މައްޗަންގޮޅި ދެކުނު ދާއިރާ މަޖިލިސް މެމްބަރު އަހުމަދު ހައިތަމްއާ އޭނާގެ އަނބިކަނބަލުންނަށް ބަޔަކު ހަމަލާދޭން އުޅެފިއެވެ.
ހައިތަމް ވިދާޅުވީ، އޭނާ ދިރިއުޅުވާ އެޕާރޓްމެންޓް ހުންނަ އިމާރާތުން ބަޔަކު އޭނާއަށާއި އަނބިކަނބަލުންނާ ދިމާކޮށް ބިރުދައްކައި ހަމަލާދޭން މަސައްކަތްކުރި ކަމަށެވެ. އެޕާޓްމެންޓަށް ވަންނަން މަސައްކަތް ކުރި ކަމަށްވެސް ހައިތަމް ވިދާޅުވިއެވެ. ހައިތަމްގެ އަނބިކަނބަލުން އިންނެވީ އެއްމާބަނޑު ދެކުދިންނަށް ބަލިވެ ކަމަށާއި، މިކަމުގެ ސަބަބުން އަނބިކަނބަލުންނަށް ލިބުނު ޝޮކާއެކު ބަނޑަށް ތަދު އަރައި، މިވަގުތު އޭޑީކޭގައި ފަރުވާ ހޯދަމުން އަންނަ ކަމަށް ހައިތަމް ވިދާޅުވިއެވެ.
ފުލުހުން ބުނީ މި މައްސަލަ ފުލުހުން ތަހުގީގު ކުރަމުން އަންނަ ކަމަށެވެ.
މަޖިލީސް މެންބަރަކަށް ބިރުދެއްކުމުގެ ހާދިސާއެއް ހިނގީ މަޖިލީސް ގޮއްވާލާނެ ކަމަށް ބުނި މައްސަލައެއްގައި މީހަކު ހައްޔަރުކޮށް ބަންދަށް 15 ދުވަސް ޖަހާފައިވަނިކޮށެވެ.
މެއި 6ވަނަ ދުވަހު ރައްޔިތުންގެ މަޖިލީހުގެ ރައީސް އަވަހާރަކޮށްލުމަށް ދިން ހާދިސާއަށް މަހެއްވެގެންދާއިރު، މައްސަލަ އަދިވެސް ގެންދަނީ ތަހުގީގު ކުރަމުންނެވެ. މަޖިލީހުންވަނީ މިކަމާ ގުޅިގެން ޚާއްސަ ތަހުގީގެއް ހިިންގަންވެސް ފަށާފައެވެ.
