ކްރިމިނަލް ކޯޓުގެ ގާޒީ އިސްމާއީލް ރަޝީދު ފަނޑިޔާރުކަމުގެ މަޤާމުން ވަކިކުރަން ހުށަހަޅާފައި ވަނިކޮށް، އިސްތިއުފާ ދެއްވައިފިއެވެ.
ގާޒީ އިސްމާއިލް ރަޝީދު މަގާމުން އިސްތިއުފާ ދެއްވާފައި ވަނީ މަގާމުން ވަކިކުރުމަށް މަޖިލީހަށް ހުށަހަޅާފައި ވަނިކޮށެވެ. އިސްތިއުފާ ދެއްވިކަން އާންމުކޮށް އިސްމާއިލް ރަޝީދު ވަނީ ޖުޑީޝަލް ސާވިސް ކޮމިޝަން އަށް ހުށަހެޅި ސިޓީވެސް ޓުވީޓުކޮށްފައެވެ. އިސްތިއުފާ ދިން ސަބަބެއްގެ ގޮތުގައި ސިޓީގައި ވަނީ މިނިވަންކަމާ އަދުލަށް ހުކުމް ކުރުމުން އެއްކިބާވެފައިވާ އިންސާފުގެ މަގުން ފަނޑިޔާރުކަން ކުރެވޭނެ މާހައުލެއް، ގާއިމްވެފައި ނެތުމެވެ. އަދި ދިވެހިރާއްޖޭގެ މުޅި ފަނޑިޔާރުގެ ވަނީ ސިޔާސީ ފަރާތެއްގެ ވަކިތަކުގެ ދަށުގައި ތާށިވެފައި ކަމަށް ވެސް ސިޓީގައި ވެއެވެ.
އިސްމާއިލް ރަޝީދު ވިދާޅުވީ ފަނޑިޔާރުކަމުގެ މަގާމުގައި ހޭދަކުރި ހުރިހާ ދުވަހެއްގައިވެސް ޢަމަލުކޮށްފައިވާނީ ދިވެހިރާއްޖޭ ގެ ގާނޫނު އަސާސީއާ އެންމެހައި ގާނޫނުތަކާ އިސްލާމީ ޝަރީއަތުގެ އެންމެހައި ކަންކަމަކީ މަސައްކަތުގެ އަސާސްކަމުގައި ބަލައިގެން އިންސާފާއި ހަމަހަމަކަމާއި ހާމަކަމާއި އެކުގައެވެ. އަދި އެއްވެސް މީހަކަށް ގާނޫނުން ބޭރުން ނުހައްގު ފައިދާއެއް ލިބޭނެހެން ނުވަތައް ނާއިންސާފުން ވެސް އެއްވެސް ކަމެއް ކުރައްވާފައި ނުވާނެ ކަމަށް ވިދާޅުވިއެވެ.
ގާޒީ އިސްމާއިލް ރަޝީދު މަގާމުން ވަކިކުރުމަށް ހުށަހަޅާފައިވާއިރު ކުރީގެ ނާއިބު ރައީސް އަހުމަދު އަދީބުގެ މައްޗަށް އުފުލި 7 ދައުވާއެއް ކްރިމިނަލް ކޯޓަށް ހުށަހެޅުމުގެ ކުރިން ވެސް އެ ދައުވާތަކުގެ ނިންމުން ކްރިމިނަލް ކޯޓުގެ ގާޒީ އިސްމާއިލް ރަޝީދު އޮތީ ލިޔެފައި ކަމަށް ޖުޑީޝަލް ސަރވިސް ކޮމިޝަން (ޖޭއެސްސީ) ގެ ތަހުގީގުން ހާމަވެފައިވެއެވެ. އެގޮތުން ޖޭއެސްސީގ ތަހުގީގުން ހޯދުނު ޕެންޑްރައިވެއްގައި އެ މައުލޫމާތުތައް ހުރި ކަމަށް ބުނެފައިވާއިރު ގާޒީ ރަޝީދު ވަނީ އެވާހަކަވެސް ދޮގުކުރައްވާފައެވެ.
