މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ރައީސްގެ މަގާމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ސީނިއާ ނައިބު ރައީސް އަލީ އުމަރު (އައްޔަ) އާއި، ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ގެ ރައީސް މޫސާ ނާޝިދު (މޫސަ) އަދި ސްވިމިން އެސޯސިއޭޝަން އޮފް މޯލްޑިވްސްގެ ރައީސް މުޙައްމަދު އަބްދުއްސައްތާރު (ޗަމްޕީ) ކުރިމަތިލައްވައިފިއެވެ.
އަންނަ ޖޫން މަހުގެ 10 ވަނަ ދުވަހު އެމްއޯސީގެ އިންތިޚާބު ބާއްވާއިރު، މަގާމުތަކަށް ކުރިމަތިލުމުގެ ފުރުސަތު ހޮނިހިރު ދުވަހު ވަނީ ހަމަވެފައެވެ. މި މުއްދަތުގައި ރައީސްގެ މަގާމަށް އައްޔަ، މޫސަ އަދި ޗަމްޕީ ކުރިމަތިލެއްވިއިރު، އައްޔަ އާއި މޫސަ ވަނީ ނައިބު ރައީސްގެ މަގާމަށްވެސް ކުރިމަތިލައްވާފައެވެ.
ދެން ނައިބު ރައީސްގެ މަގާމަށް ކުރިމަތިލެއްވީ ހޭންޑްބޯލް މޯލްޑިވްސްގެ ރައީސް އަޙްމަދު އިސްމާޢީލާއި، އެތުލެޓިކްސް އެސޯސިއޭޝަން އޮފް މޯލްޑިވްސްގެ ރައީސް މުޙައްމަދު ތޮލާލުގެ އިތުރުން ކްރިކެޓް ބޯޑް އޮފް މޯލްޑިވްސްގެ ރައީސް މުޙައްމަދު ފައިސަލެވެ. މީގެ ތެރެއިން ފައިސަލް ކުރިމަތިލެއްވީ ނޮން-އޮލިމްޕިކް ސްޕޯޓްސްގެ ސްލޮޓެއްގައެވެ.
އަންނަ މަހު އެމްއޯސީގެ އިންތިޚާބު ބާއްވާއިރު، އެ ކޮމިޓީން މި ފަހަރު މެންބަރުން އިންތިހާބުކުރަނީ މި އަހަރުން ފެށިގެން 2025 ވަނަ އަހަރުގެ ނިޔަލަށެވެ.
މި ފަހަރުގެ އިންތިޚާބުގައި ރައީސްގެ މަގާމަށް އައްޔަ، މޫސަ އަދި ޗަމްޕީ ވާދަކުރައްވާއިރު، މިދިޔަ ދެ ދައުރުގައި އެ ކޮމިޓީގެ ރައީސްގެ މަގާމު ފުރުއްވި މުޙައްމަދު ޝަވީދު ވަނީ އިތުރު ދައުރަކަށް ކުރިމަތިނުލައްވާނެކަން މީގެ ކުރިން އިއުލާން ކުރައްވާފައެވެ.
