ނިމިގެން މިދިޔަ މެއި އަދި ޖޫން މަހު އުންމީދުކުރި ވަރަށް ފަތުރުވެރިން ނާންނަކަމަށާއި އެހެންނަމަވެސް މިހާރު އަނެއްކާ ރާއްޖެ އަންނަ ފަތުރުވެރިންގެ އަދަދު އިތުރުވާން ފަށައިފިކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

މިނިސްޓަރ މައުސޫމް ވަނީ މި އަހަރުގެ މެއި ޖޫން އަދި ޖުލައި މަހު ފަތުރުވެރިން ރާއްޖެ އަންނާނެކަމަށް އަންދާޒާކުރި މިންވަރާ އަޅާބަލާއިރު، މެއި އަދި ޖޫން މަހު ރާއްޖެ އައިސްފައިވާ ފަތުރުވެރިންގެ އަދަދު ދަށްކަމަށާއި އެކަމާމެދު ދެރަވާކަމަށެވެ. ނަމަވެސް މިހާރު އަނެއްކާ ރާއްޖެ އަންނަ ފަތުރުވެރިންގެ އަދަދު އިތުރުވަމުން އަންނަ ކަމަށާއި ރާއްޖެއަށް ފަތުރުވެރިން އައުމުގައި ހުރި ގޮންޖެހުންތައް މަޑުމަޑުން ހައްލުވަމުންދާ ކަމަށް މިނިސްޓަރ ވިދާޅުވިއެވެ. ކުރިއަށް އޮތްތާގައި ފަތުރުވެރިކަން ފުޅާވެގެންދާ މަންޒަރު ފެންނާނެކަމަށާއި ރާއްޖޭގެ އެތެރޭގައި ގާއިމުކުރެވިފައިވާ އެއަރޕޯޓްތަކާ އެކު އެތޭރެގެ ދަތުރުފަތުރުތައް ފުޅާވެ އޭގެ ހެޔޮ އަސަރު ފަތުރުވެރިކަމަށް ކުރާނެ ކަމަށް މިނިސްޓަރ ވިދާޅުވިއެވެ.

ވެކްސިން ޓޫރިޒަމާއެކު ދުނިޔޭގެ ފަތުރުވެރިކަމަށް ދިމާވެފައިވާ އެންމެ ބޮޑު އެއް ގޮންޖެހުމަށް ލުއި ލިބިގެންދާނެ ކަމަށާއި ރާއްޖޭގެ ފަތުރުވެރިކަމަށް ވެކްސިން ސެޓްފިކެޓް ތައާރަފުކުރުމުގެ މަސައްކަތްތައް ކުރެވިގެންދާ ކަމަށް މިނިސްޓަރ ވިދާޅުވިއެވެ. ރާއްޖޭގެ ފަތުރުވެރިކަމަކީ ދުނިޔޭގެ އެންމެ ރައްކާތެރި ފަތުރުވެރިކަމުގެ ގޮތުގައި ހެދުމަށް ކުރެވެމުންދާ މަސައްކަތްތަކުގެ ތެރެއިން ފަތުރުވެރިކަމުގެ ސިނާއަތުގައި މަސައްކަތްކުރާ 72 އިންސައްތަ މުވައްޒަފުން ވެކްސިންގެ ދެ ޑޯޒް ފުރިހަމަކޮށްފައިވާ ކަމަށް މިނިސްޓަރ ވިދާޅުވިއެވެ. އެހެން ކަމުން ފަތުރުވެރިކަމުގެ ރަން އަހަރާ ކުރިމަތިލާއިރު ރާއްޖެ އަންނަ ފަތުރުވެރިންގެ އަދަދު އިތުރުވެގެންދާނެ ކަމަށް ވިދާޅުވިއެވެ.

ފާއިތުވި އަހަރުގެ ޑިސެމްބަރު މަހާއި މި އަހަރުގެ ޖެނުއަރީ، ފެބްރުއަރީ އަދި މާޗު މަހަކީ ރާއްޖޭގެ ފަތުރުވެރިކަމަށް ކާމިޔާބު މަސްތައް ކަމަށް ފާހަގަކުރައްވައި ވާހަކަދައްކަވަމުން މިނިސްޓަރ މައުސޫމް ވަނީ، މި އަހަރު ވެސް ނިންމާލަން ވާނީ މިފަދަ ކާމިޔާބީ އަކާއެކު ކަމަށާއި، އަދި ފަތުރުވެރިކަމުގެ ރަން އަހަރު ކާމިޔާބީއާ އެކު ފެށުމުގެ އުންމީދުގައި ކަމަށް ވިދާޅުވެފައެވެ.

ޖޫން މަސް ނިމުނު އިރު ރާއްޖެއަށް އައިސްފައި ވަނީ 510,549 ފަތުރުވެރިންނެއެވެ. އެއީ ޖެނުއަރީ މަހު ރާއްޖެ އައި 92,103 ފަތުރުވެރިންނާއި، ފެބްރުއަރީ މަހު އައި 96,882 ފަތުރުވެރިންގެ އިތުރުން މާޗު މަހު އައި 109,585 ފަތުރުވެރިންނާއި އޭޕްރިލް މަހު އައި 91,200 ފަތުރުވެރިން އަދި މެއި މަހު އައި 64,613 ފަތުރުވެރިންނާއި ޖޫން މަހު ރާއްޖެ އައި 56,166 ފަތުރުވެރިންނެވެ. ޖުލައި މަހުގެ ފުރަތަމަ ހަތަރު ދުވަހު 11,111 ފަތުރުވެރިން ވަނީ ރާއްޖެ އައިސްފައެވެ.