ކޮވިޝީލްޑް ވެކްސިން ޖެހުން ވަގުތީ ގޮތުން މެދުކަނޑާލާފައިވާއިރު މިވަގުތު ބާކީ ހުރީ 1700 ޑޯޒް ކަމަށް ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެއްޖެއެވެ.
އަންގާރަ ދުވަހު ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ކޮވިޝީލްޑް ވެކްސިނުގެ ފުރަތަމަ ޑޯޒް ޖަހާފައިވަނީ 228،637 މީހުން ކަމަށެވެ. އަދި ދެވަނަ ޑޯޒް 110،892 މީހުން ޖަހާފައިވާއިރު އަށް ހަފްތާ ހަމަވެ ދެވަނަ ޑޯޒް ޖަހަން ޖެހޭ 26،400 މީހުން އެބަތިބި ކަމަށާއި 1700 ޑޯޒު ބާކީ ހުރުމާއެކު މި އެންމެންނަށް ވެކްސިންގެ ދެވަނަ ޑޯޒް ނުޖެހޭނެ ކަމަށެވެ.
މި ކަންކަން ހައްލުކުރެވި، ވެކްސިންގެ އިތުރު ޑޯޒްތައް ރާއްޖެއަށް ލިބެންދެން، އާންމުކޮށް ހުޅުވައިލައިގެން ކޮވިޝީލްޑް ވެކްސިން ޖެހުން މެދު ކަނޑާލީ ކަމަށް ވެސް ވިދާޅުވިއެވެ.
މަބްރޫކް ވިދާޅުވީ ކޮވިޑް-19ގެ ބަލިމަޑުކަމުގައި މުޅި ދުނިޔެއަށް ކުރިމަތިވެފައިވާ ހާލަތު އިތުރަށް ގޯސްވުމާ ގުޅިގެން ވެކްސިން އުފެއްދުމާއި، ފޯރުކޮށްދިނުމަށް ހުރިހާ ގައުމަކަށް ވެސް ހުރަސްތަކަކާއި ލަސްތަކެއް ކުރިމަތިވަމުން ދާ ކަމަށެވެ. ޚާއްސަކޮށް އެންމެ ގިނަ އަދަދަކަށް ވެކްސިން އުފައްދާ އިންޑިއާގެ އެކި ސަރަހައްދުތަކުގައި ކޮވިޑްގެ ކޭސްތައް ހަލުވިކަމާއެކު ފެތުރެމުންދާއިރު އެހެން ގައުމުތަކެކޭ އެއް ފަދައިން، ރާއްޖެއަށް ވެސް ވެކްސިން ހޯދުމުގައި ދަތިތަކެއް ކުރިމަތިވެފައިވާ ކަމަށެވެ.
އިމަރޖެންސީ ހާލަތްތަކުގައްޔާއި، ބަލި ހާލަތު ހުރިގޮތުން ވެކްސިން ޖަހައިދޭން ޖެހޭ މީހުންނަށް އެ ފުރުސަތު ހަމަޖެހިފައިވާއިރު އެޗްޕީއޭއިން ބުނީ އާންމުކޮށް ހުޅުވައިލައިގެން ކޮވިޝީލްޑް އަލުން ޖަހައިދޭން ފަށާނެ ތާރީޚެއް ފަހުން އިއުލާނު ކުރާނެ ކަމަށެވެ.
2021 ފެބުރުއަރީ 1 ވަނަ ދުވަހު ފެށި "ކޮވިޑް-19 ދިފާއު" ވެކްސިން ދިނުމުގެ ކެމްޕޭންގެ ދަށުން މިހާތަނަށް ޖުމުލަ 298،396 މީހުންނަށް ވަނީ ވެކްސިންގެ ފުރަތަމަ ޑޯޒް ޖަހައިދީފައެވެ. އަދި، ވެކްސިންގެ ދެވަނަ ޑޯޒް ޖަހާދީފައިވާ މީހުންގެ އަދަދު 114،240ށް އަރައެވެ.
