މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)އިން ރާއްޖެ އިޝްތިހާރުކުރުމަށް ކުރަމުންދާ މަސައްކަތްތަކުގެ ތެރެއިން ރާއްޖެ އިޝްތިހާރުކުރުމަށް "އިންފުލުއެންސަރ ފެމް ޓްރިޕް" ސިލްސިލާ ފަށައިފިއެވެ.
މިސިލްސިލާގެ ދަށުން ބްރެޒިލްގައި ރާއްޖެ އިޝްތިހާރުކުރުމަށް އެގައުމުގެ އިންފުލުއެންސަރސް މެދުވެރިކޮށް، ސޯޝަލް މީޑިއާގައި ރާއްޖެ އިޝްތިހާރުކުރުމުގެ މަސައްކަތް އެމްއެމްޕީއާރުސީން ދަނީ ކުރަމުންނެވެ. އެގޮތުން ފުރަތަމަ ދެ ބައިވެރިން މިމަހުގެ 10ވަނަ ދުވަހު ރާއްޖެ އައިސްފައިވާއިރު، އިތުރު ދެ ބައިވެރިން މި މަހުގެތެރޭ ރާއްޖެއަށް ޒިޔާރަތްކުރާނެކަމަށް އެމްއެމްޕީއާރުސީން ބުނެއެވެ.
މި ސިލްސިލާގެ ތެރެއިން ރާއްޖެއަށް އަންނަ ފަރާތްތައް ތިބުމަށް 6 ރިސޯޓެއް ހަމަޖެހިފައިވާކަމަށް އެމްއެމްޕީއާރުސީން މައުލޫމާތުދެއެވެ. އެއީ ހުވަފެން ފުށި ރިސޯޓް، ވެލައްސަރު ރިސޯޓް، ތާޖް ހޮޓެލްސް، ކަނޑިންމަ މޯލްޑިވްސް، ކޮންރެޑް މޯލްޑިވްސް ރަންގަލި އައިލެންޑް، އަދި އިތުރުން މޫވެންޕިކް ކުރެދިވަރު އެވެ.
ރިސޯޓްތަކަށް މި އިންފުލުއެންސަރސް ކުރާ ޒިޔާރަތުގައި ރިސޯޓްތަކުން ލިބެން ހުންނަ ޚިދުމަތްތައް ތަޖުރިބާކުރާނެއެވެ. އޭގެ ތެރޭގައި ވޯޓަރ ސްޕޯޓްސް އަދި ސްނޯކްލިންގް ފަދަ ހަރަކާތްތައް ހިމެނެއެވެ. އަދި ރިސޯޓްތަކުގެ ސްޕާގެ ޚިދުމަތްތަކާއި، ޚާއްސަ ކެއުންތަކުގެ އިތުރުން އެ ރިސޯޓަކަށް ޚާއްސަ ހަރަކާތްތަކާއި ކަންތައްތައް ތަޖުރިބާކުރާނެއެވެ. އެމްއެމްޕީއާރުސީން މައުލޫމާތުދޭގޮތުގައި އިންފުލުއެންސަރސް ރާއްޖެއަށް ކުރާ ދަތުރުގައި ތަޖުރިބާކުރާ ކަންތައްތައް ސޯޝަލް މީޑިއާގެ އެކި ޕްލެޓްފޯމްތަކުގައި ހިއްސާކުރާނެއެވެ.
"އިންފުލުއެންސަރ ފެމް ޓްރިޕް"ގެ ދަށުން ކުރިއަށްގެންދާ މިހަރަކާތަކީ ބްރެޒިލްގައި ރާއްޖެ އިޝްތިހާރުކުރުމަށް އެމްއެމްޕީއާރުސީން ކުރިއަށްގެންދާ ފުރަތަމަ ހަރަކާތެވެ. މިއީ ބްރެޒިލް މާކެޓްގައި ރާއްޖޭގެ އެކި ސެގްމެންޓްތައް އިޝްތިހާރުކުރުމަށް އެކުލަވާލާފައިވާ ސްޓްރެޓެޖީތަކުގެ ތެރޭގައި ހިމެނޭ ހަރަކާތަކަށް ވާއިރު، މީގެ އިތުރުންވެސް އިތުރު ކަންކަން ބްރެޒިލްގައި ކުރިއަށް ގެންދިއުމަށް ހަމަޖެހިފައިވާ ކަމަށް އެމްއެމްޕީއާރުސީން ބުނެއެވެ. އޭގެ ތެރޭގައި އޮންލައިން މާކެޓިން ޕްރޮމޯޝަންތަކާއި، ވަރޗުއަލް ފެއަރ، އަދި ރޯޑްޝޯ ފަދަ ކެމްޕެއިންތައް ހިމެނެއެވެ.
