ކޮވިޑަށް ޕޮޒިޓިވްވާ ސާމްޕަލް ފަދަ ތަކެތި އުކާލާއިރު ބައެއް ކްލިނިކްތަކުން އާންމު ކުނިބުނީގެ ތެރޭގައި ބަހައްޓާކަން ފާހަގަކުރެވިފައި ވާކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ މެނޭޖިން ޑިރެކްޓަރ އާދަމް މުޙައްމަދު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުން އެމްޑީ އާދަމް ވިދާޅުވީ، ޕޮޒިޓިވް ސާމްޕަލް އުކާލުމުގައި، ބައެއް ކްލިނިކްތަކުން ޕެކިން ސްޓޭންޑަރޑްއާ ޚިލާފުވެފައި ވާކަމަށެވެ. އެގޮތުން އާންމު ކުނިބުނި ނުވަތަ ޖެނެރަލް ވޭސްޓްގެ ތެރޭގައި އެފަދަ ތަކެތި ބަހައްޓާކަން ފާހަގަކުރެވިފައި ވާކަމަށް ވިދާޅުވިއެވެ.

މިފަދަ އަމަލުތަކާ މެދު ހިތާމަކުރައްވާކަން ފާހަގަކުރައްވަމުން އެމްޑީ ވިދާޅުވީ، އެ ކަންކަމުގެ މައުލޫމާތު ގަބޫލުފުޅު ކުރެއްވުމަށް ވެސް ދަތިވާ ކަމަށެވެ.

އަދި ކޮވިޑްގެ ބަލިމަޑުކަން މިހާ ގޯސްވެފައިވާ ދަނޑިވަޅެއްގައި ހެލްތު ފެސިލިޓީތައް ފަދަ ޕްރޮފެޝަނަލް ސަރވިސް ޕްރޮވައިޑަރއެއްގެ ފުށުން މިބާވަތުގެ ކަންކަން ފެނިގެން ނުވާނެ ކަމަށް ވިދާޅުވިއެވެ.

މިހާރު ވެސް 9 މެޑިކަލް ފެސިލިޓީއެއްގެ ކުނި ވެމްކޯއިން ކަލެކްޓް ކުރަމުން ދާކަން ފާހަގަކުރައްވާ، ކުނި އުކުމުގައި އެއްވެސް ތަނަކުން އާންމު ރައްޔިތުން ނުރައްކަލަކަށް ހުށަހެޅޭނެފަދަ ގޮތަކަށް އަމަލު ނުކުރެއްވުމަށް އާދަމް އިލްތިމާސް ކުރެއްވިއެވެ. އެފަދަ ކަންތައްތައް އެމްޑީ އާދަމް ސިފަކުރެއްވީ ގަސްތުގައި ކުރާ ކަންކަމުގެ ގޮތުގައެވެ.

ކޮވިޑްގެ ކޭހެއް މާލެއިން ފެނުމާއެކު ވެމްކޯއިން އަމަލު ކުރަމުން ދަނީ ޚާއްސަ ރައްކާތެރިކަމުގެ ފިޔަވަޅުތަކާއެކުގައެވެ. އެގޮތުން މިދިޔަ އަހަރު އޭޕްރީލްމަހު ކޮވިޑް ބަލި މާލެތެރެއިން ފެނުމާއެކު ހެލްތު ފެސިލިޓީ ތަކުން ކުނި ނެގުމުގައި ޚާއްސަ އުސޫލެއް ވެމްކޯއިން އަންނަނީ ގެންގުޅެމުންނެވެ.