އިސްތިއުފާގެ ސިޓީގައި ވިދާޅުވީ ޖޭއެސްސީގެ ތަހުގީގަށް ފެނުނު ޕެންޑްރައިވްއަކީ އެމަނިކުފަނުގެ ޕެންޑްރައިވެއް ނޫން ކަމަށެވެ. އަދި އެކަމާ ގުޅިގެން އެއްވެސް ސުވާލެއް އެމަނިކުފާނާ ކުރައްވާފައި ނުވާ ކަމަށް ވެސް ވިދާޅުވިއެވެ.
ޣައިރު ޙާޒިރުގައި ހޯދާފައިވާ ޕެންޑްރައިވްއަކުން ފެންނަ ފައިލަކާމެދު އަޅުގަނޑު ޒިއްމާވުމަކީ ހަމަބުއްދި ޤަބޫލުކުރާނެ ހަމައެއް ނޫނެވެ. ކޮމިޝަނުން ތިޔަ ޕެންޑްރައިވެއް ހޯދި ފަހެ ކޮންތާކުން ހެއްޔެވެ؟ ތިޔަ ކޮމިޝަނަށް ހުށަހެޅުނު އަޅުގަނޑުގެ ޝަކުވާއާ ގުޅުމެއް ނެތް ޕެންޑްރައިވެއްގެ މައްސަލަ ތިލަވެގެން މިއުޅެނީ އަޅުގަނޑު މަޤާމުން ވަކިކުރާނެ އެހެން ސަބަބެއް ތިޔަ ކޮމިޝަނަށް ނުފެނުނީތީ ކަމުގައި ދެކެމެވެ.ގާޒީ އިސްމާއިލް ރަޝީދު
ގާޒީ ރަޝީދު ވިދާޅުވީ އަމިއްލަ ފަރުދަކުވިޔަސް ދައުލަތުގެ ކަމެއް ހިންގާން ހުރި ފަރާތަކުންވެސް ފަނޑިޔާރުންގެ މަސައްކަތާބެހި ނުފޫޒުފޯރުވައިގެން ނުވާނޭކަމަށް ދިވެހި ޖުމްހޫރިއްޔާގެ ޤާނޫނުއަސާސީގައި ކަނޑައަޅާފައިވާ މިންގަނޑުން އެއްކިބާވެ، ފަނޑިޔާރަކު ނިންމި ނިންމުމަކާގުޅިގެން މައްސަލައެއް ބެލުމަކީ، ޖޭއެސްސީން ޤާނޫނުއަސާސީ ބޮލާލައި ޖަހާފައިވާކަން އަންގައިދޭ ކަމެއް ކަމަށެވެ. އަދި މުސްތަގިއްލުކަން ގެއްލި ފަނޑިޔާރުންނަށް މިނިވަންކަމާއެކު މަސައްކަތްކުރެވޭނެ މާހައުލެއް ނެތްކަން އަސްލެއްނެތް ޕެންޑްރައިވް ގެމައްސަލައިންވެސް ސާބިތުވާ ކަމަށް ވިދާޅުވެފައިވެއެވެ.
2018 ވަނަ އަހަރުގެ މެއި މަހުގެ ތެރޭގައި ކްރިމިނަލް ކޯޓުގެ ގާޒީކަމުގެ މަޤާމަށް އައްޔަނު ކުރެވުނު ގާޒީ އިސްމާއިލް ރަޝީދަކީ އެމްއެމްޕީއާރުސީގެ ޚިޔާނާތުގެ މައްސަލާގައި ތުހުމަތު ކުރެވޭ ކުރީގެ ނައިބު ރައީސް އަހުމަދު އަދީބުގެ މައްޗަށް ދައުލަތުން އުފުލި 7 ދައުވާ ކްރިމިނަލް ކޯޓުން ބާތިލުކުރިއިރު، އެ މައްސަލަ ބެއްލެވި ގާޒީއެވެ. އޭރު މައްސަލަ ސާބިތު ކުރި ސަބަބެއް އަދި ހަވާލާދިން ގާނޫނުގެ މާއްދާއެއް ހުކުމުގައި ބަޔާންކޮށްފައި ނުވާކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ވެސް ދިޔައީ ބުނަމުންނެވެ.
