ކޮވިޑްގެ ކޭސްތައް އިތުރުވާން ފެށުމާއެކު މާލެ ސަރަހައްދުގައި އެޅި ފިޔަވަޅުތަކާއެކު ކޭސްތަކުގެ އަދަދު 14 ދުވަސްތެރޭގައި 341ށް ވެއްޓިއްޖެއެވެ. އޭގެ ކުރީގައި މި އަދަދުތައް ހުރީ 1000ން މަތީގައެވެ.

އަންގާރަ ދުވަހުގެ އިރުއޮއްސި 6:00ން ބުދަ ދުވަހުގެ އިރުއޮއްސި 6:00އާ ހަމައަށް އެޗްޕީއޭއިން އާންމުކޮށްފައިވާ މައުލޫމާތުތައް ދައްކާގޮތުން، މި 24 ގަޑި އިރު ތެރޭގައި ނެގި 5190 ސާމްޕަލްގެ ތެރެއިން ޕޮޒިޓިވްވެފައިވަނީ 341 ސާމްޕަލެވެ.

މިއަދަދާއެކު ރާއްޖޭގައި މިހާތަނަށް ކޮވިޑަށް ޕޮޒިޓިވްވި މީހުންގެ އަދަދު ވަނީ ޖުމްލަ 69،213ށް އަރާފައެވެ.

ނިމިގެންދިޔަ 24 ގަޑި އިރު ތެރޭގައި ޕޮޒިޓިވްވި 341 މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވެފައިވާ 160 މީހެކެވެ. އަދި އަތޮޅު ތެރޭގެ ރަށްތަކުން ޕޮޒިޓިވްވިވެފައިވަނީ 153 މީހެކެވެ. މީގެ އިތުރުން ރިސޯޓްތަކުން 28 މީހަކު ވަނީ ޕޮޒިޓިވްވެފައެވެ.

އެކްޓިވް ކޭސްގެ އަދަދަކީ 15،621އެވެ. އަދި މީގެ ތެރެއިން ހޮސްޕިޓަލުގައި ފަރުވާދެމުން އަންނަނީ 146 މީހަކަށެވެ. ބުދަ ދުވަހު ކޮވިޑުން ފަސޭހަވި 2،179 މީހުންނާއެކު ރާއްޖޭގައި މި ބަލިން ރަނގަޅުވި މީހުންގެ އަދަދު ވަނީ 53،392ށް އަރާފައެވެ.

މި ބަލީގައި ބުދަ ދުވަހު ވަނީ އިތުރު 2 މީހަކު ނިޔާވެފައެވެ. އަދި މިއާއެކު ބަލީގައި ނިޔާވި މީހުންގެ އަދަދު ވަނީ 191ށް އަރާފައެވެ.