ކޮވިޑް-19އާ ގުޅިގެން ސްރީލަންކާގައި އަޅަމުންދާ ފިޔަވަޅުތައް އިތުރަށް ވަރުގަދަ ކުރަމުންދާތީ އެކަމަށް ދިވެހިން ސަމާލުވުމަށް ފޮރިން މިނިސްޓްރީން އިލްތިމާސްކޮށްފިއެވެ.
ފޮރިން މިނިސްޓްރީން ބުނީ ދުނިޔޭގެ އެކި ކަންކޮޅުތަކުގައްޔާއި ސްރީލަންކާގައި އަނެއްކާވެސް ކޮވިޑް-19 ހަލުވިކަމާއެކު ފެތުރެމުން އަންނާތީ، މިކަމާގުޅިގެން ލަންކާގެ ސަރުކާރުން އަޅަމުންދާ ފިޔަވަޅުތައް އިތުރަށް ވަރުގަދަ ކޮށްފައިވާ ކަމަށެވެ.
އެގޮތުން، 21 މެއި ވާ ހުކުރު ދުވަހުގެ ރޭ 11:59ން ފެށިގެން 31 މެއި ވާ ހޯމަ ދުވަހުގެ ރޭ 11:59ގެ ނިޔަލަށް، އެ ގައުމަށް އެއްވެސް މީހަކަށް އެތެރެ ނުވެވޭނެ ކަމަށް އެގައުމުގެ ސަރުކާރުން ނިންމާފައިވާ ކަމަށެވެ. އަދި އެކަން އަންގާފައިވާ ކަމަށް ފޮރިން މިނިސްޓްރީން މައުލޫމާތު ދެއެވެ.
ނަމަވެސް ލަންކާއިން އެހެން ގައުތަކަށް (އައުޓް ބައުންޑް) ދަތުރުތައް ކުރެވޭނެކަމަށް އަންގާފައިވާ ކަމަށް ވެސް މިނިސްޓްރީން ބުނެއެވެ. އެހެންކަމުން ލަންކާއަށް ދަތުރުކުރާ ދިވެހިން މިކަންކަމަށް ސަމާލުވުމަށް ވަނީ އިލްތިމާސްކޮށްފައެވެ.
ލަންކާއަކީ ތައުލީމު ހާސިލުކުރުމަށާއި އެކި ބޭނުންތަކުގައި ގިނަ އަދަދަކަށް ދިވެހިން ދިރިއުޅެމުން އަންނަ ގައުމެކެވެ. ލަންކާގައި ކޮވިޑް ކޭސްތައް 150,000ށް ވުރެ މަތިވެފައިވާއިރު، މިބަލީގައި 1000ށް ވުރެ ގިނަ މީހުން ވަނީ މަރުވެފައެވެ. ލަންކާގެ ހާލަތު ގޯސްވާން ފަށާފައިވަނީ އިންޑިއާގައި މިހާރު ފެތުރެމުންދާ ކޮވިޑުގެ ވޭރިއެންޓް ލަންކާގައިވެސް ފެތުރެން ފެށުމާއެކުއެވެ. ލަންކާގެ އިތުރުންވެސް 17 ގައުމެއްގައި މި ވޭރިއެންޓް އުޅޭކަމަށް ދުނިޔޭގެ ސިއްޙަތު ޖަމިއްޔާއިން ހާމަކޮށްފައިވާއިރު، އިންޑިއާގައި މިހާރު ފެތުރެމުންދާ ވޭރިއެންޓަކީ "ވޭރިއެންޓް އޮފް ކޮންސަރން" އެއް ކަމަށް ޑަބްލިޔުއެޗްއޯއިން ވަނީ ކަނޑައަޅާފައެވެ.
