ރެއާލް މެޑްރިޑް ދޫކޮށް އެ ކުލަބުގެ ލެޖެންޑް ސާޖިއޯ ރާމޯސް ޕީއެސްޖީއަށް ބަދަލުވެއްޖެއެވެ.

ރެއާލުގައި 16 އަހަރު ހޭދަކުރުމަށްފަހު އުމުރުން 35 އަހަރުގެ ރާމޯސް ވަނީ މިދިޔަ ޖޫން މަހުގެ ތެރޭގައި ރެއާލް ދޫކޮށްލަން ނިންމިކަން އިއުލާން ކޮށްފައެވެ. ރިޕޯޓުތައް ބުނާ ގޮތުން ރެއާލާއެކު ހަދާފައިވާ އެއްބަސްވުން އާކުރަން ރާމޯސް މީގެ ކުރިން ބޭނުންވި ނަމަވެސް، ރެއާލުން ވަނީ ރާމޯސްގެ ހުށަހެޅުމަށް ދެކޮޅު ހަދާފައެވެ.

އެހެންކަމުން ހިލޭ ޓްރާންސްފާއެއްގެ ދަށުން ރާމޯސް ވަނީ ޕީއެސްޖީއަށް ސޮއިކޮށްފައެވެ. ރާމޯސް ޕީއެސްޖީއާ ގުޅުނީ ދެ އަހަރުގެ އެއްބަސްވުމެއްގެ ދަށުންނެވެ. ޕީއެސްޖީއާ ގުޅުމަށްފަހު ރާމޯސް ބުނީ ކެރިއަރުގައި އާ ޗެޕްޓަރެއް ފަށަން ލިބުނު ފުރުސަތުގެ ބޭނުން ހިފަން ނިންމީ ޕީއެސްޖީގައި ތިބި ކުޅުންތެރިންނާއި އެ ޓީމުގެ މިސްރާބުވެސް ރަނގަޅުވުމުން ކަމަށެވެ.

ރާމޯސް ރެއާލް ދޫކޮށްލިއިރު، ސްޕެއިންގެ ސެވިއްޔާ ދޫކޮށް ރާމޯސް ރެއާލާ ގުޅުނީ 2005 ވަނަ އަހަރުއެވެ. ރެއާލާއެކު ގިނަ ކާމިޔާބީތަކެއް ހޯދައިފައިވާ ރާމޯސްއަކީ ރެއާލުގެ ތާރީޚުގައި އެންމެ ކާމިޔާބު ކެޕްޓަނެވެ. ރެއާލަށް ކުޅެދިން 671 މެޗުގައި ރާމޯސް ވަނީ އެޓީމަށް 101 ލަނޑު ކާމިޔާބުކޮށްދީފައެވެ. އަދި ވަނީ ރެއާލާއެކު ޔުއެފާ ޗެމްޕިއަންސް ލީގު ހަތަރު ފަހަރު، ސްޕެނިޝް ލީގު ފަސް ފަހަރު، ފީފާ ކުލަބު ވޯލްޑް ކަޕް ހަތަރު ފަހަރު، ސްޕެނިޝް ކަޕް ދެ ފަހަރު، ޔުއެފާ ސުޕަ ކަޕް ތިން ފަހަރު އަދި ސްޕެނިޝް ސުޕަ ކަޕް ހަތަރު ފަހަރު ކާމިޔާބުކޮށްފައެވެ.

ޕީއެސްޖީން ރާމޯސްގެ ސޮއި ހޯދިއިރު، އެ ޓީމުން ދާދި ފަހުން ވަނީ އިންޓަ މިލާނަށް ކުޅެމުން އައި މޮރޮކޯގެ ޑިފެންޑަރު އަޝްރަފް ހަކީމީގެ ސޮއިވެސް ހޯދާފައެވެ.