އާދީއްތަ ދުވަހުން ފެށިގެން ފޮރިން މިނިސްޓްރީން ޚިދުމަތްދޭނީ އެ މިނިސްޓްރީ ހިންގަމުން އައި، ކުރީގެ އިމާރާތުން ކަމަށް އެ މިނިސްޓްރީން ބުނެފިއެވެ.
އެ މިނިސްޓްރީ ހިންގަމުން އައި އިމާރާތް ބާވެ އެތަން ހަލާކުވާން ފެށުމުން އެތަން މަރާމާތަށް ބަންދުކުރުމަށް ފަހު މިހާރު ޚިދުމަތް ދެމުން އަންނަނީ ހުޅުމާލެ ފެރީ ޓަރމިނަލްއާ ޖެހިގެން ހަދާފައި ހުރި، މިނިސްޓްރީގެ ވަގުތީ އިމާރާތުގައެވެ.
ފޮރިން މިނިސްޓްރީން ބުނީ ރަސްމީ އިމާރާތުގެ މަސައްކަތް ނިމި އާދީއްތަ ދުވަހުން ފެށިގެން އެތަނުން ޚިދުމަތް ދޭން އަނެއްކާ ވެސް ފަށާނެ ކަމަށެވެ. އަދި އިމާރާތް ބަދަލުވުމުގެ މަރުހަލާ ކުރިއަށް ގެންދާއިރު މިނިސްޓްރީން ޚިދުމަތް ހޯދާ ފަރާތްތަކަށް ދިމާވެދާނެ ދަތިތަކަށްޓަކައި މާފަށް އެދިފައިވެއެވެ.
މިނިސްޓްރީގެ އިމާރާތް މަރާމާތްކުރުމަށް ބަދަލުކުރީ 2019 ވަނަ އަހަރު ތެރޭގައެވެ. އެ މިނިސްޓްރީ އިމާރާތްކޮށްފައި ވަނީ ޗައިނާގެ އެހީގައެވެ. އެ އިމާރާތުގައި އަލުން ޚިދުމަތް ދޭންފަށާއިރު އިމާރާތުގެ ނަން ވަނީ ރާއްޖޭގެ ފުރަތަމަ ފޮރިން މިނިސްޓަރ ފަތުޙުﷲ ޖަމީލްގެ ނަމަށް ނިސްބަތްކޮށް، ފަތުޙުﷲ ޖަމީލް ބިލްޑިންގގެ ނަމަށް ބަދަލުކޮށްފައެވެ.
