ޔޫރޯ 2020 ގެ ފައިނަލަށްފަހު މާރާމާރީ ހިންގި ސަޕޯޓަރުންގެ މައްސަލަ ޔުއެފާއިން ބަލަން ފަށައިފިއެވެ.

އާދީއްތަ ދުވަހުގެރޭ ލަންޑަންގެ ވެމްބްލީ ސްޓޭޑިއަމްގައި ޕެނަލްޓީ ޖަހައިގެން އިންގްލެންޑް ބަލިވި މެޗަށްފަހު، އިޓަލީ ސަޕޯޓަރުން ވެމްބްލީ ސްޓޭޑިއަމްއިން ނުކުތް ވަގުތު އިނގިރޭސި ސަޕޯޓަރުންގެ ގްރޫޕަކުން ވަނީ އިޓަލީ ސަޕޯޓަރުންނަށް ހަމަލާދީ މާރާމާރީ ހިންގައިފައެވެ.

މި މާރާމާރީގައި އިޓަލީގެ ގިނަ ސަޕޯޓަރުންތަކަކަށް އަނިޔާވިއިރު، ބައެއް ސަޕޯޓަރުންނަށްވަނީ ހޮސްޕިޓަލުގައި ފަރުވާދީފައެވެ.

ޔުއެފާއިން ބުނީ އެ އިދާރާގެ ޑިސިޕްލިނަރީ ކޮމެޓީގެ ހާއްސަ ޓީމެއް އެކުލަވާލައި ހިނގާދިޔަ ހާދިސާއާ ބެހޭ ފުރިހަމަ ތަހުގީގެއް ކުރަން ފަށާފައިވާ ކަމަށެވެ. އަދި އިނގިރޭސި ސަޕޯޓަރުންގެ ފަރާތުން ފެނިގެންދިޔަ އަމަލުތަކުގެ ސަބަބުން ޔުއެފާއިން ވަނީ އިނގިރޭސި އެފްއޭގެ މައްޗަށް ހަތަރު ދައުވާއެއްވެސް ކުރަން ނިންމާފައެވެ.

އިނގިރޭސި އެފްއޭގެ ޗީފް އެގްޒެކެޓިވް މާކް ބުލިންހަމް ވަނީ އިނގިރޭސި ސަޕޯޓަރުންގެ ފަރާތުން މެޗަށްފަހު ފެނިގެންދިޔަ އަމަލުތަކަށް މާފަށްވެސް އެދިފައެވެ. އަދި މަސްތުގެ ހާލަތުގައި ތިބި އިނގިރޭސި ސަޕޯޓަރުންގެ މައްސަލަ ބަލަމުން އަންނަ ކަމަށް އިނގިރޭސި އެފްއޭއިން ވަނީ ބުނެފައެވެ.

މި ފަހަރުގެ ޔޫރޯގެ ސެމީ ފައިނަލުގައި ޑެންމާކް އަތުން އިންގްލެންޑް މޮޅުވި މެޗުގައި ހިނގާދިޔަ ކަންތައްތަކުގެ ސަބަބުން އިނގިރޭސި ސަޕޯޓަރުންގެ މައްސަލަތަކެއް ޔުއެފާ އިން ބަލައި ޔުއެފާ އިން ނިންމީ 30،000 ޔޫރޯ އިން ޖޫރިމަނާ ކުރާށެވެ.

ޔުއެފާ އިން އެ ފަަހަރު އިންގްލެންޑް އެފްއޭ ޖޫރިމަނާ ކުރަން ނިންމީ ގައުމީ ސަލާމް ކިޔަމުންދިޔަ ވަގުތުގައި އިނގިރޭސި ސަޕޯޓަރުންގެ ބަޔަކު އަޑުގަދަކޮށްފައިވުމާއި އަލިފާން ބޯޅަ ދަނޑުތެރޭގައި ރޯކުރި މައްސަލައިގެ އިތުރުން އިންގްލެންޑުން ހެރީ ކޭން ޕެނަލްޓީ ޖެހި ވަގުތު ޑެންމާކްގެ ގޯލްކީޕަރު ކެސްޕާ ޝްމައިކަލްގެ މޫނަށް ލޭޒާ އެޅުވި މައްސަލައިގައެވެ.