އަފްޣާނިސްތާންގެ ލީޑަރުން އެމެރިކާގެ ރައީސް ޖޯ ބައިޑަންއާ ބައްދަލުކުރަން ނިންމައިފިއެވެ.
ހުކުރު ދުވަހު ވައިޓް ހައުސްގައި ބޭއްވުމަށް ހަމަޖެހިފައިވާ މި ބައްދަލުވުމުގައި އަފްޣާންގެ ރައީސް އަޝްރަފް ޣަނީއާއި އަބްދުﷲ އަބްދުﷲ ބައިރިވެވަޑައިގަންނަވާނެއެވެ. މި ބައްދަލުވުމުގެ ތެރޭގައި މަޝްވަރާ ކުރުމަށް ހަމަޖެހިފައިވަނީ، އަފްޣާންގައި ތިބި އެމެރިކާ ސިފައިން އެ ގައުމުން ފޭބުމަށްފަހު ގައުމުގެ މުސްތަގްބަލް ބައްޓަން ކުރުމާ ބެހޭ ގޮތުންނެވެ.
އެ ގައުމުގައި ތިބި އެމެރިކާގެ ސިފައިން ފޭބި ނަމަވެސް އެމެރިކާގެ އެހީތައް އެ ގައުމަށް ދިނުމާ ބެހޭގޮތުން ވެސް މަޝްވަރާތައް ކުރާނެ ކަމަށްވަނީ ބެލެވިފައެވެ. ހަމަ މިއާއެކު އަފްޣާންގެ ލީޑަރުންގެ ވެސް އުންމީދަކީ ޚާރިޖީ ގޮތުންނާއި އިގްދިސާދީ ގޮތުން ވެސް އެމެރިކާގެ އެހީ މެދުކެނޑުމެއްނެތި ލިބެމުން ދިޔުމެވެ. މިކަންކަމާ ބެހޭ ގޮތުން ލީޑަރުން މަޝްވަރާ ކުރައްވަނެކަމަށް ރިޕޯޓުތައް ބުނެއެވެ.
ފާއިތުވެ ދިޔަ 20 އަހަރު ދުވަހުގެ ތެރޭގައި، އެމެރިކާ ސިފައިން އަފްޣާނިސްތާނުގައި ތިބި އިރު، ތަރުޖަމާނުންގެ ގޮތުގައާއި، އަދި އެނޫން ގޮތްގޮތުން ވެސް، އެގައުމުގައި ތިބި އެމެރިކާ އަދި އެހެނިހެން ގައުމުތަކުގެ ސިފައިންނަށް އެހީތެރިކަން ފޯރުކޮށްދީފައިވާ އަފްޣާންގެ އެތައްހާސް ރައްޔިތުން އެމެރިކާއަށް ބަދަލުކުރުމުގެ މަސައްކަތް އިތުރަށް ހަލުއި ކޮށްފައިވާ ކަމުގައި ވެސް ބައިޑްންގެ ސަރުކާރުން ވަނީ ބުނެފިއެވެ.
އެމެރިކާ ސަރުކާރުގެ އިސް އޮފިޝަލަކު މީޑިއާތަކަށް މައުލޫމާތު ދީފައިވާ ގޮތުގައި، މި މީހުންނަށް އެމެރިކާއަށް ވަނުމަށް ބޭނުންވާ ހުއްދަ ދިނުމަށްޓަކައި އެޕްލިކޭޝަންތައް މިހާރު ދަނީ ފުރިހަމަ ކުރެވެމުންނެވެ.
އޮފިޝަލް ބުނެފައިވާ ގޮތުގައި، އެމެރިކާ ސިފައިން އަފްޣާނިސްތާނުގައި ތިބި 20 އަހަރު ދުވަހުގެ ތެރޭގައި، އެކި ގޮތްގޮތުން އެމެރިކާއަށް އެހީތެރިކަން ފޯކޮށްދީގައިވާ އަފްޣާނިސްތާންގެ ރައްޔިތުންނަށް ދުނިޔޭގެ އެހެން ގައުމުތަކުން، ނުވަތަ އެމެރިކާގައި ދިރިއުޅުމުގެ ފުރުސަތު ހޯދައިދިނުމަށް ކުރެވިފައިވާ ޕްލޭންތައް މިހާރުވަނީ ވަރަށް ބޮޑަށް އަވަސް ކުރެވިފައެވެ. މި އެންމެންގެ އެޕްލިކޭޝަންތައް މިހާރު ވަނީ ތަރުތީބު ކުރުމުގެ މަރުހަލާގައި ކަމަށްވެސް، ނަން ހާމަނުކުރުމަށް ޝަރުތުކޮށް، އިސް އޮފިޝަލު މީޑީއާތަކަށް މައުލޫމާތު ދެމުން ބުނެފައިވެއެވެ.
އަފްޣާނިސްތާނުގައި މިހާރު ބާކީ ތިބި ނޭޓޯ އަދި އެމެެރިކާ ސިފައިން އަންނަ ސެޕްޓެމްބަރު މަހުގެ 11 ވަނަ ދުވަހުގެ ކުރިން އަފްޣާނިސްތާލުން ބޭލުމުގެ ތައްޔާރީތައް އަންނަނީ ވަމުންނެވެ.
