ރާއްޖޭގައި ކޮވިޑް-19ގެ ހާލަތު ގޯސްވަމުންދާއިރު ފާއިތުވި 24 ގަޑިއިރު 585 މީހަކު އެބައްޔަށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން ހާމަކޮށްފައިވާ ތަފާސް ހިސާބުތަކަށް ބަލާއިރު ޕޮޒިޓިވްވި މީހުންގެ ތެރެއިން 397 މީހުންނަކީ މާލެ ސަރަހައްދުން ޕޮޒިޓިވްވި މީހުންނެވެ. އަދި 160 މީހުން އަތޮޅުތަކުން ވަނީ ޕޮޒިޓިވްވެފައެވެ. 11 މީހަކު ވަނީ ރިސޯޓްތަކުން ކޮވިޑަށް ޕޮޒިޓިވްވެފައެވެ. އަދި ހަދަމުންދާ ރިސޯޓްތަކުން 15 މީހަކު ވަނީ ޕޮޒިޓިވްވެފައެވެ.

ރާއްޖޭގައި މިވަގުތު އެކްޓިވް ކޭހުގެ ގޮތުގައި 6033 ކޭހެއް އަންނަނީ ރިޕޯޓްކުރަމުންނެވެ.

ރާއްޖެއިން މިހާތަނަށް 31،330 މީހުންނަށް ވަނީ ކޮވިޑް ޖެހިފައެވެ. އަދި 25،214 މީހުން ވަނީ ބަލިން ރަނގަޅުވެފައެވެ. 74 މީހަކު ވަނީ މިހާތަނަށް އައިއިރު މިބަލީގައި ނިޔާވެފައެވެ.

މިދިޔަ މަހުގެ ފަހުކޮޅުން ފެށިގެން ރާއްޖޭގައި ފެންނަ ކޭސްތައް 300ން މަތީގައި ގުނަމުން އަންނަ އިރު ފާއިތުވި ހަފުތާގައި 4 ފަހަރެއްގެ މަތިން 400ށް ވުރެ ގިނައިން ވަނީ ޕޮޒިޓިވް ކޭސްތައް ރިޕޯޓްކޮށްފައެވެ. މިމަހުގެ މިހާތަނަށް ރާއްޖެއިން ކޭސްތައް ރިޕޯޓްކޮށްފައިވާ ގޮތަށް ބަލާއިރު މެއި މަހުގެ 1 ވަނަ ދުވަހު 402 މީހަކު ކޮވިޑަށް ޕޮޒިޓިވްވެފައެވެ. އަދި މެއި މަހުގެ 2 ވަނަ ދުވަހު ވަނީ ފުރަތަމަ ފަހަރަށް 500ން މަތިން ކޭސްތައް ރިޕޯޓްކޮށްފައެވެ. އެއީ 508 މީހުންނެވެ.

ރާއްޖޭގައި ކޮވިޑްގެ ހާލަތު ގޯސްވަމުންދިޔުމާއެކު މިހާރު އަންނަނީ ލުއިދީފައިވާ ފިޔަވަޅުތައް ހަރުކަށިކުރަމުންނެވެ. އެގޮތުން އަތޮޅުތެރޭގައި ކޭސްތައް ރިޕޯޓްކުރާ މިންވަރު އިތުރުވަމުންދާތީ މާލެ ސަރަހައްދު ފިޔަވައި މީހުން ދިރިއުޅޭ ރަށްރަށުގައި އެއް ހަފުތާގެ މުއްދަތަކަށް ޚާއްސަ ފިޔަވަޅުތަކެއް އެޅުމަށް އެޗްޕީއޭއިން ވަނީ އަންގާފައެވެ.

މީގެކުރިން މާލެ ސަރަހައްދުގައި އެކަނި ކޮވިޑްގެ ކޭސްތައް އިތުރުވަމުން ދިޔަނަމަވެސް މިފަހަކުން އަތޮޅުތެރޭގައިވެސް ކޮވިޑްގެ ހާލަތު ވަނީ ގޯސްވެފައެވެ. އެގޮތުން މިހާރު އަތޮޅުތަކުން ފެންނަ ކޭސްތަކުގެ އަދަދު ދެހާހާއި ކައިރިކުރާއިރު މޮނިޓަރިންގ ގައި އޮތް ރަށްތަކުގެ އަދަދު ވިއްސަށްވުރެ ވަނީ މަތިވެފައެވެ.