އިޓަލީގެ ޓީވީ ކޮމްޕެނީތަކުގެ އެދުމުގެ މަތިން އިޓާލިއަން ލީގުގެ ޓީމުތަކުން ފެހި ޖާޒީ ބޭނުން ކުރުން މަނާކުރަން އެގައުމުގެ ފުޓުބޯޅަ ފެޑަރޭޝަނުން ނިންމައިފިއެވެ.
އިޓަލީގެ ފުޓުބޯޅަ ފެޑަރޭޝަނުން ވަނީ 2022/2023 ވަނަ އަހަރުގެ ފުޓުބޯޅަ ސީޒަންގައި މިގަވައިދަށް އަމުލުކުރަން ނިންމާ އެކަން ލީގުގެ ބޯޑަށް އަންގާފައެވެ.
މިހާތަނަށް މަޝްވަރާ ކުރެވިފައިވާ ގައިވައިދުގައި ވާގޮތުން 2022/203 ވަނަ އަހަރުގެ ފުޓުބޯޅަ ސީޒަނުގައި ގޯލްކީޕަރުން ނޫން އެހެން ކުޅުންތެރިން ފެހި ޖާޒީ އާއި ސޯޓާއި އިސްޓާކިން ބޭނުން ކުރުން މަނާވާނެއެވެ. ކީޕަރުންނަށް ބޭނުން ޖާޒީއެއް ބޭނުން ކުރުމުގެ ހުއްދަ ދީފައިވަނީ އެއީ އާންމު އުސޫލުގައި ވެސް ކީޕަރުންނަކީ ވަކި ޖާޒީއެއް ބޭނުން ކުރުން މަނާ ބަޔަކަށް ނުވާތީއެވެ.
އިޓަލީގެ ބްރޯޑްކާސްޓަރުން ފެހި ޖާޒީ މަނާކުރަން އެދުނީ މެޗުތައް ދައްކާއިރު، ދަނޑުގެ ކުލަޔާއި ކުޅުންތެރިން ޖާޒީ ކުލަ ދިމާވެ، އެންމެ ސާފުކޮށް މަންޒަރު ދެއްކުމުގައި ދަތިތަކެއް ކުރިމަތިވާކަމަށް ބުނެއެވެ.
މީގެ އިތުރުން އާންމު ގޮތެއްގައި އިޓާލިއަން ލީގުގެ ގިނަ މެޗުތަކެއް މެންދުރާއި ހަވީރު ކުޅެން ޖެހޭއިރު، ވީޑިއޯ އެސިސްޓަންޓް ރެފްރީ (ވީއޭއާރް) އިން މަންޒަރުތައް ބަލަން ވެސް އުނދަގޫތަކެއް ދިމާވާތީ ފެހި ޖޯޒީ މަނާކުރަން ހުށަހެޅީއެވެ.
މިދިޔަ ސީޒަނުގައި ވެސް އިޓަލީގެ ދެ ޓީމެއް ވަނީ އަލިގަދަ ފެހި ޖޯޒީއެއް ބޭނުންކޮށްފަ އެވެ. އެއީ ލާޒިއޯ އާއި އެޓަލަންޓާ އިންނެވެ. މީގެ އިތުރުން އިޓާލިއަން ލީގުގައި ފެހި ޖޯޒީ ބޭނުންކުރަމުން އަންނަ އަނެއް ޓީމަކީ ސަސުއޯލޯ އެވެ. ސަސުއޯލޯގެ ހޯމް ޖޯޒީގައި ފެހި ކުލަ ހުންނައިރު، ކަޅު ކުލައިގެ ރޮނގު ވެސް ދަމާފައި ހުރެއެވެ.
އިޓާލިއަން ލީގުގެ އޮފިޝަލަކު ބުނީ ގަވައިދު އެއްކޮށް ފައިނަލް ކޮށްފައި ނުވާ ކަމަށާއި، ގަވައިދު އެއްކޮށް ފައިނަލްވެގެން އަންނައިރު، ޖާޒީގައި ފެހި ކުލަ ބޭނުން ކުރެވޭ ގޮތްތަކެއް ކަނޑައެޅިގެންދާނެ ކަމަށެވެ. އަދި ގަވައިދު ފައިނަލް ކުރާނީ ހުރިހާ އެންމެންގެ މަޝްވަރާއާއެކުގައި ކަމަށް ބުންޏެވެ.
