އަންނަ ސީޒަނުގައިވެސް ބާސެލޯނާގެ ކޯޗެއްގެ ގޮތުގައި މަސައްކަތްކުރާނީ ނެދަލެންޑްސްގެ ރޮނާލްޑް ކޫމަން ކަމަށް އެ ކުލަބުގެ ރައީސް ޖޮއާން ލަޕޯޓާ ވިދާޅުވެއްޖެއެވެ.
ބާސާގެ ކޯޗުގެ މަގާމާ ކޫމަން ހަވާލުވީ މިދިޔަ އަހަރުގެ އޯގަސްޓް މަހުގެ ތެރޭގައި ދެ އަހަރުގެ އެއްބަސްވުމެއްގެ ދަށުންނެވެ. އޭރު ބާސާގެ ރައީސަކަށް ހުރީ ޖޯސެފް މާރިއާ ބާޓޮމެއުއެވެ. އެކަމަކު މިދިޔަ އަހަރުގެ އޮކްޓޯބަރު މަހުގެ ތެރޭގައި ބާޓޮމެއު މަގާމުން އިސްތިއުފާދީފައިވާއިރު، ބާސާގެ އައު ރައީސްގެ މަގާމަށް ލަޕޯޓާ ވަނީ އިންތިޚާބުކޮށްފައެވެ.
މީގެ ކުރިން ބައެއް މީޑިއާތަކުން ވަނީ ބާސާގެ ކޯޗަކަށް އެ ޓީމުގެ ލެޖެންޑް ޒަވީ ހެނާންޑޭޒް ގެންނަން ލަޕޯޓާ ބޭނުންވާ ކަމަށް ރިޕޯޓުކޮށްފައެވެ. އެކަމަކު ދާދި ފަހުން ދިން އިންޓަވިއުއެއްގައި ލަޕޯޓާ ވަނީ އަންނަ ސީޒަނުގައިވެސް ބާސާއަށް އިރުޝާދުދޭނީ ކޫމަން ކަމަށް ބުނެފައެވެ.
ބާސާގައި ކޫމަން މަޑުކުރާއިރު، އެ ޓީމުން އަންނަނީ މި ޓްރާންސްފާ ބާޒާރުގައި ބައެއް މުހިންމު ކުޅުންތެރިންގެ ސޮއި ހޯދަމުންނެވެ. އެގޮތުން ދާދި ފަހުން އެ ޓީމުން ވަނީ މެންޗެސްޓާ ސިޓީއަށް ކުޅެމުން އައި އާޖެންޓީނާގެ ތަޖުރިބާކާރު ފޯވާޑް ސާޖިއޯ އަގުއޭރޯ އާއި ސްޕެއިނުގެ ޒުވާން ޑިފެންޑަރު އެރިކް ގާސިއާގެ ސޮއި ހޯދާފައެވެ. މީގެ އިތުރުން ކޫމަން ބޭނުންވާ ދެ ކުޅުންތެރިން ކަމަށްވާ ލިޔޯނަށް ކުޅެމުން އަންނަ ނެދަލެންޑްސްގެ ފޯވާޑް މެމްފިސް ޑިޕާއި އާއި ލިވަޕޫލް ދޫކޮށްލަން ނިންމާފައިވާ ނެދަލެންޑްސްގެ މިޑްފީލްޑަރު ޖިއޮޖީނިއޯ ވައިނަލްޑަމް ވަރަށް އަވަހަށް އެ ޓީމާ ގުޅޭނެ ކަމަށް ރިޕޯޓުތައް ބުނެއެވެ.
އަންނަ ސީޒަނުގައިވެސް ކޫމަން ބާސާއަށް އިރުޝާދުދޭއިރު، ކޫމަނުގެ އިރުޝާދުގެ ދަށުން ބާސާއިން ވަނީ މި ސީޒަނުގެ ސްޕެނިޝް ކަޕް ކާމިޔާބުކޮށްފައެވެ.
