އެމްޑީޕީން މިވަގުތު ކުރަމުންދާ އެންމެ މުހިންމު މަސައްކަތަކީ ރައްޔިތުންގެ މަޖިލީހުގެ ރައީސް އަދި އެޕާޓީގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތަހުގީގު ހިނގަމުންދާ ގޮތް ގާތުން ބެލުން ކަމަށާއި މިކަމުގެ ވަށައިގެންވާ ކަންކަން ސާފުވަންދެން ހުއްޓުމެއްނެތި އެމްޑީޕީން މިމައްސަލަ ބަލަމުންދާނެ ކަމަށް އެޕާޓީން ބުނެފިއެވެ.

ރައީސް ނަޝީދަށް ދިން ޓެރަރިސްޓް ހަމަލާ އާ ގުޅިގެން އެމްޑީޕީން ވަނީ ބުރާސްފަތި ދުވަހުގެ ރޭ ނޫސްވެރިންގެ ބައްދަލުވުމެއް ބާއްވާފައެވެ. އެމްޑީޕީގެ ޗެއަރ ޕާސަން ހަސަން ލަތީފް އާއި އެޕާޓީގެ ނައިބު ރައީސް މުހައްމަދު ޝިފާޒު އަދި ސްޕޯކްސް ޕާސަން އިމްތިޔާޒު ފަހުމީ ބައިވެރިވެވަޑައިގެންނެވި މިބައްދަލުވުމުގައި ތިން ބޭފުޅުންވެސް ވަނީ މިމައްސަލާގައި ސާފުވާންޖެހޭ ކަންކަން ސާފުވަންދެން މިކަން ހިނގަމުންދާ ގޮތް އެމްޑީޕީން ބަލަމުންދާނެ ކަމަށް ވިދާޅުވެފައެވެ. އެކަމުގެ ޔަގީންކަން ދެއްވަމުން ވިދާޅުވީ މީގެކުރިން ހިނގާފައިވާ މިފަދަ މައްސަލަތަކުގައި ކަންކަން ހިނގާދިޔަ ގޮތަށް މިމައްސަލާގައި ކަންކަން ދިޔުމަށް އެމްޑީޕީން ދޫކޮށް ނުލާނެކަމަށެވެ.

ހަސަން ލަތީފް ވިދާޅުވީ މިވަގުތު އެމްޑީޕީން އެންމެ މުހިންމު އިސްކަމެއްދީގެން ކުރަމުން އަންނަނީ ދެ ކަމެއް ކަމަށެވެ. އޭގެތެރެއިން އެއް ކަމަކީ ރައީސް ނަޝީދު އަވަހާރަކޮށްލުމަށް ދެވުނު ހަމަލާގެ ތަހުގީގު ފުލުހުން ކުރަމުންދާ ގޮތް އެމްޑީޕީން ގާތުން ބަލަމުންދިޔުމެވެ. އަނެއްކަމަކީ ރައީސް ނަޝީދުގެ ސެކިޔުރިޓީ ފެއިލްވި ގޮތް ދެނެގަތުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީން ކުރިޔަށްގެންދާ އިންކުއަރީއެވެ. މިދެކަންތައްކުގެ އަލީގައި ރައީސް ނަޝީދަށް ހަމަލާދިން މަގްސަދާއި އެކަމުގެ އަޑީގައި ތިބި މީހުންނާއި މިކަމަށް ފައިސާ ޚަރަދު ކުރި މީހުން އެނގިގެންދާނެ ކަމަށް އެމްޑީޕީން ގަބޫލުކުރެއެވެ.

