މުޅި ރާއްޖެއިން ވެކްސިން ޖެހި މީހުންގެ އަދަދު ތިން ލައްކައާ ގާތަށް ޖެހިލައިފިއެވެ.

އެޗްޕީއޭގެ ތާފާސްހިސާބުތައް ދައްކާގޮތުން 299،407 މީހުން ވަނީ ވެކްސިން ޖަހާފައެވެ. އޭގެ ތެރެއިން 119،515 މީހުން މިހާތަނަށް ވަނީ ދެވަނަ ޑޯޒު ޖަހާފައެވެ.

ތަފާސްހިސާބުތައް ދައްކާގޮތުން ރާއްޖެއިން އަންގާރަ ދުވަހު ޖުމްލަ 6،289 މީހަކު ވެކްސިން ޖަހާފައިވެއެވެ. އޭގެ ތެރެއިން 1011 މީހުންނަކީ ފުރަތަމަ ޑޯޒު ޖެހި މީހުންނެވެ. އަދި 5،278 މީހުންނަކީ ދެވަނަ ޑޯޒު ޖެހި މީހުންނެވެ.

ފުރަތަމަ ޑޯޒު ޖެހި މީހުންގެ ތެރެއިން މާލެ ސަރަހައްދުން ވެކްސިން ޖެހީ 245 މީހުންނެވެ. އަދި 766 މީހަކު އަތޮޅުތެރެއިން ވެކްސިން ޖެހިއެވެ. ދެވަނަ ޑޯޒު ޖެހި މީހުންގެ ތެރެއިން ގިނަ މީހުން ވެކްސިން ޖެހީ އަތޮޅުތެރެއިންނެވެ. އެއި 4،681 މީހުންނެވެ. މާލެއިން ވެކްސިން ޖެހީ 597 މީހުންނެވެ. މި އަދަދު ދަށް ވެފައި މިވަނީ މާލެ ސަރަހައްދުގައި ކޮވިޝީލްޑް ވެކްސިން ޖެހުން ހުއްޓާލުމާ ގުޅިގެންނެވެ. އެ ވެކްސިންގެ ފުރަތަމަ ޑޯޒު ޖެހުން މިދިޔަ މަހު 15ގައި ހުއްޓާލި އިރު އޭގެ ދެވަނަ ޑޯޒު މާލެ ސަރަހައްދުގައި ޖެހުން އަންގާރަ ދުވަހު ވަނީ ހުއްޓާލާފައެވެ.

މާލެ ސަރަހައްދުގައި ކޮވިޝީލްޑް ވެކްސިންގެ ދެވަނަ ޑޯޒު ޖެހުން ހުއްޓާލާފައިވާއިރު އެ ވެކްސިންގެ މިވަގުތު ބާކީ ހުރީ 1700 ޑޯޒް ކަމަށް އެޗްޕީއޭއިން ބުނެފައިވެއެވެ. އެކަމަކު ވެކްސިން ޖަހަން ޖެހޭ 26،400 މީހުން އެބަތިބި ކަމަށް ވެސް ބުނެފައިވެއެވެ.

އެޗްޕީއޭއިން ބުނީ ހަމަ އެއް ފޯމިއުލާއެއްގެ އެސްޓްރަޒެނެކާ ވެކްސިން ވަރަށް އަވަހަށް ލިބޭނެ ކަމަށާއި ކޮވިޝީލްޑް ގެ ފުރަތަމަ ޑޯޒު ޖެހި މީހުންނަށް އެ ވެކްސިން ބޭނުންކުރެވޭނެ ކަމަށެވެ.