ލީކުވި ޕޭޕަރުތަކުގެ މައްސަލައިގައި ރާއްޖެއިން އެޑެކްސެލްއަށް ހުށަހެޅި މައިގަނޑު ހުށަހެޅުމަކީ އަލުން އިމްތިހާން ހެދުން ކަމުގައި ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) ހިންގުމާ ހަވާލުވެވަޑައިގެން ހުންނެވި އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު މުހައްމަދު އިހުސާން ވިދާޅުވެއްޖެއެވެ.
އޭލެވެލްގެ ބައެއް އިމްތިހާނުތަކުގެ ޕޭޕަރުތައް ލީކުވި މައްސަލަ މިދިޔަ ހަފްތާގެ ތެރޭގައި ވަނީ ވަރަށް ބޮޑަށް ހޫނުވެފައެވެ. އަދި ރާއްޖޭގައި އިމްތިހާނު އޮތް ވަގުތުގެ ކުރިން އެ ޕޭޕަރުތައް ބައެއް ކުދިންނަށް ފެނިފައިވާތީ، ގިނަ ދަރިވަރުންތަކެއް އަންނަނީ ކަންބޮޑުވުން ފާޅުކުރަމުންނެވެ.
މިކަމާ ގުޅިގެން، ރާއްޖެޓީވީގެ "ފަލަ ސުރުޚީ" ޕްރޮގްރާމުގައި ވާހަކަދައްކަވަމުން އިހުސާން ވިދާޅުވީ، އޭލެވެލް އިމްތިހާނުގެ ޕޭޕަރުތަކެއް ލީކުވި މައްސަލައިގައި، އެޑެކްސެލްއާއެކު ގިނަ މަޝްވަރާތަކެއް ކުރެވެމުންދާކަމަށެވެ. އެގޮތުން އާދިއްތަ ދުވަހު ދެކެވުނު ވާހަކަތަކުގައި، ހޯމަ ދުވަހުން ފެށިގެން އެފަދަ އެއްވެސް މައްސަލައެއް ކުރިމަތި ނުވާނެކަމުގެ ބޮޑު ޔަގީންކަމެއް އެޑެކްސެލްއިން ދީފައިވާކަމަށް އިހްސާން ވިދާޅުވިއެވެ.
މިއަދު އަޅުގަނޑުމެންނަށް އެޑެކްސެލްއިން ވަރަށް ބޮޑު ޔަގީންކަމެއް އެބަދޭ މާދަމާއިން ފެށިގެން އެފަދަ ކަންކަން ދެން ދިމާ ނުވާނެ ކަމަށް. އެޑެކްސެލްގެ ޕޭޕަރުތައް އިމްތިހާން ހޯލަށް ދަރިވަރުން ވަނުމުގެ ކުރިން ނުފެންނާނެ ކަމަށް.އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު މުހައްމަދު އިހުސާން
އިހްސާން ވިދާޅުވީ މިހާރު ލީކުވެފައި ހުރި ޕޭޕަރުތަކުގެ މައްސަލައިގައި ވަރަށް އަވަހަށް ގޮތެއް ނިމިގެން ދާނެކަމަށެވެ. އެހެން ނަމަވެސް، މި އިމްތިހާނަކީ ރާއްޖޭގެ އިމްތިހާނަކަށް ނުވުމުން މި މައްސަލައިގައި ފަހުބަސް ބުނުމުގެ ފުރުސަތު ރާއްޖެއަށް ލިބިގެންނުވާކަމަށް އިހްސާން ވިދާޅުވިއެވެ.
