ޖުމްހޫރީ ދުވަހުގެ ޖަލްސާގައި ރައީސުލްޖުމްހޫރިއްޔާގެ ވާހަކަފުޅު

ރައީސް ވިދާޅުވީ، ކުރިއަށް އޮތް ދުވަސްތަކުގައި ލޯކަލް ކައުންސިލްގެ ނިޒާމް އިތުރަށް ވަރުގަދަ ކުރުމަށްޓަކައި، މިހާރަށް ވުރެން މީހުން މަދު ކުރައްވާނެ ކަމަށާއި، މިވާހަކަތައް ފެށުމުން ކައުންސިލްތަކުގެ ބާރު ކަނޑުވާލަނީއޭ ބައެއް ބޭފުޅުން ބުނާ ކަމަށާއި، ނަމަވެސް އެއީ ހަޤީޤަތެއް ނޫން ކަމަށް. އަދި 100 މީހުން ދިރިއުޅޭ ރަށްރަށުގައިވެސް 5 ކައުންސިލަރުން ތިބޭ ކަމަށާއި، ކައުންސިލްގައި ތިބެނީ މަންމައާއި ބައްޕައާއި ދަރިން ކަމަށް. އަދި އޭގެ ތެރެއިން އެކަކު ދަނީ މަހަށް ކަމަށް ރައީސް ފާހަގަކުރެއްވިއެވެ. އެއާއެކު ދެން ރައީސް ވިދާޅުވީ މަސްވެރިކަމަކީ މުހިއްމު ކަމެއް ކަމަށް. ނަމަވެސް އެއީ ބޭފުޅުވާ ގޮތެއް ނޫންކަމަށާއި، ކައުންސިލްތަކުގެ ސައިޒުން ކުޑަވާން ޖެހޭ ކަމަށް. މީގެ އިތުރުން ރައްޔިތުން ތަމްސީލް ކުރެވޭ ވަރުގެ ކައުންސިލެއް އޮތިއްޔާ ނިމުނީ ކަމަށް ވިދާޅުވަމުން ރައީސް ވިދާޅުވީ 5-6 މީހުން ތިބުމުގެ ބަދަލުގައި ތަންކޮޅެއް އާބާދީ ކުދި ރަށްތަކުގައި އެއަށް ވުރެ މަދުން ކައުންސިލަރުން ތިއްބަވާ ގޮތަށް ބަދަލުކުރައްވަން މަޝްވަރާތައް ކުރައްވާނެ ކަމަށް.

ރައީސް މުއިއްޒު: ކުދި ކުދި އާބާދީތައް ބޮޑު ރަށަކަށް ބަދަލުވަންދެން އެތަނުގައި ތިބެންޖެހޭނެ ނޫންތޯ. އެއީ މެނިފެސްޓޯގައި އޮތް ގޮތަކީ. ކުދި ކުދި ހުރިހާ ރަށެއްގައިވެސް ރައްޔިތުން ދިރިއުޅޭ ހިނދެއްގައި އެރަށް ބޭނުންވާ ކަންތައް، އެއިރަކަށް ބޭނުންވާ ވަރަށް، އެއާބާދީއަކަށް ބޭނުންވާ ވަރަށް ހުންނަންވާނެ. އެހެންނަމަވެސް ލޯންގްޓާމް ޑިވޮލަޕްމެންޓް ޕްލޭނެއްގެ ދަށުން، ޕޮޕިއުލޭޝަން އެންޑް ދިވޮލަޕްމެންޓް ކޮންސަލިޑޭޝަން ސިޔާސަތެއްގެ ދަށުން އާބާދީ އާއި ތަރައްގީ އެއްފަސްކުރެވެންވާނެ. އެއީ އަޅުގަނޑުމެންގެ ސިޔާސަތަކީ.

