ކުރިއަށް އޮތް ޔޫރޯ ފުޓްބޯޅަ މުބާރާތަށް ތައްޔާރުވުމުގެ ގޮތުން ބުދަ ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުން އިސްރާއީލް އަތުން ފަސޭހަކަމާއެކު ޕޯޗުގަލް މޮޅުވެއްޖެއެވެ.
އަމިއްލަ ގައުމުގައި ކުޅުނު މެޗުން ޕޯޗުގަލް މޮޅުވީ 4-0 ގެ ނަތީޖާއަކުންނެވެ.
މި މެޗުގައި ޕޯޗުގަލުން މޮޅު ކުޅުމެއް ދެއްކިއިރު، މެޗުގެ ފުރަތަމަ ހާފުގައި އެ ގައުމުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މި ހާފު ނިމެން ހަތަރު މިނެޓަށް ވެފައި ވަނިކޮށް ބްރޫނޯ ފެނާންޑޭސްގެ ލަނޑުން ޕޯޗުގަލުން ލީޑު ނެގިއިރު، އޭގެ ދެ މިނެޓު ފަހުން ކެޕްޓަން ކްރިސްޓިއާނޯ ވަނީ ލަނޑެއް ޖަހައި، ލީޑު ފުޅާކޮށްދީފައެވެ.
މެޗުގެ ދެވަނަ ހާފުގައިވެސް ޕޯޗުގަލުން މޮޅު ކުޅުމެއް ދެއްކިއިރު، މެޗު ނިމެން ހަތަރު މިނެޓަށް ވެފައި ވަނިކޮށް ޖޮއާއޯ ކަންސޭލޯ ވަނީ އެ ގައުމުގެ ތިންވަނަ ލަނޑު ޖަހާފައެވެ. ދެން މި މެޗުގައި ޕޯޗުގަލުން ޖެހި އަނެއް ލަނޑު އިތުރު ވަގުތުގައި ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ފެންނާންޑޭސްއެވެ.
އަންނަ ހުކުރު ދުވަހުގެރޭ ފަށާ ޔޫރޯއަށް ތައްޔާރުވުމުގެ ގޮތުން ކުޅުނު އެކުވެރިކަމުގެ ދެވަނަ މެޗުން ޕޯޗުގަލް މޮޅުވިއިރު، މިދިޔަ ހަފުތާގައި ކުޅުނު އެކުވެރިކަމުގެ ފުރަތަމަ މެޗުން ޕޯޗުގަލާއި ސްޕެއިން ވަނީ އެއްވަރުވެފައެވެ.
މި ފަހަރުގެ ޔޫރޯގެ މަރުގެ ގްރޫޕް ކަމަށްވާ ގްރޫޕް އެފް ގައި ޕޯޗުގަލް ހިމެނޭއިރު، އެ ގްރޫޕުގައި ދެން ހިމެނެނީ ފްރާންސް، ޖަރުމަން އަދި ހަންގޭރީއެވެ. ޔޫރޯގައި ޕޯޗުގަލުން ކުޅޭ ފުރަތަމަ މެޗުގައި އަންނަ ހަފުތާގެ އަންގާރަ ދުވަހުގެރޭ ނުކުންނާނީ ހަންގޭރީއާ ދެކޮޅަށެވެ.
