ކޮވިޑް-19 އިން ރައްކާތެރިވުމަށް އަތޮޅުތެރޭގެ 8 ރަށެއްގައި މަގުމައްޗާއި އާންމު ތަންތަނަށް ނުކުމެއުޅުމާއި އެއްގަމު އުޅަނދުފަހަރު ދުއްވުން މަނާ ވަގުތު ކަނޑައަޅައި ހަވީރު 04:00ން ފަތިހު 04:00ށް ކާފިއު އިއުލާނުކޮށްފިއެވެ.
ހެލްތު ޕްރޮޓެކްޝަން އެޖެންސީން އާންމުކޮށްފައިވާ އިއުލާނެއްގައި ބުނެފައި ވަނީ ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ވަކި ގޮތެއް އަންގަންދެން އައްޑޫ ސިޓީ، ފުވައްމުލައް ސިޓީ، ލ.ގަމު، ގދ. ތިނަދޫ، ގއ. ދާންދޫ، އދ. މާމިގިލި، ފ.ނިލަންދޫ އަދި ފ.ފީއަލީގައި ކާފިއު އިއުލާނުކުރަން ނިންމާފައިވާކަމަށެވެ. މި ވަގުތުގައި ޕޮލިހުންގެ ހުއްދައާއެކު ޑެލިވަރީގެ ޚިދުމަތް ދެވޭނެކަމަށް އެޗްޕީއޭ އިން ބުނެއެވެ. މި ރަށްރަށުގައި ކާފިއު އިއުލާނުކޮށްފައިވާ ވަގުތު ސިފައިންނާއި ފުލުހުން އަދި ޞިއްޙީ ޚިދުމަތްދޭ އިދާރާތަކުގެ މުވައްޒަފުންނާއި، އެ މުވައްޒަފުން ދުއްވާ އުޅަނދުފަހަރުތަކާއި އެމްބިއުލަންސް އަދި ރަށްރަށުގެ ޓާސްކުފޯހުގެ ފާސް ލިބިފައިވާ ފަރާތްތަކުގެ އިތުރުން އެމެޖެންސީކޮށް ޞިއްޙީ ޚިދުމަތް ހޯދަންޖެހޭ ފަރާތްތައް އިސްތިސްނާވާނެ ކަމަށް އެޗްޕީއޭ އިން ބުނެއެވެ.
ކޮވިޑްގެ ސަބަބުން މޮނިޓަރިންގެ ހާލަތުގައި އޮތް ރަށްރަށުގެ ތެރެއިން ބައެއް ރަށްރަށުގައި ފިޔަވަޅުތައް ވަރުގަދަކޮށްފައިވާ މިހާރު 74 ރަށް ވަނީ މޮނިޓަރިންނަށް ލާފައެވެ. އަތޮޅުތެރޭގެ ކޭސްތައް އިތުރުވާން ފަށާފައިވާއިރު، މޮނިޓަރިންގެ ހާލަތަށް ގެނެވޭ ރަށްރަށުގައި ފިޔަވަޅުތައް އަޅަން އެޗްްޕީއޭ އިން ވަނީ ނިންމާފައެވެ. އެގޮތުން މެއި 26 ވަނަ ދުވަހުން ފެށިގެން ވަކިގޮތެއް އަންގަންދެން، މޮނިޓަރިންގެ ހާލަތަށް ގެނެވޭ ރަށްރަށުގައި ރޭގަނޑު 09:00ން ފެށިގެން ފަތިހު 04:00ށް އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުތުން ވަނީ މަނާކޮށްފައެވެ. ރަށުގައި ބަލިފެތުރިފައިވާ ހާލަތަށް ބަލައި މި ފިޔަވަޅު އަޅައިފައިވާ ވަގުތަށް ބަދަލުގެނެވޭނެކަމަށް އެޗްޕީއޭ އިން ބުނެއެވެ.
އޭގެ އިތުރުން ޒަރޫރީ ބޭނުންތަކުގައި މެނުވީ ގެއިން ބޭރަށް ނުނިކުމެވޭނެ ކަމަށް ބުނެފައިވާއިރު، ޕާޓީތަކާއި، ހަފްލާތަކާއި، ރަސްމިއްޔާތުތައް ބޭއްވުން ހުއްޓައިލުމަށާއި އެއް ގެއިން އަނެއް ގެއަށް ޒިޔާރަތްކުރުން ހުއްޓައިލުމަށް ވަނީ އަންގާފައެވެ. އެއްފަހަރާ ތިން މީހުންނަށްވުރެ ގިނަމީހުން މަގުމައްޗާއި އާންމު ތަންތާނގައި އެއްވެނޫޅެވޭނެ ކަމަށް އަންގައި ސެލޫންތަކާއި، ޖިމްތާކާއި، ބޯކޮށާ ތަންތަން ބަންދުކުރުމަށް އެޗްޕީއޭ އިން ވަނީ އަންގާފައެވެ. އަދި ހުރިހާ ކުޅިވަރު ހަރަކާތްތަކާއި، ކަސްރަތުގެ ހަރަކާތްތައް ހިންގުން ހުއްޓައިލުމަށް ވެސް ވަނީ ރަށްރަށަށް އަންގައި ޔުނިވަރސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކުލާސްތައް ކުރިއަށް ގެންދިޔުން ހުއްޓައިލުމަށް ވަނީ ބުނެފައެވެ.
އޭގެ އިތުރުން ފިހާރަތަކުން ޚިދުމަތް ދޭއިރު، ހެލްތް ޕްރޮޓެކްޝަން އެޖެންސީން އާންމުކޮށްފައިވާ ގައިޑްލައިނާ އެއްގޮތަށް ޚިދުމަތް ދިނުމަށާއި ހޮޓާ، ކެފޭ، ރެސްޓޯރަންޓުތަކާއި، ކާބޯތަކެތީގެ ޚިދުމަތް ދޭ އެހެނިހެން ތަންތަނުން ދެމުންގެންދާ ޚިދުމަތްތަކުގެ ތެރެއިން ޓޭކްއަވޭއާއި ޑެލިވަރީގެ ޚިދުމަތްތައް ފިޔަވައި އެހެން ހުރިހާ ޚިދުމަތެއް ހުއްޓައިލުމަށް އެޗްޕީއޭ އިން ވަނީ ބުނެފައެވެ.
މޮނިޓަރިންގެ ހާލަތުގައި އޮތް ރަށްރަށުގައި އަޅާފައިވާ ފިޔަވަޅުތައް ވަރުގަދަކޮށްފައިވާއިރު، މާލެ ސަރަހައްދުން ފެންނަ ކޭސްތައް އިތުރުވުމާ ގުޅިގެން އެ ސަރަހައްދުގައި އަޅާފައިވާ ފިޔަވަޅުތައްވެސް ވަނީ ހަރުކަށިކޮށްފައެވެ. އެގޮތުން ހަވީރު 04:00ން ހެނދުނު 08:00ށް ކާފިއު ހިންގަން އިއުލާންކޮށް، ކާފިއު ނޫން ގަނޑިތަކުގައި ބޭރަށް ނުކުމެ އުޅެވޭ މީހުންގެ އަދަދު ވަނީ ކޮންޓްރޯލްކޮށްފައެވެ.