ރައީސް މުއިއްޒު: ފަލަސްތިނު މައްސަލަ ހައްލުކުރުމުގަ ވެސް ޖެހިލުމެއްނެތި މިދަނީ ވަކާލާތުކުރަމުން. އައިސީޖޭގައި އޮތް މައްސަލައިގަވެސް ދިވެހިރާއްޖޭން މިވަނީ ބައިވެރިވެފަ. އަޅުގަނޑުމެން ދާނީ ކެރިގެން ފަލަސްތީނު ރައްޔިތުންގެ ހައްގުގައި ޖިހާދުކުރަމުން. އެއީ އަޅުގަނޑުމެން ފަޚުރުވެރިވާނެ ކަމެއް. މިރޭ މިޖަލްސާ ނިމޭ ގޮތަށް މެންދަމުން އަލިވެ އެކެއް ޖަހާއިރު އަޅުގަނޑު މިފުރަނީ އޯއައިސީ އާއި އަރަބް... އަރަބް އެންޑް އޯައިސީ ސަމިޓަކަށް. ސައުދީ ރަސްގެފާނު ބާއްވަވާ ސަމިޓަކަށް ސައުދީއަރަބިއްޔާ އަށް ދާންވެގެން މިމައްސަލައިގަ. ފަލަސްތީންގެ މިނިވަން ދައުލަތެއް ޤާއިމްކުރުމުގެ މައްސަލައިގަ. ސައުދީއަރަބިއްޔާއަކީ އިސްލާމީ ދުނިޔޭގަ ލީޑަރު. އިސްލާމީ ދުނިޔޭގަ އެންމެ އިސްނަގައިގެން މަސައްކަތްކުރާ އަޅުގަނޑުމެން ފަޚުރުވެރިވާ ގައުމް. ސައުދީ ރަސްގެފާނު އެކުރައްވާ މަސައްކަތުގަ އަޅުގަނޑުމެން ފުރިހަމަ އަށް ބައިވެރިވަން. އެހެންވީމަ ސައުދީއަރަބިއްޔާއަށް އަޅުގަނޑު މިދަނީ އެކަމުގަ ދިވެހިރާއްޖޭގެ ފަރާތުން ބަސް އިއްވަން. އެހެންވީމަ، އަޅުގަނޑުމެންގެ ޚާރިޖީ ސިޔާސަތު މިއޮތީ ވަރަށް ސާފުކޮށް އެންމެންނަށް ފެންނަ ގޮތުގަ.

ރައީސް ވިދާޅުވީ ރޯމާ ދުވާލު ކަނޑައެޅިފައިވާ ދުސްތީރީ ނިޒާމަށާއި ޤާނޫނު އަސާސީއާ ޚިލާފަށް ރައްޔިތުންގެ މަޖިލީހުގައި އަހާލުމެއް ނެތި ރާއްޖޭގެ ކަނޑުން ބޮޑު ބައެއް ދޫކޮށްލި ކަމަށާއި، އެކަން ކޮށްފައިވާ ގޮތުން އެކަން ހައްލު ކުރުމުގަ ބުރަ މަސައްކަތްތަކެއް ކުރައްވަން ޖެހިވަޑައިގަންނަވާ ކަމަށް. އެގޮތުން ރެޔާ ދުވާލު ގެންދަވަނީ އެމަސައްކަތް ކުރައްވަމުން ކަމަށް. އެޓަރނީ ޖެނެރަލް އޮފީހުގެ މުވައްޒަފެއް ދާއިމީކޮށް މިސަރުކާރު އުފެދުނީއްސުރެ ޔޫއެންގައި ހުންނާނެ ކަމަށާާއި، އެތާ ބަހައްޓައިގެން ވެސް ކުރައްވަންޖެހޭ މަސައްކަތްތައްވެސް ސަރުކާރުން ކުރައްވަމުން ގެންދަވާކަމަށް. އެކި އެކި މަސައްކަތްތައް ވަކީލުންގެ ޓީމަކުން ކުރިއަށް ގެންދަވާ ކަމަށް. އަދި ތާރީހީގޮތުން ފެންނަން ހުރި ކަންކަމާއެކު ރަސްމީކޮށް ދިވެހި ސަރުކާރުން އިނގިރޭސި ސަރުކާރަށް ސިޓީއެއް ފޮނުވާފައިވާނެ ކަމަށާއި، އުއްމީދަކީ އިންސާފުވެރި ގޮތެއްގައި މިކަމުގައި ފައިސަލާކުރުން ކަމަށް ރައީސް ވިދާޅުވި. އަދި މިސަރަހައްދު ބެލެހެއްޓުމަށް ވައިގެ ބާރެއް ސިފައިންގޭގައި އުފައްދަވައިގެން ރެޔާދުވާލު ރާއްޖޭގެ ބިޔަ ބޮޑު ކަނޑުގެ ސަރަހައްދު ބަލަހައްޓަވަމުން ގެންދަވާކަމަށް ރައީސް ވިދާޅުވި.

