ޔޫރޯ 2020 ގެ ކުޅުން ފެށިގެން ކުރިއަށްދާއިރު، ގްރޫޕް އީ ގެ މެޗުތައް ހޯމަ ދުވަހުގެރޭ ފަށާނެއެވެ. ގްރޫޕް އީ ގެ ފުރަތަމަ މެޗުގައި ޕޮލެންޑާއި ސްލޮވާކިއާ ބައްދަލުކުރާއިރު، މި މެޗު ކުޅޭނީ ރަޝިއާގެ ސެއިންޓް ފީޓަސްބާގުގެ ކްރެސްޓޮވްސްކީ ސްޓޭޑިއަމުގައެވެ.

ޔޫރޯގައި ޕޮލެންޑާއި ސްލޮވާކިއާ ބައްދަލުކުރާއިރު، މި ދެ ގައުމު މީގެ ކުރިން ވަނީ ފަސް ފަހަރު ބައްދަލުކޮށްފައެވެ. އޭގެ ތެރެއިން ތިން މެޗުން ސްލޮވާކިއާ މޮޅުވެފައިވާއިރު، ޕޮލެންޑް މޮޅުވީ އެންމެ މެޗަކުންނެވެ. އަނެއް މެޗު ނިމުނީ އެއްވަރުވެގެންނެވެ.

ޕޮލެންޑްގެ ކޯޗު ޕައުލޯ ސީޒާ ބުނީ މެޗަށް ނުކުންނައިރު ޕޮލެންޑުގައި އަނިޔާގެ މައްސަލައެއް ނެތް ކަމަށާއި، އެއީ ލިބުނު ބޮޑު ހިތްހަމަޖެހުމެއް ކަމަށެވެ. އަދި މި މެޗަށް ޕޮލެންޑުން ނުކުންނަނީ އިތުބާރާއެކުގައި ކަމަށާއި، އުއްމީދަކީ ކާމިޔާބުކަމާއެކު ޔޫރޯ ނިންމާލުން ކަމަށެވެ.

ސްލޮވާކިއާގެ ކޯޗު ސްޓެފަން ޓާކޮވިޗް ބުނީ މި މެޗަށް އޭނާގެ ކުޅުންތެރިން ތިބީ ތައްޔާރަށް ކަމަށާއި، އަދި މުޅި މުބާރާތަށްވެސް އޭނާގެ ޓީމު ވަރަށް ރަނގަޅަށް ތައްޔާރުވެފައިވާ ކަމަށެވެ. އަދި ޔޫރޯގައި ސްލޮވާކިއާގެ އަމާޒަކީ ގްރޫޕް ސްޓޭޖު ފަހަނައަޅައި ދިޔުން ކަމަށާއި، އެކަން ކުރުމަށް ކުޅުންތެރިން ތައްޔާރަށް ތިބި ކަމަށްވެސް ސްޓެފަން ބުންޏެވެ. އަދި ބުނީ ޓީމުގައި އަނިޔާގެ އެއްވެސް މައްސަލައެއް ނެތް ކަމަށާއި، އެހެންކަމުން މި މެޗުގައި އޭނާ ބޭނުން ކޮންމެ ކުޅުންތެރިއެއް ބޭނުން ކުރުމުގެ ފުރުސަތު އެބައޮތް ކަމަށެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑް ކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ވަގުތުން ރާއްޖެޓީވީން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް އީ ގެ އެނަލިސްޓް އިމާދު ލަތީފެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއް ބައިވެރިވާނެއެވެ.

ޕޮލެންޑާއި ސްލޮވާކިއާ ބައްދަލުކުރާ މެޗު ފަށާނީ ހޯމަ ދުވަހުގެރޭ ރާއްޖެ ގަޑިން 21:00 ގައެވެ.