އެކި ރޮނގުތަކުން މަޝްހޫރު ބައެއް ލިޔުންތެރިން ''ރާއްޖެއެމްވީ''ގައި އެބޭފުޅުންގެ ލިޔުންތައް ޝާއިއު ކުރުމުގެ އެއްބަސްވުމުގައި ސޮއި ކުރައްވައިފިއެވެ.

އެއްބަސްވުމުގައި ސޮއިކުރުމަށްޓަކައި ހޮނިހިރު ދުވަހު ބޭއްވި ރަސްމިއްޔާތުގައި ރާއްޖެއެމްވީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަޙުމަދު ސަލީމެވެ. އެއްބަސްވުމުގެ ދަށުން ވެބްސައިޓަށް ލިޔުއްވާނީ މަޝްހޫރު ލިޔުންތެރިންކަމުގައިވާ މުޙައްމަދު ޤާސިމް، މުޙައްމަދު ސަލީމް، މުޙައްމަދު ޝާޠިރު، އަދި މުޙައްމަދު ނިޝާން އިބްރާހީމެވެ.

ރާއްޖެއެމްވީގެ ވެބްސައިޓަށް ލިޔުއްވާ ބޭފުޅުންގެ ތެރެއިން މުޙައްމަދު ޤާސިމްއަކީ ލިޔުންތެރިކަމުގެ ދާއިރާއިން 2009 ވަނަ އަހަރު ގައުމީ އިނާމު ހާސިލްކުރައްވާފައިވާ ބޭފުޅެކެވެ. ތަފާތު އެކި ދާއިރާތަކުން ގިނަ އަދަދަކަށް ދިގު ވާހަކައާއި ކުރުވާހަކަ ލިޔުއްވާފައިވެއެވެ. ލިޔުއްވަން ފެއްޓެވީ 1997 އަހަރުގެ ތެރޭގައެވެ. ވާހަކަ ލިޔުއްވުމުގެ އިތުރުން ތަފާތު މައުޟޫޢުތަކަށް މަޒުމޫނާއި ކޮލަމްތައް ވެސް ލިޔުއްވާފައިވެއެވެ. އަދި ސަމާސާއަދަބަކީ ވެސް ޝައުގާ ގުޅިފައިވާ ފަންނެކެވެ.

ރާއްޖެއެމްވީއާ ގުޅިވަޑައިގެންނެވި މުޙައްމަދު ސަލީމަކީ ނޫސްވެރިކަމުގެ ރަންގަލަމާއި އަލިމަސް ގަލަމުގެ އިތުރުން، ނޫސްވެރިކަމުގެ ރޮނގުން ޙުސައިން ޞަލާޙުއްދީން އެވޯޑް ލިބިވަޑައިގެންނެވި ބޭފުޅެކެވެ. ނޫސްވެރިކަމުގެ ރޮނގުން އާންމު ޚިދުމަތަށް ހިތްވަރު ދިނުމުގެ ގައުމީ އިނާމް ހާސިލު ކުރައްވާފައިވާއިރު، ބައެއް ނޫސްތަކުގައި އެޑިޓަރުކަމާއި، ޑެޕިއުޓީ އެޑިޓަރުކަން އަދާކުރެއްވިއެވެ.

މީގެ އިތުރުން މުހައްމަދު ޝާޠިރަކީ ނޫސްވެރިކަމުގައި 20 އަހަރު ފުލްޓައިމްކޮށް މަސައްކަތް ކުރައްވާފައިވާ ބޭފުޅެކެވެ. ދިވެހިރާއްޖޭގެ އަޑުގައި މަސައްކަތް ކުރައްވާފައިވާއިރު، 3000 އަށްވުރެ ގިނަ ރިސާރޗް އާޓިކަލް ލިޔުއްވާފައިވެއެވެ. ރާއްޖޭގެ ރައީސުން އުފެއްދެވި ތާރީޚީ ކޮމިޓީތަކުގެ މެންބަރުކަން އަދާކުރެއްވި ބޭފުޅެއްމެއެވެ. 1997 ގައި ޒުވާނުންގެ ގައުމީ އިނާމް ލިބިވަޑައިގެންނެވިއެވެ. އަދި 2007 ވަނަ އަހަރު ގައުމީ އިނާމާއި ނޫސްވެރިކަމުގެ އަލިމަސް ގަލަން ހާސިލު ކުރައްވާފައިވެއެވެ.

ޤާނޫނީ ދާއިރާއިން ލިޔުންތައް ލިޔުއްވުމަށް ރާއްޖެއެމްވީއާ ގުޅިވަޑައިގެންނެވި މުޙައްމަދު ނިޝާން އިބްރާހީމަކީ ގާނޫނީ ދާއިރާގައި 17 އަހަރު ޚިދުމަތް ކުރައްވާފައިވާ ބޭފުޅެކެވެ. ސިފައިންނާއި ފުލުހުންގެ ތެރޭގައި މަސައްކަތް ކުރެއްވިއެވެ. އަދި ވިލާ ކޮލެޖާއި، އެވިޑް ކޮލެޖާއި، އިސްލާމީ ޔުނިވަރސިޓީއާއި ޤައުމީ ޔުނިވަރސިޓީއާއި، މައި ކޮލެޖުގެ ގާނޫނީ ކޯސްތަކުގައި ކިޔަވާ ދެއްވުމުގައި އުޅުއްވިއެވެ.

މި ރަސްމިއްޔާތުގައި ރާއްޖެއެމްވީގެ މެނޭޖިންގ ޑިރެކްޓަރ އަޙްމަދު ސަލީމް ވިދާޅުވީ، މި ބޭފުޅުން ލިޔުއްވާ ލިޔުންތަކުގެ ސަބަބުން ދިވެހި ބަހާއި ލިޔުންތެރިކަމަށް ކުރިއެރުން ލިބިގެންދާނެ ކަމަށެވެ. އެއްބަސްވުމާއި ގުޅޭގޮތުން މި ހަތަރު ބޭފުޅުން ވެސް ވިދާޅުވީ ރާއްޖެއެމްވީ ފަދަ ފްލެޓްފޯމަކުން ލިޔުމުގެ ފުރުސަތު ލިބުމަކީ ލިބުނު ވަަރަށް ބޮޑު ކުރިއެރުމެއް ކަމަށެވެ. ރާއްޖެއެމްވީއަކީ އެންމެ ގިނަ މީހުން ވަންނަ އެއް ވެބްސައިޓް ކަމަށްވާއިރު، މި ބޭފުޅުން ލިޔާ ލިޔުންތައް ގިނަ ބަޔަކާ ހަމައަށް ވާސިލުވެގެންދާނެ ކަމަށް އުންމީދު ކުރައްވާ ކަމަށް ވިދާޅުވެފައިވެއެވެ.