ރައީސް މުއިއްޒު ވިދާޅުވީ މަޝްވަރާކޮށްގެން، ޑިޕްލޮމެސީގެ ރިވެތި އުސޫލުގެ މަތިން ކުރެވުނު މަޝްވަރާއިން ރާއްޖޭގަ ތިބި ހުރިހާ ބޭރު ސިފައިން ރާއްޖޭން ފައިބާފަ ވާނެ ކަމަށާއި، މިހާރަކު ރާއްޖޭގައި ޤާއިމްވެތިބި އެއްވެސް ބޭރުގެ ސިފައިންނެއް ނުހުންނާނެ ކަމަށް. އަދި ޔުނީފޯމުގައި އަދި އެނޫންވެސް ގޮތަކަށް އޮޅުވާލާއިގެން ވެސް ނުހުންނާނެ ކަމަށާއި، ބައެއް މީހުން އެކި މަޤްސަދުތަކުގައި ވާހަކަދައްކާ ކަމަށް. ރައީސް ފާހަގަކުރެއްވި ގޮތުގައި އައިޖީއެމްއެޗް ހެދުމަށް ފަހު އެންމެ ފުރަތަމަ އެތަނަށް ވެސް އައީ ބޭރުގެ އެކްޓިވް މިލިޓަރީ ޑޮކްޓަރުން ކަމަށާއި، އޭރު އެންމެ ގިނައިންވެސް ތިބީ އެޤައުމުގެ ޑޮކްޓަރުން ކަމަށާއި، ސެނެހިޔާ އުފެދުނީއްސުރެވެސް އެކި އަހަރު އެކިވަރަށް، ޑޮކްޓަރުންނާ ޓެކްނީޝަނުން، މިލިޓަރީ ބޭފުޅުން ތިއްބަވާނެ ކަމަށާއި، މިހާރުވެސް ތިއްބަވާނެ ކަމަށާއި، މުޒާހަރާ ކުރި މައުލޫއަކީ އެއީ ނޫން ކަމަށް. އަދި މިހާރަކު އެއްވެސް ޤައުމެއްގެ ސިފައިންނެއް ރާއްޖެއަކު ނެތް ކަމަށް ރައީސް ވިދާޅުވި.

ރައީސް މުއިއްޒު: ކެމްޕޭން ތެރޭގަވެސް އިއުލާން ކުރި ގޮތަށް މި ގައުމުގައި ބަދަލު ހިފުމުގެ ރޫހު ނައްތާލައިފި. ސިޔާސީ ގޮތުން މިހާރަކު ނުފެންނާނެ ކުރީގަ ފެނުނު ގޮތަށް ބަދަލު ހިފުމުގެ ރޫހެއް. ސިޔާސީ ވާދަވެރިޔަކަށް ވީތީ އަޅުގަނޑުގެ ވާދަވެރިޔާ ގެންގޮސް ހިފާ ހައްޔަރުކޮށް ޖަލަށްލާތަނެއް ނުފެންނާނެ. މިދިޔާ އެއް އަހަރު ތެރޭ ނުފެންނާނެ. ކުރިއަށް އޮތްތާނގަވެސް ނުފެންނާނެ އެކަމެއް. އެއީ އަޅުގަނޑު ގަބޫލުކުރާ ގޮތަކީ. މީގެ ކުރީގައި ކޮންމެވެސް ވަރަކަށް އެކަން އޮތީ ފެނިފަ. ފްރޭމްކޮށްގެން ވިޔަސް އެނޫން ގޮތަކުން ވިޔަސް އެކަން އޮތީފެނިފަ އަނިޔާވެރިކަމާއެކީގަ. ސިޔާސީ ވާދަވެރިން ގެންގޮސް ޖަލަށްލާ އަނިޔާކޮށްފަވޭ. އެއީ ތިމަންނައާ ތިމާގެ މީހެއްވިޔަސް، ތިމަންނަގެ ރައްޓެއްސެއް ވިޔަސް، ކޮންމެ މީހެއްވިޔަސް ސިޔާސީ މީހެއް ވިއްޔާ ދުރައްލާ އެއްކައިރި ކުރުމުގެ ޒަމާން ތާއަބަދަށް މިވެރިކަން ފެށުނު ދުވަހުން ފެށިގެން މިވަނީ ނެތިގެން ގޮސްފަ. މި ސަރުކާރަކު ނުފެންނާނެ ރިޔާސީ ކޮމިޝަންތައް ހަދައިގެން ކުރީގެ މީހުން ކުރަމުން ދިޔަ ކަންކަމަށް ސިޔާސީ ގޮތުން ވަދެގެންދާ ކަމެއް.

