ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް އަކީ ޑިމޮކުރަސީ ރަނގަޅަށް ފަހުމުވެވަޑައިގަންނަވާ، ޑިމޮކުރަސީއާ ރައްޓެހި ލީޑަރެއް ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މައުސޫމް ކުރެއްވި ޓުވީޓެއްގައި ވިދާޅުވެފައި ވަނީ ރިޔާސީ އިންތިޚާބު ބާއްވަން ދެ އަހަރާ ދެ މަސް ދުވަހަށް އޮއްވައި، ރިޔާސީ ކެންޑިޑޭޓުން މިހާ އަވަހަށް، ބައިބަހާ، ބޯކޮށް ތިލަވާން ފެށުމަކީ 2023ގެރިޔާސީ އީދުގެފޯރީގެ ކޮޅުމަތިވުން ކަމަށެވެ. އަދި ޑިމޮކުރަސީ ދޮންވެ ފައްކާވީމާ ރިޔާސީ އީދުގައި ރައްޔިތުން އަތްޖަހާނީ މީހާއަކަށް ނޫން ކަމަށާއި މެނިފެސްޓޯއަށް ކަމަށް މިނިސްޓަރ ވިދާޅުވިއެވެ.
މިނިސްޓަރ މައުސޫމް ވިދާޅުވީ ރައީސް ޞާލިހްގެ ހުރިހާ ފޯކަސްއެއް ހުންނެވީ އެމަނިކުފާނުގެ ރިޔާސީ މެނިފެސްޓޯގެ ވައުދު ފުއްދަން ކަމަށާއި، މިކަމުން ދޭހަވަނީ އެމަނިކުފާނަކީ ޑިމޮކުރަސީ ރަނގަޅަށްފަހުމުވެލައްވާ، ޑިމޮކުރަސީއާ ރައްޓެހި ލީޑަރެއްކަމަށެވެ.
މިނިސްޓަރ މައުސޫމް މިމޭރުމުން ޓުވީޓްކުރައްވާފައިވާ އިރު، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވަނީ 2023 ވަނަ އަހަރު ރިޔާސީ އިންތިހާބެއް ބާއްވާނަމަ އެ އިންތިހާބުގައި މޯލްޑިވިއަން ޑިމޮކްރަޓިކް ޕާޓީގެ ފަރާތުން ކުރިމަތިލައްވާނީ އެމަނިކުފާނުކަމަށް ވިދާޅުވެފައެވެ. އަދި ދާދި ފަހުން އެމަނިކުފާނު މިވަނީ ރައީސް ޞާލިހާއެކު ސިޔާސީ ގޮތުން އެކުގައި މަސައްކަތްކުރެއްވެން ނެތް ކަމަށާއި، ކުރީގެ ރައީސް އިބްދުﷲ ޔާމީންއާ އެކު މަސައްކަތްކުރައްވަން ތައްޔާރަށް ހުންނެވިކަމަށް ވިދާޅުވެފައެވެ.
ރައީސް ޞާލިހުގެ ބޮޑު ބަލިމަޑުކަމެއްގެ ތެރޭގައި ހިންގަންޖެހުނު ނަމަވެސް ގައުމުގެ ތަރައްގީގެ ގިނަ މަޝްރޫއުތައް ދަނީ އެކި ކަންކޮޅުތަކުގައި ކުރިއަށް ގެންދަމުންނެވެ.
