ޕެންޑަމިކާއި ގުޅޭ ބައިނަލްއަގްވާމީ ޓްރީޓީ އެއް އެކުލަވާލުމުގެ މަސައްކަތް ވަރަށް އަވަހަށް ފަށަންޖެހޭ ކަމަށް، ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ގެ ޑިރެކްޓަރ ޖެނެރަލް ޓެޑްރޯސް ވިދާޅުވެއްޖެއެވެ.
ޓެޑްރޯސް ވިދާޅުވީ, "އިންޓަރނޭޝަނަލް ޓްރީޓީ އޮން ޕެންޑަމިކް ޕްރިޕެއަރޑްނެސް އެންޑް ރެސްޕޯންސް"ގެ ނަމުގައި ޓްރީޓީއެއް އެކުލަވާލުމަށް ބައިނަލްއަގްވާމީ ފެންވަރުގައި މަޝްވަރާކޮށް އެކަމަށް އަމަލީ ސިފައެއް ގެންނަންޖެހޭ ކަމަށެވެ.
މީގެއިތުރުން ޑަބްލިޔުއެޗްއޯގެ މިނިސްޓީރިއަލް އެސެމްބަލީ ނިންމާލައްވަމުން، ޓެޑްރޯސް ވަނީ އެޖަމިއްޔާ ދެމެހެއްޓެނެވި ގޮތެއްގައި ހިންގުމަށް ފަންޑު ބޭނުންވާކަމަށް ވިދާޅުވެފައެވެ.
ޑަބްލިޔުއެޗްއޯ މިހާރަށްވުރެ ހަރުދަނާކޮށް، ބައިނަލްއަގްވާމީ ފެންވަރުގައި ސިއްހީ ސަލާމަތްތެރިކަމާއި ރައްކާތެރިކަން ކަށަވަރުކޮށްދޭންޖެހޭ ކަމަށާއި، އަދި އެފަދަ ގޮތަކަށް ކަންކަން ކުރުމަށް ޓްރީޓީއެއް އެކުލަވާލަންޖެހޭ ކަމަށް ޓެޑްރޯސް ވިދާޅުވިއެވެ. އަދި މެމްބަރު ގައުމުތަކުގެ ގުޅުން މިހާރަށްވުރެ ބޮޑަށް ރަނގަޅުކުރަންޖެހޭ ކަމަށްވެސް ޓެޑްރޯސް ވިދާޅުވިއެވެ.
ކޮވިޑް-19ގެ ޕެންޑަމިކްގައި ދުނިޔެ އުޅޭތާ އަހަރަކަށްވުރެ ގިނަ ދުވަސް މިވަނީ ވެފައެވެ. މިއީ ފަހުގެ ތާރީހެއްގައި ދުނިޔެއަށް ކުރިމަތިވި އެންމެ ބޮޑު، އަދި އެންމެ ބޮޑަށް ދިގުލައިގެންދާ މިފަދަ ވަބާއެވެ.
