މި އަހަރު ބޭއްވުމަށް ހަމަޖެހިފައިވާ "ޔޫރޯ 2020" އަށް ރާއްޖެޓީވީން ގެނެސްދޭ "މައިލޯ ޔޫރޯ ފޯރި 2021" ޝޯގެ ސްޕޮންސަރުންނާއެކު އެއްބަސްވުމުގައި ސޮއިކޮށްފިއެވެ.

"މައިލޯ ޔޫރޯ ފޯރި 2021" ޝޯގެ ޓައިޓަލް ސްޕޮންސަރަކީ މައިލޯއެވެ. ބުރާސްފަތި ދުވަހު ބޭއްވި ރަސްމިއްޔާތެއްގައި ސްޕޮންސަރުންނާއެކު ރާއްޖެޓީވީން އެއްބަސްވުމުގައި ސޮއިކުރިއިރު، މައިލޯގެ ފަރާތުން އެއްބަސްވުމުގައި ސޮއިކުރެއްވީ އެކުންފުނީގެ ބިޒްނަސް ޑިވެލޮޕްމެންޓް މެނޭޖަރ މޯލްޑިވްސް ސޭލްސް، ދިޝާން ވިޖެޔަވަރްދެނާއެވެ. އަދި ރާއްޖެޓީވީގެ ފަރާތުން ސޮއިކުރައްވާފައިވަނީ ހެޑް އޮފް ކޯޕަރޭޓް ސަރވިސް އައިމިނަތު ރީޝާއެވެ.

"މައިލޯ ޔޫރޯ ފޯރި 2021" ގެ ކޯ ސްޕޮންސަރުންނަކީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި ޕިއްޒާ ބޯނާއެވެ. ޝޯގެ ޑިޖިޓަލް ޕާޓްނަރަކީ ރާއްޖޭގެ އެންމެ ބޮޑު އެއް މުވާސަލާތީ ކުންފުނިކަމަށްވާ ދިރާގެވެ. އަދި ރާއްޖޭގެ ގައުމީ ބޭންކު، ބޭންކް އޮފް މޯލްޑިވްސް (ބީއެމްއެލް) އަކީ މި ޝޯގެ އޮފިޝަލް ބޭންކިން ޕާޓްނަރެވެ.

މި އަހަރު ރާއްޖެޓީވީން ގެނަސްދޭ "މައިލޯ ޔޫރޯ ފޯރި 2021" ޝޯގެ އޮފިޝަލް އިންޓީރިއާ ޕާޓްނަރަކީ ޕްރޮކްސީއެވެ. އަދި އޮފިޝަލް ކޭޓަރިން ޕާޓްނާ އަކީ ޗީބޯއެވެ. މީގެ އިތުރުން މި ޝޯ ރާއްޖެޓީވީން ގެނަސްދެނީ ކުޅިވަރާ ބެހޭ ވުޒާރާއާ ގުޅިގެންނެވެ.

މި މަހުގެ 11 ވަނަ ދުވަހު ފަށާ ޔޫރޯގެ ރާއްޖޭގެ އެކްސްކްލޫސިވް މީޑިއާ ޕާޓްނަރުކަން ރާއްޖެޓީވީން ނަގާފައިވާއިރު، ރާއްޖެޓީވީން ގެނެސްދޭ ކަވަރޭޖުގައި ތަޖުރިބާކާރު އެނަލިސްޓުން ހަރަކާތްތެރިވާނެއެވެ. އެ އެނެލިސްޓުންނަކީ ތަޖުރިބާކާރު ކޯޗު އަދި މި ވަގުތު ރާއްޖޭގެ ފުރަތަމަ ޑިވިޝަނުގައި ވާދަކުރަމުން އަންނަ ސުޕަ ޔުނައިޓެޑް ސްޕޯޓްސް (ސަސް) އާ ހަވާލުވެހުރި މުޙައްމަދު ޝިޔާޒް (މޯހަން) އާއި، ޔުނައިޓެޑް ވިކްޓަރީ (ޔޫވީ) ގެ ކޯޗު އިހުސާން އަބްދުލް ޣަނީ (ސާންތި) އާއި، ކުރީގެ މަޝްހޫރު ގޯލްކީޕަރު އިސްމާޢީލް ޒަރިޔަންދު އާއި، ޓީސީ ސްޕޯޓްސް ކުލަބުގެ ކޯޗު މުޙައްމަދު ނިޒާމް (ނިޒާމްބެ) އަދި ސްޕޯޓްސް ކޯޕަރޭޝަނުގެ މެނޭޖިން ޑިރެކްޓަރު އަދި ރާއްޖޭގައި އުފެދުނު އެންމެ މޮޅު އެއް ގޯލްކީޕަރު މައުރޫފް އަޙްމަދު (މާއްޓޭ) ގެ އިތުރުން ތަޖުރިބާކާރު ނޫސްވެރިޔާ އަދި ކުޅިވަރު އެނަލިސްޓެއްގެ ގޮތުގައި ރާއްޖޭގައި ފާހަގަކޮށްލެވޭ އިމާދު ލަތީފެވެ.

ޔޫރަޕުގެ ގައުމުތައް ވާދަކުރާ ޔޫރޯގައި މުޅިއެކު 24 ގައުމު ވާދަކުރާއިރު، މި މުބާރާތް ކުރިއަށްދާނީ ޖުލައި މަހުގެ 11 ވަނަ ދުވަހުގެ ނިޔަލަށެވެ. އަދި މި މުބާރާތުގައި ޖުމްލަ 51 މެޗު ކުޅޭއިރު، މި ހުރިހާ މެޗެއްވެސް ރާއްޖެޓީވީން ދައްކާނެއެވެ. އަދި މެޗުތަކުގެ ކުރިންނާއި މެދުތެރެއިންނާއި ފަހުންވެސް މެޗުތައް ދިރާސާކުރުމުގެ އެކި ޝޯތައްވެސް ރާއްޖެޓީވީން ގެނެސްދިނުމަށް ވަނީ ހަމަޖެހިފައެވެ. އަދި މެޗުތައް "ރާއްޖެ.އެމްވީ" އިން ލައިވް ސްޓްރީމް ކުރާނެއެވެ.

މި ފަހަރުގެ ޔޫރޯ ރާއްޖެޓީވީން ބްރޯޑްކާސްޓް ކުރާއިރު، 2016 ވަނަ އަހަރު ފްރާންސްގައި ބޭއްވި ޔޫރޯވެސް ރާއްޖެޓީވީން ވަނީ ބްރޯޑްކާސްޓް ކޮށްފައެވެ. އަދި އެ ފަހަރު ރާއްޖެޓީވީން ވަނީ ޔޫރޯގެ ވަރަށް ފުރިހަމަ ކަވަރޭޖެއް ގެނެސްދީފައެވެ.