މާލެ ސަރަހައްދުން ފެންނަ ކޮވިޑް19 ކޭސްތަކުގެ އަދަދު މަދުވެފައިވާއިރު އަތޮޅުތެރެއިން ފެންނަ ކޭސްތަކުގެ އަދަދު އިތުރުވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އާންމުކުރި ތަފާސްހިސާބުތަކަށް ބަލާއިރު ފާއިތުވެދިޔަ 24 ގަޑިއިރުގެ 105 ކޭސް ފެނިފައިވާއިރު މާލެ ސަރަހައްދުން ފެނިފައިވަނީ 23 ކޭހެވެ. އަތޮޅުތެރެއިން ފެނިފައިވަނީ 74 ކޭހެވެ. އަދި އޭގެތެރޭގައި ރިސޯޓުތަކުން ފެނުނު 7 ކޭހާއި އިންޑަސްޓްރިއަލް ރަށްތަކުން ފެނިފައިވަނީ 1 ކޭސް ހިމެނެއެވެ.

މުޅި ރާއްޖެއިން މިހާތަނަށް ޕޮޒިޓިވްވި މީހުންގެ ޖުމްލަ އަދަދު 74،585ށް އަރާފައިވާއިރު އޭގެ ތެރެއިން 71،212 މީހުން ވަނީ ބަލިން ރަނގަޅުވެފައެވެ. މިބަލީގައި މިހާރު ވެސް 3،148 މީހަކު ފަރުވާހޯދަމުން އަންނައިރު އެޑްމިޓްކޮށްގެން ފަރުވާދެމުން އަންނަނީ 25 މީހުންނަށެވެ. އަދި 213 މީހުން ވަނީ ބަލީގައި ނިޔާވެފައެވެ.

ކޮވިޑް-19ގެ ކޭސްތައް މާލެ ސަރަހައްދުގައި ދަށްވެފައި މިވަނީ ކޮވިޑްގެ ހަތަރުވަނަ ރާޅަކަށް ފަހުއެވެ. މި މޭ މަހު ބިންދާލި ހަތަރުވަނަ ރާޅުގައި ކޭސްތަކުގެ އަދަދު 1000ން މައްޗަށް ވެސް ދިޔައެވެ. އެއާއެކު އެޗްޕީއޭއިން އެޅި ހަރުކަށި ފިޔަވަޅުތަކަކަށް ފަހު ކޭސްތަކުގެ އަދަދު މަދުވެފައިވާއިރު މިހާރު ވަނީ ފިޔަވަޅުތަކަށް ލުއިދީފައެވެ. އެގޮތުން ހަވީރު 4ން ފެށިގެން އޮތް ކާފިއު، މިހާރު ރޭގަނޑު 8ން އަނެއް ދުވަހުގެ ފަތިހު 4ށް ބަދަލުކޮށްފައިވާއިރު، ކާފިއު ނޫން ގަޑިތަކުގައި ކެފޭ/ރެސްޓޯރަންޓުތަކުން ޑައިން-އިން ޚިދުމަތް ދިނުމުގެ ހުއްދަވެސް ވަނީ ދީފައެވެ.

މީގެ އިތުރަށް ކާފިއު ނޫން ގަޑިތަކުގައި އެއްވެސް ފާހަކާ ނުލައި ބޭރުގައި އުޅުމުގެ ހުއްދަވެސް ދީފައިވާއިރު ކެފޭ/ރެސްޓޯރަންޓުތަކާއި ފިހާރަތަކަށް 24 ގަޑި އިރު ޑެލިވަރީގެ ޚިދުމަތް ދިނުމަށް ވެސް ވަނީ ހުޅުވާލާފައެވެ.