ނާޒުކު ތިމާވެށި ލިބިފައިވާ ގައުމުތަކަށް މާލީ އެހީ އަދިވެސް ބޭނުންކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ، ކްލައިމެޓް ވަލްނަރަބަލް ފޯރަމް (ސީ.ވީ.އެފް) ގެ ފުރަތަމަ "ކްލައިމެޓް ވަލްނަރަބަލް ފައިނޭންސް ސަމިޓް"ގައި ބައިވެރިވެވަޑައިގެން ދެއްކެވި ވާހަކަފުޅުގައެވެ. ސަމިޓުގައި ބައިވެރިންނައި މުހާތަބުކުރައްވާ ރައީސް ނަޝީދު ދެއްކެވި ވާހަކަފުޅުގައި ތިމާވެށީގެ މައްސަލަތަކަކީ ބައިނަލްއަޤްވާމީ ދުނިޔޭގައި އަބަދުވެސް ވާހަކަދައްކާ މަޝްވަރާކުރަމުންދާ ކަންކން ކަމަށެވެ. ނަމަވެސް މިކަމާދެކޮޅަށް ކުރަން ހުރި މަސައްކަތްތައް ނުކުރެވި ލަސްވާކަން ފާހަގަކުރައްވާ ރައީސް ނަޝީދު ވަނީ އަޅަންޖެހޭ ފިޔަވަޅުތައް އެތައް ގުނައެއް އިތުރުކުރުން އަވަސްކުރުން ލާޒިމުވާކަމަށެވެ. މިއަދު މިވަނީ މިކަންކަން ޢަމަލުން ދައްކަންވީ ވަގުތުކަން ރައީސް ނަޝީދު ފާހަގަކުރެއްވިއެވެ.
މި ސަމިޓް ހުޅުވުމަށް ބޭއްވި ލީޑަރސް އިވެންޓުގައި ރައީސް ނަޝީދާއި، ބަންގްލަދޭޝްގެ ބޮޑުވަޒީރު ޝެއިޚް ޙަސީނާގެ އިތުރުން، އދ. ގެ ސެކެޓްރީ ޖެނެރަލް އެންތޮނިޔޯ ގުތޭޚެޝާއި، ޖަމިއްޔާގެ ކުރީގެ ސެކެޓްރީ ޖެނެރަލް އަދި ދަ ގްލޯބަލް ކޮމިޝަން އޮން އެޑެޕްޓޭޝަން، ޖީ.ސީ.އޭގެ ބޯޑު ޗެއަރ ބަންކީ މޫނާއި، ވޯލްޑް ބޭންކް ގްރޫޕުގެ ރައީސް ޑޭވިޑް މަލްޕާސް އަދި އެމެރިކާގެ ސްޕެޝަލް ޕްރެޒިޑެންޝަލް އެންވޯއީ ފޯރ ކްލައިމެޓް ޖޯން ކެރީ ވަނީ ބައިވެރިވެވަޑައިގެން ވާހަކަފުޅުދައްކަވަފާއެވެ.
ބަންގަލްދޭޝް ސަރުކާރުން އިންތިޒާމުކޮށް ވަރޗުއަލްކޮށް ކުރިއަށްގެންދިޔަ މި ސަމިޓުގައި ރައީސް ނަޝީދު ބައިވެރިވެވަޑައިގަތީ، އިނގިރޭސިވިލާތުގައި ހުންނަވައިގެންނެވެ. ރައީސް ނަޝީދަކީ ކްލައިމެޓް ވަލްނަބަލް ފޯރަމްގެ ވުޖޫދަށް ގެނައުމުގައި އިސްދައުރެއް އަދާކުރައްވާފައިވާ ފައުންޑިންގ ޗެއަރއެވެ. ތީމެޓިކް އެމްބެސެޑަރ ފޯރ އެމްބިޝަންކަންވެސް ކުރައްވާ ރައީސް ނަޝީދު މި ސަމިޓުގައި ބައިވެރިވެވަޑައިގެންފައިވަނީ ސަމިޓުގެ މޮޑަރޭޓަރގެ ހައިސިއްޔަތުންނެވެ.
