މި ފަހަރުގެ ބަލޮންޑޯ އެވޯޑް އާޖެންޓީނާގެ ތަރި ލިއޮނެލް މެސީއަށް ހައްގު ކަމަށް ބާސެލޯނާގެ ކޯޗު ރޮނާލްޑް ކޫމަން ބުނެފިއެވެ.

އުމުރުން 34 އަހަރުގެ މެސީ ވަނީ މިހާތަނަށް ދުނިޔޭގެ އެންމެ މޮޅު ކުޅުންތެރިޔާއަށްދޭ ބަލޮންޑޯ އެވޯޑް ހަ ފަހަރު ހޯދާފައެވެ. މެސީއަކީ މިހާތަނަށް މި އެވޯޑް އެންމެ ގިނައިން ހޯދި ކުޅުންތެރިޔާއެވެ.

މި ފަހަރުގެ ބަލޮންޑޯ އެވޯޑް މެސީއަށް ހައްގު ކަމަށް ގިނަ ބަޔަކު ދެކޭ އެއް ސަބަބަކީ އާޖެންޓީނާއާއެކު މެސީ ކޮޕާ އެމެރިކާ ކާމިޔާބުކުރުމުންނެވެ. މި ފަހަރުގެ ކޮޕާ އެމެރިކާގައި މެސީ ތަފާތު މޮޅު ކުޅުމެއް ދެއްކިއިރު، މެސީ ވަނީ މުޅި މުބާރާތުގެ އެންމެ މޮޅު ކުޅުންތެރިޔާގެ މަގާމާއި، މުބާރާތުގައި އެންމެ ގިނަ ލަނޑު ޖެހި ކުޅުންތެރިޔާގެ މަގާމުވެސް ހޯދާފައެވެ. އެކަމަކު މިދިޔަ ސީޒަނުގައި މެސީއަށް ބާސާއާއެކު ކާމިޔާބުކުރެވުނު ހަމައެކަނި މުބާރާތަކީ ސްޕެނިޝް ކަޕެވެ. ނަމަވެސް މެސީ ވަނީ މިދިޔަ ސީޒަނުގެ ސްޕެނިޝް ލީގުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދާފައެވެ.

މެސީއާ ބެހޭ ގޮތުން ބާސާގެ ކޯޗު ކޫމަން ވާހަކަދެއްކިއިރު، މި ވަގުތު މެސީއަކީ އެއްވެސް ކުލަބެއްގެ ކުޅުންތެރިއެއް ނޫނެވެ. ބާސާއާއެކު މެސީ ހަދާފައިވާ އެއްބަސްވުން ހަމަވި ނަމަވެސް، އައު އެއްބަސްވުމުގައި ސޮއިކުރަން މެސީ މިހާރު ނިންމާފައިވާ ކަމަށް ރިޕޯޓުތައް ބުނެއެވެ. އެގޮތުން މުސާރަ ކުޑަ ކުރަން އެއްބަސްވެ، 2026 ވަނަ އަހަރުގެ ނިޔަލަށް ބާސާގައި މެސީ މަޑުކުރާނެ ކަމަށްވެސް މީޑިއާތަކުން ވަނީ ރިޕޯޓުކޮށްފައެވެ.

ބާސާގެ ރަސްމީ ވެބްސައިޓަށް ދިން އިންޓަވިއުއެއްގައި ކޫމަން ބުނީ މެސީއަކީ ބާސާގެ ކެޕްޓަން ކަމަށާއި، އެ ޓީމަށް މެސީ ވަރަށް މުހިންމު ކަމަށެވެ. އަދި މި ފަހުން ދެއްކި މޮޅު ކުޅުމާއެކު މެސީ އޭނާގެ ފެންވަރު އަނެއްކާވެސް ސާބިތުކޮށްދީފައިވާ ކަމަށާއި، އެހެންކަމުން މި އަހަރުގެ ބަލޮންޑޯ އެވޯޑް އެންމެ ބޮޑަށް ހައްގުވާ ކުޅުންތެރިއަކީ މެސީ ކަމަށްވެސް ވަނީ ބުނެފައެވެ.

މެސީއާ ބެހޭ ގޮތުން ކޫމަން ވާހަކަދެއްކިއިރު، މެސީގެ އެއްބަސްވުމާ ގުޅޭ ގޮތުން މެސީގެ ބައްޕަ ވަނީ ބާސާގެ ބޯޑާއި ދާދި ފަހުން ބައްދަލުކޮށްފައެވެ. އަދި ދާދި ފަހުން ދިން އިންޓަވިއުއެއްގައި ބާސާގެ ރައީސް ޖޮއާން ލަޕޯޓާ ވަނީ މެސީގެ އެއްބަސްވުމުގެ މަސައްކަތް ލަސްވި ސަބަބަކީ ފައިނޭންޝިއަލް ފެއާ ޕްލޭ (އެފްއެފްޕީ) ގެ މައްސަލަތަކެއް ހުރުމުން ކަމަށާއި، އެހެން ނަމަވެސް އަވަސް މުސްތަގުބަލެއްގައި އެއްބަސްވުމުގެ މަސައްކަތް ނިމޭނެ ކަމަށް ވިދާޅުވެފައެވެ.

ބާސާގެ އެއްބަސްވުން މެސީ އާކުރާއިރު، ދާދި ފަހުން ޕީއެސްޖީން ވަނީ ބޮޑު މުސާރަ ލިބޭ އެއްބަސްވުމެއް މެސީއަށް ހުށަހަޅާފައެވެ. އަދި އޭނާ ހޯދަން މެންޗެސްޓާ ސިޓީންވެސް އަންނަނީ މަސައްކަތް ކުރަމުންނެވެ.

ބާސާގެ ސީނިއާ ޓީމުން 2004 ވަނަ އަހަރު ކެރިއަރު ފެށި މެސީއަކީ ބާސާގެ ތާރީޚުގައި އެޓީމަށް އެންމެ ގިނަ ލަނޑު ޖަހާދީފައިވާ އަދި އެއް ޓީމަކަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އަދި މެސީއަކީ ބާސާގެ ތާރީޚުގައި އެ ޓީމަށް އެންމެ ގިނަ މެޗު ކުޅެދީފައިވާ ކުޅުންތެރިޔާވެސްމެއެވެ. އެގޮތުން މިހާތަނަށް ކުޅުނު 778 މެޗުގައި 672 ލަނޑު މެސީ ކާމިޔާބުކޮށްފައިވާއިރު، އޭނާ ވަނީ ބާސާއާއެކު ސްޕެނިޝް ލީގު 10 ފަހަރު އަދި ޔުއެފާ ޗެމްޕިއަންސް ލީގު ހަތަރު ފަހަރު ހޯދާފައެވެ.