މެއި މަހުގެ 6 ވަނަ ދުވަހުގެ ރޭ ރައީސް ނަޝީދު އަވަހާރަކޮށްލުމަށް ދިން ޓެރަރިސްޓް ހަމަލާގެ އެންމެ ފުނަށް ވާސިލްގެ މިކަމުގައި ވަށައިގެންވާ ކަންކަން ހޯދުމަކީ އެމްޑީޕީން މިވަގުތު އެންމެ އިސްކަމެއްދޭ ކަމެވެ. އެމްޑީޕީގެ ޗެއަރ ޕާސަން ހަސަން ލަތީފް ވިދާޅުވީ މިމައްސަލާގައި ފުލުހުން ހިންގަމުންދާ ތަހުގީގު އެމްޑީޕީން ގާތުން ބަލަމުން ގެންދާކަމަށާއި ތަހުގީގެއްގައި ތިން ވަނަ ފަރާތަކަށް ލިބެންހުރި ހުރިހާ ތަފްސީލެއް ހޯދުމުގެ ކަންކަން އެމްޑީޕީން ކުރަމުން އަންނަ ކަމަށެވެ.

ހަސަން ލަތީފް ވިދާޅުވީ ފުލުހުން ހިންގާ ތަހުގީގުތަކަކީ އޭގެ ހުރިހާ މައުލޫމާތެއް ތިން ވަނަ ފަރާތަށް ހާމަކުރާނެ ތަހުގީގުތަކެއް ނޫން ކަމަށެވެ. އެހެންކަމުން އެމްޑީޕީއަށް ލިބެނީ ފުލުހުން ތަހުގީގު ކުރިޔަށް ގެންދާ ގޮތާއި އަދި ކުރަމުން ގެންދާ މަސައްކަތާއި އަދި އެކަންކަން ކުރަމުން ގެންދާ އުސޫލުގެ ތަފްސީލުތައް ކަމަށެވެ. އެކަން ގާތުން ބެލުމުގެ ފުރުސަތު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އޮތީ ސަރުކާރުގެ ތެރެއިން ފަހިކޮށްދެއްވާފައި ކަމަށް ހަސަން ލަތީފް ވިދާޅުވިއެވެ.

ހަސަން ލަތީފް ވިދާޅުވީ ޕާޓީން މިކަން ބަލަމުންދާނެ ކަމާދޭތެރޭ ޕާޓީގެ އެއްވެސް މެމްބަރަކުވެސް އަދި ދިވެހި ރައްޔިތަކުވެސް ޝައްކުކުރައްވާނެ ކަމެއް ނެތްކަމަށެވެ. އަދި މިތަހުގީގު ވާނުވާ ނޭންގޭ ގޮތަށް ކުރިޔަށް ގެންދިޔުމުގެ ފުރުސަތު އެމްޑީޕީން ނުދޭނެކަމަށް ހަސަން ލަތީފް ވިދާޅުވިއެވެ.

ހަސަން ލަތީފް ވިދާޅުވީ އެމްޑީޕީން ކުރާ މަސައްކަތަކީ ފުލުހުން ތަހުގީގު ކުރިޔަށް ގެންދަނީ ރަނގަޅު ޓްރެކްގައިތޯ ބެލުން ކަމަށެވެ. ރަނގަޅު ޓްރެކްގައި ތަހުގީގު ހިނގާކަމަށް ނުފެންނަ ހިސާބުން އެކަން އެމްޑީޕީގެ މެމްބަރުންނާއި ހިއްސާކުރަމުންދާނެ ކަމަށާއި ރައްޔިތުންނާ ހަމައަށްވެސް އެކަން ހިއްސާކުރާނެ ކަމަށެވެ. އަދި އެކަން އެހެން ވިޔަ ނުދިނުމަށްޓަކައި އޭގެކުރިން ކުރަންޖެހޭ މަސައްކަތްވެސް ކުރާނެ ކަމަށް ހަސަން ލަތީފް ވިދާޅުވިއެވެ.

