ޔޫރޯ 2020 ގެ މެޗުތައް ފެށިގެން ކުރިއަށްދާއިރު ގްރޫޕް ސީ ގެ ފެވަރިޓުންގެ ގޮތުގައި ގިނަބަޔަކު ދެކެމުން އަންނަ ނެދަލެންޑްސް އާއި ޔޫކްރޭން އާދީއްތަ ދުވަހުގެރޭ ބައްދަލުކުރާނެއެވެ. މި މެޗު ކުޅުމަށް ހަމަޖެހިފައިވަނީ އެމްސްޓެޑަމްގެ ޔޯހަން ކްރައިފް އެރީނާގައެވެ.

ޔޫރޯގައި ނެދަލެންޑްސް އާއި ޔޫކްރޭން ބައްދަލުކުރާއިރު، މި ދެ ގައުމު މިހާތަނަށް ބައްދަލުކޮށްފައިވަނީ އެންމެ ދެ ފަހަރެވެ. އޭގެ ތެރެއިން އެއް މެޗުން ނެދަލެންޑްސް މޮޅުވިއިރު، އަނެއް މެޗު ނިމުނީ އެއްވަރުވެގެންނެވެ.

ނެދަލެންޑްސްގެ ކޯޗު ފްރޭންކް ޑި ބޮއާ ބުނީ މި މެޗަށް ނުކުންނައިރު ޔޫކްރޭން ޓީމު ފަސޭހަކޮށް ނުނަގާނެ ކަމަށާއި، ގްރޫޕް ސީ ގައި ހިމެނޭ ޓީމުތަކަކީ ހަމަހަމަ ޓީމުތަކެއް ކަމަށެވެ. އަދި އުއްމީދަކީ ގްރޫޕުގެ އެއްވަނައިގެ ގޮތުގައި ދެވަނަ ބުރަށް ދިޔުން ކަމަށް އޭނާ ބުންޏެވެ.

މި މެޗަށް ނުކުންނައިރު ނެދަލެންޑްސްއަށް އޮތް އެންމެ ބޮޑު ހާސްކަމަކީ ޒުވާން ޑިފެންޑަރު މަތައިސް ޑި ލީޓް މެޗަށް ފިޓް ނުވުން ކަމަށެވެ. އެކަމަކު މެޗުގެ ވަކި ހިސާބަކުން އޭނާ ފެނިދާނެ ކަމުގެ އިޝާރާތެއް ކޯޗު ވަނީ ދީފައެވެ.

ޔޫކްރޭނުގެ ކޯޗު އެންޑްރީ ޝެވްޗެންކޯ ބުނީ ނެދަލެންޑްސްއާ ދެކޮޅަށް ކުޅޭ މެޗަކީ ގްރޫޕް ސްޓޭޖުގައި ކުޅޭނެ އެންމެ އުނދަގޫ އަދި އެންމެ މުހިންމު މެޗު ކަމަށެވެ. އަދި ނެދަލެންޑްސްއާ ދެކޮޅަށް ކުޅޭއިރު އެ ޓީމަށް އިހުތިރާމުކުރާ ކަމަށާއި، ނެދަލެންޑްސްއަކީ ޔޫރަޕުގެ މަޝްހޫރު ގިނަ ކުޅުންތެރިންތަކެއް ތިބި ޓީމެއް ކަމަށްވެސް ވަނީ ބުނެފައެވެ. އެހެންކަމުން މި މެޗުގައި ވިސްނާނީ ޔޫކްރޭނުގެ ކުޅުންތެރިންގެ ފަރާތުން ހެދޭ ގޯސްތައް މަދުކުރުމަށް ކަމަށްވެސް ޝެވްޗެންކޯ ވަނީ ބުނެފައެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑް ކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ވަގުތުން ރާއްޖެޓީވީން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސައިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ސީ ގެ އެނަލިސްޓު އިހުސާން އަބްދުލް ޣަނީ (ސާންތި) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއް ބައިވެރިވާނެއެވެ.

ނެދަލެންޑްސް އާއި ޔޫކްރޭނުގެ ބައްދަލުކުރާ މެޗު ފަށާނީ އާދީއްތަ ދުވަހުގެރޭ ރާއްޖެ ގަޑިން 00:00 ގައެވެ.