ރައްޔިތުންގެ މަޖިލީހުން އާންމުކޮށްފައިވާ އެމްއެމްޕީއާރްސީގެ ފައިސާ ލިބުނު މީހުންގެ ލިސްޓުގައި ނަން އޮތް ނަމަވެސް، ޚިޔާނާތުގެ ފައިސާގައި ޖެހިފައި ނުވާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަދައްކަމުން ބައްސާމް ވިދާޅުވީ ރައްޔިތުންގެ މަޖިލީހުން އާންމުކޮށްފައިވާ ލިސްޓުގައި ނަން އޮތްއިރު، ޑޮލަރު ގަތުމަށްޓަކައި ކުރީގެ ނައިބު ރައީސް އަޙްމަދު އަދީބާއެކު މުއާމަލާތެއް ކުރި ކަމަށެވެ. އެކަމަކު އެއީ ޚިޔާނާތުގެ ފައިސާ ކަކަން ނޭނގޭ ކަމަށާއި، އަދީބު އަތުން ޑޮލަރު ގަތީ އޭނާއަކީ ވަރަށް ގާތް ރަހުމަތްތެރިއެއް ކަމަށްވުމުން ކަމަށްވެސް ބައްސާމް ވިދާޅުވިއެވެ.
އަޅުގަނޑު ހަމަގައިމުވެސް އެނގުނު ނަމަ އެކަމެއް ނުކުރާނެ. އޭރަކު ނޭނގޭ އެސްއޯއެފް ކިޔާ ކުންފުންޏަކީ މި ކަހަލަ ފައިސާ ގެންގުޅޭ ތަނެއްކަން. އަޅުގަނޑު މިކުރީ ޑޮލަރު ޓްރާންސެކްޝަނެއް. ރުފިޔާވެސް ދީފައި ހުންނާނީ.އެފްއޭއެމުގެ ރައީސް ބައްސާމް އަދީލް ޖަލީލް
ބައްސާމް ވިދާޅުވީ އަދީބު އަތުން ޑޮލަރު ގަތީ ބޭރު ގައުމެއްގެ ސްކޫލެއްގައި ކިޔަވަން ހުރި މީހެއްގެ ކޯސް ފީ ދައްކަން ޖެހިގެން ކަމަށެވެ.
އަދި ވިދާޅުވީ އަބަދުވެސް އެފްއޭއެމަށް އަދި އޭނާއަށް އެކި ކަހަލަ ތުހުމަތުތަކެއް ކުރެވުމުން އަންނަ ކަމަށާއި، އެކަމަކު ޚިޔާނާތުގެ ކަމެއްގައި އެއްވެސް އިރެއްގައި ބައިވެރިނުވާނެ ކަމަށެވެ. އަދި ފުޓްބޯޅަ އާއިލާއަށް އެފަދަ ކަމެއްގައި ބައިވެރިނުވާނެ ކަމުގެ ފުރިހަމަ ޔަގީންކަންދޭ ކަމަށްވެސް ބައްސާމް ވިދާޅުވިއެވެ.
މި ވަރަށް ފެސިލިޓީސް ޑިވެލޮޕްކުރުމާއި، ނެޝަނަލް ޓީމުތަކަށް އިތުރު ކޭމްޕްތައް ހޯދުމާއި، އަދި ކުލަބުތަކަށް މިދޭ ފައިސާތަކާއި، މި ހުރިހާ ކަމަކަށް ބަލައިފިއްޔާ ތިއަކުން އަޅުގަނޑު ޖީބަށްލާނެ އެއްޗެއް ނޯންނާނެ. އެއީ އަޅުގަނޑު ޖީބަށް ލައިފިއްޔާ މި ކަމެއް ނުކުރެވޭނެ.އެފްއޭއެމުގެ ރައީސް ބައްސާމް އަދީލް ޖަލީލް
ޚިޔާނާތުގެ ފައިސާގައި ޖެހިފައި ނޯންނާނެ ކަމަށް ބައްސާމް ވިދާޅުވިއިރު، މިދިޔަ ދައުރުގައި ބައްސާމް ވަނީ ދިވެހި ފުޓްބޯޅަ ކުރިއެރުވުމަށް އެތައް މަސައްކަތްތަކެއް ކުރައްވާފައެވެ. އެގޮތުން ނިމިދިޔަ ދައުރުގައި ބައްސާމުގެ ބެލުމުގެ ދަށުން "ޓުވާޑްސް ފިއުޗާ" ގެ ނަމުގައި މުސްތަގުބަލަށް ޒުވާން ގައުމީ ޓީމުތަކެއް ބިނާކުރަން ގިނަ މަސައްކަތްތަކެއް ކުރިއެވެ.
އޭގެ އިތުރުން މިދިޔަ ދައުރުގެ ފަހު ކޮޅު ޑިވެލޮޕްމަންޓަށް އިސްކަންދީގެން އެފްއޭއެމް އިމާރާތް 20 ބުރިއަށް ނެގުމާއި، ރާއްޖޭގެ އެކި ސަރަހައްދުތަކުގައި ޓާފް ދަނޑުތަކެއް އެޅުމުގެ މަސައްކަތް އިއުލާނުކުރިއެވެ. އެގޮތުން ދާދި ފަހުން އެފްއޭއެމުން ވަނީ ރާއްޖޭގެ އެކި ކަންކޮޅުތަކުގައި 16 ދަނޑެއް އެޅުމަށް ނިންމާފައެވެ. އަދި ހުޅުމާލޭގައި ބައިނަލްއަގުވާމީ ފެންވަރުގެ ފުޓްބޯޅަ ސްކޫލް ގާއިމުކުރުމުގެ މަސައްކަތާއި، ވިލިމާލޭ ޓާފް ދަނޑުގެ މަސައްކަތްތައްވެސް ފާހަގަކޮށްލެވެއެވެ.
ކާމިޔާބު ދައުރަކަށްފަހު އެފްއޭއެމްގެ ރައީސްގެ މަގާމަށް ދެވަނަ ދައުރަކަށް ބައްސާމް އިންތިޚާބުވީ މިދިޔަ އަހަރުގެ ޖުލައި މަހުގެ ތެރޭގައެވެ. އަދި ބައްސާމުގެ ބެލުމުގެ ދަށުން އެފްއޭއެމުން އަންނަނީ މި ސަރުކާރުގެ ކުޅިވަރު ސިޔާސަތު ތަންފީޒުކުރުމަށް ކުޅިވަރާ ބެހޭ ވުޒާރާއާ ގުޅިގެން ގިނަ މަސައްކަތްތަކެއް ކުރަމުންނެވެ.