އެމްޑީޕީގެ ނައިބު ރައީސް މުހައްމަދު ޝިފާޒު ވިދާޅުވީ ފާއިތުވި ތަނުގައި މިފަދަ ކަންކަން ހިނގާފައިވާ ގޮތުން ރައްޔިތުންގެ މެދުގައި މިކަން ރަނގަޅަށް ކުރިޔަށްދާނެކަމުގެ ކަންބޮޑުވުންތަކެއް އެބަހުރި ކަމަށެވެ. ނަމަވެސް ސަރުކާރުގައި އެމްޑީޕީ އޮވެ ކަންކަން ކުރިޔަށްދާގޮތް ގާތުން ބެލުމުގެ ފުރުސަތު އެމްޑީޕީއަށް ލިބިފައިވާއިރު އެމައްސަލަތައް ދިޔަ ގޮތަށް މިމައްސަލަ ދިޔުމުގެ ފުުރުސަތު އެމްޑީޕީން ނުދޭނެކަމަށް ޝިފާޒު ވިދާޅުވިއެވެ.

އެމްޑީޕީގެ ޗެއަރ ޕާސަން އިމްތިޔާޒު ފަހުމީ ވިދާޅުވީ ރައީސް ނަޝީދަށް ދިން ހަމަލާއަކީ އެމަރޖެންސީ ކަމެއްގެ ގޮތުގައި އެޕާޓީން ދެކޭކަމަށެވެ. އަދި ރައީސް ނަޝީދަށް ދިން ހަމަލާއަކީ އާންމު މެމްބަރުންގެ ވަރަށް ބޮޑު ކަންބޮޑުވުމެއް އެކަމުގައިވާ ކަމެއްކަމަށް އިންތި ވިދާޅުވިއެވެ. މިމައްސަލައިގެ ތަހުގީގު ނުވަތަ ރައީސް ނަޝީދަށް އިންސާފު ލިބިގެންދިޔުމަކީ ކުރިޔަށް އޮތްތަނުގައި މިފަދަ ކަންކަމަށް އިންސާފު ލިބޭނެކަމާމެދު ރައްޔިތުންގެ މެދުގައި އިތުބާރުވެސް އުފެދިގެންދާނެ ކަމެއްކަމަށް އިންތި ވިދާޅުވިއެވެ.

19 ވަނަ ރައްޔިތުންގެ މަޖިލީހުގައި އެމްޑީޕީގެ 65 މެމްބަރުން ތިއްބަވައެވެ. ރައްޔިތުންގެ މަޖިލީހުން ފާސްކޮށްގެން ތާރީޚުގައި ފުރަތަމަ ފަހަރަށް އިންކުއަރީއެއް ހެދުމުގެ މަސައްކަތް ސަލާމަތީ ޚިދުމަތްތަކާއި ބެހޭ ކޮމިޓީން އަންނަނީ ކުރަމުންނެވެ. އެކޮމިޓީގައި އެމްޑީޕީގެ 8 މެމްބަރުން ތިއްބަވައެވެ. މިކޮމިޓީން އިންކުއަރީ ކުރިޔަށް ގެންދަނީ ރައީސް ނަޝީދުގެ ސެކިޔުރިޓީ ފެއިލްވެފައިވާ ގޮތާއި ގުޅޭގޮތުންނެވެ. އެކޮމިޓީގެ އިންކުއަރީގެ މަސައްކަތްތައް ޖޫން މަހުގެ 30 ގެ ކުރިން ނިންމުމަށް އަންނަނީ މަސައްކަތްކުރަމުންނެވެ.

ސަލާމަތީ ޚިދުމަތްތަކާއި ބެހޭ ކޮމިޓީން މަސައްކަތް ކުރަމުންއަންނަނީ އިންކުއަރީ ހިންގުމަށް ހުރިހާ އިޖުރާއަތްތަކަކާއި އުސޫލުތަކެއް ދެނެގަނެ އެއިޖުރާއަތުތަކާއި އުސޫލުތަކުގެ ތެރެއިންނެވެ. ހަސަން ލަތީފް ވިދާޅުވީ ޕާލަމަންޓްރީ އިންކުއަރީ ހިންގާއިރު މިއިންކުއަރީ ކުރިޔަށްދާނީ އެކި މަރުހަލާތަކަށް ބަހާލައިގެން ކަމަށެވެ.

