ގްރޭޓަރ މާލޭ ކަނެކްޓިވިޓީ ބްރިޖްގެ އަމަލީ މަސައްކަތް މި މަސް ތެރޭގައި ފެށުމަށް ބަޔަކާ ހަވާލުކުރެވޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
ރައީސް ޞާލިހް ވަނީ މާލެ، ވިލިމާލެ، ގުޅިފަޅު އަދި ތިލަފުށި ގުޅާލައި ގްރޭޓަރ މާލޭ ކަނެކްޓިވިޓީ ބްރިޖްގެ ޓެންޑާ ނިމި، އިވެލުއޭޝަން މަސައްކަތް ނިމުމަކާ ހަމައަށް ގޮސްފައިވާ ކަމަށާއި ކުރިއަށް އޮތް ދެ ހަފްތާ ތެރޭގައި ބްރިޖު އިވެލުއޭޓުކޮށް ނިންމައި ވަކި ބަޔަކާ ހަވާލުކުރެވި، ބްރިޖްގެ އަމަލީ މަސައްކަތް ފެށިގެންދާނެ ކަމަށް ވިދާޅުވެފައެވެ. އެހެން ކަމުން މި މަސް ނިމުމުގެ ކުރިން ބްރިޖުގެ އަމަލީ މަސައްކަތް ފެށުމަށް ވަކި ބަޔަކާ ހަވާލު ކުރެވޭނެކަމަށް ރައީސް ވިދާޅުވިއެވެ.
ގްރޭޓަރ މާލޭ ކަނެކްޓިވިޓީ ބްރިޖްގެ މަސަތްކަތަކީ އިންޑިއާގެ އެގްޒިމް ބޭންކުގެ އެހީގައި ކުރިއަށްގެންދާ މަޝްރޫއެއް ކަމުން އެބޭންކާއެކު ބާއްވާ ބައްދަލުވުންތައް ލަސްވުމުގެ ސަބަބުން ބްރިޖްގެ މަސައްކަތަށް ވެސް ލަސްތަކާ ކުރިމަތިލާންޖެހުނު ކަމަށް ރައީސް ވިދާޅުވިއެވެ. އަދި ކޮވިޑް-19ގެ ސަބަބުން ވެސް މިމަޝްރޫއަށް ލަސްތަކެއް ކުރިމަތިވިކަމަށް ރައީސް ވިދާޅުވިއެވެ.
އެގްޒިމް ބޭންކުުގެ އެހީގައި ކުރިއަށްގެންދާ މަޝްރޫއެއް ކަމުން، ބްރިޖްގެ އަމަލީ މަސައްކަތް ކުރިއަށް ގެންދިއުމަށް ހަވާލުކުރެވޭނީ އިންޑިއާގެ ކުންފުންޏަކަށެވެ. ގުޅީފަޅުގައި ޕޯޓު އެޅުމަށް އިތުރަށް ހިއްކަން ޖެހޭބައެއް އޮތްކަން ފާހަގަކުރައްވައި ރައީސް ވިދާޅުވީ އެކަމަށް ފައިނޭންސް ރެއިޒްކުރުމުގެ މަސައްކަތް ކުރިއަށްދާ ކަމަށެވެ/ މިޕޯޓުގެ މަސައްކަތް ވެސް ކުރާނީ އިންޑިއަން އެގްޒިމް ބޭންކުގެކްރެޑިޓް ލައިންގެ ދަށުންނެވެ.
ގްރޭޓަރ މާލޭ ކަނެކްޓިވިޓީ ބްރިޖް މަޝްރޫޢުގެ ދަށުން މާލެ-ވިލިމާލެ-ގުޅިފަޅު އަދި ތިލަފުށި ގުޅާލުމަށްވަނީ ނިންމާފައެވެ. މި މަސައްކަތުގެ ޢަމަލީ މަސައްކަތް ފެށުމުގެ ކުރިން ހަދަންޖެހޭ ސަރވޭއާއި، ބްރިޖްގެ ކުރެހުންތައް ފައިނަލްކުރުމުގެ މަސައްކަތްތައް މިނިސްޓްރީ އޮފް ނެޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރއިން ކުރަމުންދާއިރު، މިޕްރޮޖެކްޓާއެކު ގްރޭޓަރ މާލެ ސަރަޙައްދުން އެންމެ ބޮޑު ބަދަލެއް އަންނާނީ ގުޅިފަޅަށެވެ. ބޯހިޔާވަހިކަމުގެ މަޝްރޫޢުތަކާއެކު، ވިޔަފާރީގެ ގޮތުންވެސް ގުޅިފަޅުވެގެންދާނީ ސަރަޙައްދުގެ އިޤްތިޞާދީ މައި ހަބަށެވެ. މިބޮޑު މަންޒަރު ގުޅެނީ ގްރޭޓަރ މާލެ ކަނެކްވިޓީ ބްރިޖްގެ މަޝްރޫޢާއެވެ. ގުޅިފަޅާއި ބްރިޖް ގުޅާލައި ސަރަޙައްދު ހިމެނޭހެން 6 މިލިއަން ކިއުބިކް މީޓަރުގެ ސަރަޙައްދެއް ހިއްކުމުގެ މަސައްކަތް ނެދަލޭންޑްސްގެ ބޮސްކާލިސް ކުންފުންޏާ ހަވާލުކޮށްގެންވަނީ ކުރިއަށްގެންގޮސްފައެވެ.
