ކޮވިޑް-19 ޖެހިގެން އިތުރު މީހަކު ރާއްޖޭގައި ނިޔާވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ކޮވިޑް ޖެހިގެން ނިޔާވެފައިވަނީ އުމުރުން 49 އަހަރުގެ ދިވެހި ފިރިހެނެއްކަމަށެވެ. މި މީހާ ނިޔާވެފައިވަނީ 16 ޖުލައިގެ 00:17ގައި ހުޅުމާލެ މެޑިކަލް ފެސިލިޓީގައެވެ.

މިއާއެކު ރާއްޖޭގައި ނިޔާވި މީހުންގެ ޖުމްލަ އަދަދު ވަނީ 216ށް އަރާފައެވެ.

މިއީ މި މަހުގެ ތެރޭގައި ކޮވިޑްގައި ނިޔާވި 5 ވަނަ މީހާއެވެ. ޖުލައި މަހުގެ ފުރަތަމަ ދުވަހު ވަނީ ދެމީހަކު ނިޔާވެފައެވެ. އެއީ އުމުރުން 70 އަހަރުގެ ދިވެހި ފިރިހެނަކާއި 81 އަހަރުގެ ދިވެހި އަންހެނެކެވެ. އަދި ޖުލައި މަހުގެ 11 ވަނަ ދުވަހު އުމުރުން 59 އަހަރުގެ ދިވެހި އަންހެނެއް ވަނީ ނިޔާވެފައެވެ. އެއަށްފަހު ޖުލައި 14 ވަނަ ދުވަހުވެސް ވަނީ އިތުރު މީހަކު ނިޔާވެފައެވެ.

ކޮވިޑްގައި މިހާތަނަށް އެންމެ ގިނަ މީހުން ނިޔާވެފައިވަނީ މެއި މަހުއެވެ. އެމަހު އެކަނިވެސް 88 މީހުން ވަނީ ނިޔާވެފައެވެ. އޭގެ އިތުރުން މި ދިޔަ ޖޫން މަހު 41 މީހަކު ވަނީ ރާއްޖެއިން ނިޔާވެފައެވެ.