ޔޫރޯ 2020 ގެ ކުއާޓާ ފައިނަލުގައި ޔޫކްރޭނާއި އިންގްލެންޑް ބައްދަލުކުރާއިރު، މި ދެ ޓީމަށްވެސް މިހާތަނަށް ޔޫރޯ ކާމިޔާބުކުރެވިފައެއް ނުވެއެވެ.

މި މުބާރާތުގެ ކުއާޓާއަށް ޔޫކްރޭން ދަތުރުކުރީ އިތުރު ވަގުތު ކުޅެ 2-1 ގެ ނަތީޖާއަކުން ސްވިޑެން ބަލިކުރުމަށްފަހުއެވެ. އަދި އިންގްލެންޑް ކުއާޓާގެ ޖާގައެއް ކަށަވަރުކުރީ ވަރުގަދަ ޖަރުމަން 2-0 ގެ ނަތީޖާއަކުން ބަލިކުރުމަށްފަހުއެވެ. މި މެޗުގެ ކުރިން ބޮޑު މުބާރާތެއްގެ ނޮކައުޓް ބުރުގައި ޖަރުމަން އަތުން އިންގްލެންޑް މޮޅުވީ މީގެ 55 އަހަރު ކުރިން 1966 ވަނަ އަހަރުގެ ވޯލްޑް ކަޕުގެ ފައިނަލުގައެވެ.

ޔޫކްރޭނުން 1996 ވަނަ އަހަރު މުޅިން އަލަށް މި މުބާރާތުގެ ކުއާޓާގައި ކުޅުނުއިރު، އެ އަހަރުގެ ކުއާޓާ ފައިނަލުގައިވެސް ބައްދަލުކުރަން ޖެހުނީ އިންގްލެންޑާއެވެ. އެކަމަކު އެ އަހަރުގެ މުބާރާތުގެ ސެމީ ފައިނަލަށްށް ޔޫކްރޭން ދިޔުމުގެ އުއްމީދަށް އިންގްލެންޑުން ވަނީ ހުރަސްއަޅާފައެވެ.

މީގެ އިތުރުން އިންގްލެންޑް ފާހަގަކޮށްލެވެނީ ކޮންމެ ޔޫރޯއަކަށްވެސް ވަރުގަދަ ސްކޮޑަކާއެކު ނުކުންނަ ޓީމެއްގެ ގޮތުގައެވެ. އެކަމަކު އެ ސްކޮޑާއެކު "އިޓްސް ކަމިން ހޯމް" އޭ ކިޔުން ނޫން ކަމެއް އިންގްލެންޑަށް ވެފައެއް ނެތެވެ. ނަމަވެސް ގެރެތު ސައުތު ގޭޓުގެ އިރުޝާދާއެކު އިންގްލެންޑުން މި އަހަރު ކާމިޔާބު ހޯދާނެ ކަމަށް ގިނަ ބަޔަކު ގަބޫލުކުރެއެވެ.

ޔޫކްރޭން މެޗުގެ ކުރިން ވާހަކަ ދައްކަމުން އިންގްލެންޑުގެ ކޯޗު ގެރެތު ސައުތުގޭޓް ބުނީ މި މެޗަށް ނުކުންނައިރު އޮތް އެންމެ ބޮޑު ހިތްހަމަޖެހުމަކީ އިންގްލެންޑުގެ ސްކޮޑު ވަރުގަދަވުން ކަމަށާއި، އަދި އަނިޔާގެ މައްސަލައެއްވެސް ޓީމުގައި ނެތް ކަމަށެވެ. ނަމަވެސް މި މެޗުގައި ފުރަތަމަ އެގާރައިން ބަދަލުތަކެއް ފެނިގެން ގޮސްދާނެ ކަމަށްވެސް ބުންޏެވެ. އަދި ޔޫކްރޭން މެޗު ފަސޭހަކޮށްލުން އެއީ އިންގްލެންޑަށް ހެދޭނެ ވަރަށް ބޮޑު ގޯހެއް ކަމަށްވެސް ސައުތުގޭޓް ވަނީ ބުނެފައެވެ.

ޔޫކްރޭންގެ ކޯޗު އެންޑްރީ ޝެވްޗެންކޯ ބުނީ މި މުބާރާތަކީ ޔޫކްރޭނަށް ކާމިޔާބު މުބާރާތެއް ކަމަށް ބުނެވިދާނެ ކަމަށާއި، އެކަމަކު އަދިވެސް ޔޫކްރޭންގެ އަމާޒަށް ވާސިލުނުވެވޭ ކަމަށެވެ. އަދި އެ ޓީމުގެ އަމާޒަކީ އެ ގައުމުގެ ތާރީޚުގައި ފުރަތަމަ ފަހަރަށް މި މުބާރާތުގެ ސެމީން ޖާގަ ހޯދުން ކަމަށްވެސް ބުންޏެވެ. އިންގްލެންޑާ ބެހޭ ގޮތުން ޝެވްޗެންކޯ ބުނީ އެ ޓީމަކީ ކިހާ ފެންވަރެއްގެ ޓީމެއްކަން އެނގޭ ކަމަށާއި، އެކަމަކު އިންގްލެންޑަކީ ބަލި ނުކުރެވޭ ފެންވަރުގެ ޓީމެއް ނޫން ކަމަށެވެ.

ޔޫރޯ 2020 ގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާ ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސެއިން ފަރިޔާޒެވެ. ފަރިޔާޒާއެކު އެނަލިސްޓުންގެ ގޮތުގައި ބައިވެރިވާނީ މުޙައްމަދު ޝިޔާޒް (މޯހަން) އާއި އިހުސާން އަބްދުލް ޣަނީ (ސާންތި) އެވެ.

ޔޫކްރޭނާއި އިންގްލެންޑް ބައްދަލުކުރާ މެޗު ފަށާނީ ހޮނިހިރު ދުވަހުގެރޭ ރާއްޖެ ގަޑިން ދަންވަރު 00:00 ގައެވެ.