ކޮމިޓީގެ މަސައްކަތްތައް ނިންމުމަށްފަހު އިންކުއަރީ ރިޕޯޓް އެކުލަވާލާނެއެވެ. މިމައްސަލައަކީ ހައްސާސް މައްސަލައަކަށްވާތީ ކޮމިޓީގެ ބައްދަލުވުން ކުރިޔަށްދަނީ ސިއްރުކޮށްގެންނެވެ. އަދި ކޮމިޓީގެ މުގައްރިރު އާންމުކުރާ މައުލޫމާތުތަަކަކީވެސް ކޮމިޓީން ފާސްކޮށްގެން އާންމުކުރަމުންދާ މައުލޫމާތުތަކެއް ކަމަށް ހަސަން ލަތީފް ވިދާޅުވިއެވެ. އެހެންކަމުން އިންކުއަރީ ކުރިޔަށް ގޮސްފައިވާ ހިސާބާ ގުޅޭ އެއްވެސް މައުލޫމާތެއް ނޫސްވެރިންގެ ބައްދަލުވުމުގައި ހަސަން ލަތީފް ހާމައެއްނުކުރައްވައެވެ.

މީގެއިތުރުން ރައީސް ނަޝީދަށް ދެވުނު ހަމަލާގެ އެއްވެސް މައުލޫމާތެއް އިންޓަލް އަށް ލިބިފައިނުވުމާއި ޑިފެންސް މިނިސްޓަރ މާރިޔާ އަހުމަދު ދީދީ އާ މިހަމަލާ އާ ގުޅުވައި ދެކެވޭ ވާހަކަތަކަށް އިންކުއަރީ ހިނގަމުންދާކަމަށް ވިދާޅުވެ އެމްޑީޕީގެ ލީޑަރ ޝިޕުން ސީދާ ޖަވާބެއް ނުދެއްވައެވެ.

ހަސަން ލަތީފް ވިދާޅުވީ ކޮމިޓީގެ އިންކުއަރީ ނިމިގެންދާއިރު މިހަމަލާއަށް ފަންޑުކުރި މީހުންނާއި މިކަމުގައި ބައިވެރިވި މީހުންފަދަ މުހިންމު މައުލޫމާތުތައް އެނގިގެންދާނެ ކަމަށެވެ. އަދި ސެކިޔުރިޓީ ފެއިލްވި ގޮތްފަދަ މައުލޫމާތުތައްވެސް އެނގިގެންދާނީ އިންކުއަރީގެ ފަހުން ކަމަށް ހަސަން ލަތީފް ވިދާޅުވިއެވެ. އެހެންކަމުން މިހާރު ދެކެވެމުންދާ އެއްވެސް ވާހަކައަކަށް ޕާޓީގެ ލީޑަރ ޝިޕުން ޖަވާބު ދީފައެއްނުވެއެވެ.

އެމްޑީޕީގެ ލީޑަރ ޝިޕްގެ ލެވެލްގެ ގިނަ މެމްބަރުންތަކެއް ހިމެނިގެން ކުރިޔަށްގެންދާ އިންކުއަރީއަކަށްވާއިރު މިއީ ގަބޫލުކުރެވޭ ފެންވަރުގެ އިންކުއަރީއަކަށް ވެގެންދާނެކަމަށާއި އެކަން ޕާޓީން ކަށަވަރުކުރާނެ ކަމަށްވެސް މިބޭފުޅުން ވިދާޅުވިއެވެ.

އެމްޑީޕީއަށް ސަރުކާރުގެ ބަސް ބުނުމުގެ ހިސާބުގައި އޮވެ ރައްޔިތުންގެ މަޖިލީހުގެ ސުޕަރމެޖޯރިޓީގައި އޮވެ ރައީސް ނަޝީދަށް ދިން ހަމަލާ ކުރިން ހިނގާފައިވާ މިފަދަ މައްސަލަތަކުގެ އަޑި ނުހޯދި ދިޔަގޮތަށް ދިޔުމުގެ ފުރުސަތު ނެތްކަމަށް ހަސަން ލަތީފް ވިދާޅުވިއެވެ.