24 ގަޑިއިރުގެ ތެރޭގައި ކޮވިޑްބަލީގައި ދެވަނަ މީހަކު ނިޔާވެއްޖެއެވެ.

މި ބަލީގައި ބުރާސްފަތި ދުވަހު ދެވަނައަށް ނިޔާވެފައިވަނީ އުމުރުން 83 އަހަރުގެ ދިވެހި ފިރިހެނެއްކަމަށް އެޗްޕީއޭއިން މައުލޫމާތުދެއެވެ. އެމީހާއަކީ ނައިފަރު ހޮސްޕިޓަލުގައި އެޑްމިޓްކޮށްގެން ފަރުވާދެމުން ދިޔަ މީހެކެވެ.  އެމީހާ ނިޔާވެފައިވަނީ ބުރާސްފަތި ދުވަހުގެ މެންދުރު 12:30 ގައި ކަމަށް އެޗްޕީއޭއިން ބުނެއެވެ.

ބުރާސްފަތި ދުވަހުގެ ފަތިހު 3:18 ހާއިރު ވެސް އަންހެނަކު ވަނީ ނިޔާވެފައިވެއެވެ. އެމީހާއަކީ ހުޅުމާލެ މެޑިކަލް ފެސިލިޓީގައި ކޮވިޑް-19ށް ފަރުވާ ހޯދަމުންދިޔަ އުމުރުން 77 އަހަރުގެ އަންހެނެކެވެ.

މި ދެ މަރާއެކު ރާއްޖެއިން ކޮވިޑު ޖެހިގެން މަރުވި މީހުންގެ އަދަދު ވަނީ 76ށް އަރާފައެވެ.

ރާއްޖޭގައި މިފަހަކުން އަންނަނީ ކޮވިޑްގެ ހާލަތު ގޯސްވަމުންނެވެ. ރާއްޖެއިން ބުދަ ދުވަހު 700ށް ވުރެ ގިނަ މީހުން ކޮވިޑް-19 ޕޮޒިޓިވެގެން ރިޕޯޓު ކޮށްފައިވެއެވެ. އެޗްއީއޯސީން ނެރުނު ތަފާސްހިސާބުތައް ދައްކާގޮތުން ޓެސްޓުކުރި 4،787 ސާމްޕަލްގެ ތެރެއިން 734 މީހުން ވަނީ ޕޮޒިޓިވްވެފައެވެ. އޭގެ ތެރެއިން މާލެއިން 540 މީހުން ވަނީ ޕޮޒިޓިވްވެފައެވެ. އަދި އަތޮޅުތެރެއިން 186 ކޭސް ރިޕޯޓުކޮށްފައިވާއިރު، އިންޑަސްޓްރިއަލް ރަށްތަކުން އެއް ކޭސް ވަނީ ރިޕޯޓުކޮށްފައެވެ.

މިއާއެކު ރާއްޖޭގައި 7،109 އެކްޓިވްކޭސް މިހާރު ތިބި އިރު ޕޮޒިޓިވް ކޭސްތަކުގެ ޖުމްލަ އަދަދު ވަނީ 32،665ށް އަރާފައެވެ. އޭގެ ތެރެއިން 25،437 މީހުން ވަނީ ބަލިން ރަނގަޅުވެފައެވެ. ބައްޔަށް ފަރުވާ ހޯދަމުންދާ މީހުންގެ ތެރެއިން 198 މީހުން އެޑްމިޓްކޮށްގެން ދަނީ ފަރުވާ ދެމުންނެވެ.