފެނިގެންދާ ފުރަތަމަ ފިލްމު "ހާފް ގާލްފްރެންޑް" އަކީ ފުރާވަރު ދެކުދިންގެ ތެރޭގައި އުފެދޭ ލޯބީގެ ހާދިސާއެއްގެ މައްޗަށް ހަދާފައިވާ ފިލްމެކެވެ.
މި ފިލްމަކީ ވާހަކަ ލިޔުންތެރިޔާ ޗޭތަން ބަގަތު ލިޔެފައިވާ ވާހަކަ އަސްލަކަށް ބަލައިގެން ހަދާފައިވާ ފިލްމެކެވެ. މި ފިލްމް ޕްރޮޑިއުސްކުރަނީ ވެސް ޗޭތަންއެވެ. އެވާހަކައިގައި ފަގީރު ފިރިހެން ކުއްޖަކަށް މުއްސަނދި އަންހެން ކުއްޖަކުދެކެ ލޯބިވެގެން ކަންތައްތަކެއް ހިނގައެވެ.
އެ ދެމީހުންގެ ލޯބި ފެށިގެންދަނީ އެދެމީހުންގެ މެދުގައި ބާސްކެޓު ކުޅުމަށް އޮންނަ ޝައުގުވެރިކަމެއްގެ ބޮޑުކަމުންނެވެ.
މި ފިލްމުގެ ވާހަކަ ލިޔެފައިވާ ޗޭތަންއަކީ ކާމިޔާބު ފިލްމެއް ކަމަށްވާ ފިލްމު "ތްރީ އިޑިއެޓްސް" ވެސް ލިޔުނު ލިޔުންތެރިއާއެވެ. އަދި އަރުޖުން އާއި އާލިޔާގެ "ޓޫ ސްޓޭޓްސް"ގެ ވެސް ލިޔުންތެރިޔާއެވެ.
