ފްރާންސްގައި ހަލުވިކަމާއެކު ޑެލްޓާ ވޭރިއަންޓް ފެތުރެމުން އަންނައިރު ދުވާލެއްގެ މައްޗަށް ފެންނަ ކޮވިޑް ކޭހުގެ އަދަދު 10،000ން މައްޗަށް ޖެހިލައިފިއެވެ.

ފްރާންސްގެ ހެލްތު މިނިސްޓްރީން ބުނެފައިވަނީ ހުކުރު ދުވަހު ކޮވިޑް ޖެހިފައިވަނީ 10،908 މީހުންނަށް ކަމަށެވެ. މިއާއެކު އެގައުމުގައި ކޮވިޑް ޖެހުނު މީހުންގެ އަދަދު ވަނީ 5.84 މިލިއަނަށް އަރާފައެވެ. އެންމެފަހުން ދުވާލެއްގެ މައްޗަށް 10،000ން މަތިން ކޭސްތައް ރިޕޯޓްކޮށްފައިވަނީ މެއި މަހުގެ ފަހުކޮޅުއެވެ.

ފާއިތުވި ހަތް ދުވަހަށް ބަލާލާއިރު ދުވާލެއްގެ މައްޗަށް ފެންނަ ކޭސް ހުރީ އެވްރެޖްގޮތެއްގައި ފަސްހާހުގައި ހިފެހެއްޓިފައެވެ. ނަމަވެސް ބުދަ ދުވަހު ވަނީ 5795 މީހުންނަށް ކޮވިޑް ޖެހިފައެވެ.

ފްރާންސްގައި ދުވާލެއްގެ މައްޗަށް ފެނިފައިވާ ކޮވިޑްގެ ކޭސްތަކަށް ބަލާލާއިރު އޭޕްރީލް މަހުގެ މެދުތެރޭގައި ދުވާލެއްގެ މައްޗަށް 42،000 މީހުންނަށްވެސް ކޮވިޑް ޖެހިގެން ރިޕޯޓްކޮށްފައިވެއެވެ. އަދި ޖޫން މަހުގެ ފަހުކޮޅު އެއަދަދު 2000ން ދަށްވެސް ވެފައިވެއެވެ.

ނަމަވެސް ޖޫން މަހުގެ ފަހުކޮޅުން ފެށިގެން ފްރާންސްގައި އަންނަނީ ކޭސްތައް ފެންނަ މިންވަރު މަތިވަމުންނެވެ. އެގޮތުން ކޮންމެ ހަފުތާއަކުން ކޭސްތައް ފެންނަ މިންވަރު މަތިވަމުން އައިއިރު މިދިޔަ ހަފުތާގައި ކޭސްތައް ފެންނަ މިންވަރު ވަނީ 50 އިންސައްތަ މަތިވެފައެވެ. ބުދަ ދުވަހު 100 އިންސައްތަ މަތިވިއިރު ހުކުރު ދުވަހު ހުރީ 140 އިންސައްތައިގައެވެ.

ކޭސްތައް ފެންނަ މިންވަރު މަތިވަމުން އައިނަމަވެސް ހޮސްޕިޓަލްގައި އެޑްމިޓްކޮށްގެން ފަރުވާދޭމީހުންގެ އަދަދު ވަނީ ދަށަށްދާން ފަށާފައެވެ. އެގޮތުން ފާއިތުވި އަހަރުގެ އޮކްޓޯބަރ މަހުގެ ފަހުން ހޮސްޕިޓަލްގައި އެޑްމިޓްކުރި މީހުންގެ އަދަދު ވަނީ ފުރަތަމަ ފަހަރަށް 7000ން ދަށްވެފައެވެ. އަދި އައިސީޔޫގައި ފަރުވާ ދޭ މީހުންގެ އަދަދުވެސް ވަނީ 900ން ދަށަށްގޮސްފައެވެ.

ފްރާންސްގައި މިހާތަނަށް އައިއިރު ކޮވިޑް ޖެހިގެން މަރުވި މީހުންގެ އަދަދު ވަނީ 111،451ށް އަރާފައެވެ.