ރައީސް މުއިއްޒު ވިދާޅުވީ މިދިޔަ 51 ހަފްތާ އާއި 2 ދުވަހު މަސައްކަތްކުރެއްވީ ރައްޔިތުންގެ ފަޅީގައި ހުންނަވައިގެން ރައްޔިތުންގެ އަތުގައި އޮތް ބާރެއް، ރައްޔިތުންނަށްޓަކައި ކަންތައްތަކެއް ކޮށްދެއްވުމަށްޓަކައި، ރައްޔިތުންގެ އަޑުއައްސަވައިގެން، ރައްޔިތުންގެ އުއްމީދުތަކުގައި ކުލަޖައްސަވައިދިނުމަށްޓަކައި، ރައްޔިތުން އެދޭ އަމާޒަށް ދިިޔުމަށްޓަކައި، ރައްޔިތުން ހަވާލުކުރި އަމާނާތާއި މަސްއޫލިއްޔަތު އަދާކުރެއްވުމަށްޓަކައި ކަމަށް.

ރައީސް މުއިއްޒު: އަޅުގަނޑުގެ ބައްޕަ މިފޮތް ލިޔުއްވީމައެއް ނޫން، އެހެންނަމަވެސް، މިފޮތް ބައްލަވާފައިވާ، ކިޔުއްވާފައިވާ ކޮންމެ ބޭފުޅަކުވެސް ޤަބޫލުފުޅު ކުރައްވާނެ މިފޮތަކީ ވެރިކަމާ ގުޅޭގޮތުން، ރައްޔިތުންނާއި ވެރިންނާ އޮތް ގުޅުމާ ބެހޭ ގޮތުން، މަސްއޫލިއްޔަތު ވެރިން އަދާކުރަން ޖެހޭ ގޮތާ ބެހޭގޮތުން އިލްމީ ނަޒަރަކުން، ދީނީ ނަޒަރަކުން، އިސްލާމީ ތާރީޚްގެ އަލީގައި އަދި ރާއްޖޭގެ ޤާނޫނާއި ޤާނޫނު އަސާސީއަށް ރިޔާއަތްކޮށް ވަރަށް އިލްމީ ގޮތެއްގައި ވަރަށް ވަށާޖެހޭ ގޮތެއްގައި ލިޔުއްވާފައިވާ ފޮތެއް. މިފޮތުގެ ފިހުރިސްތުގަ ބަޔާންކޮށްފައިވާ ކަންތައްތަކަށް ބަލާއިރުވެސް ތިމަންމެންގެ ވެރިޔަކަށް މީހަކު ހޮވައިގެން އެ އަދާކުރާ ޒިންމާ އަދާކުރަނީ ރަނގަޅަށްތޯ ބެލުމުގަ ބަލަންވީ ހުރިހާ ކަމެއްހެން ގާތްގަނޑަކަށް ބަޔާންކޮށްފައިވާ ފޮތެއް. އަޅުގަނޑުގެ ގައިޑް ބުކަކީ މިފޮތް. އަޅުގަނޑު މިއަދާހަމައަށްވެސް ބަލަމުން އައީ މިފޮތް.